Ivyili 20 - IBAYIBOLO 2024

¹ Uvinyo cho chakung'wela chicho chikumupelela umuntu pakuba we ching'wela, sona wesi yuyo akuzimbuliwa nu vinyo ate na mahala.

² Ubukali ubwa mwene buli ngati kubuluma ukwa nkalamu, umuntu yuyo akumukalizya akubika ubumi bwache pachulu.

³ Ukuvileghuka ivyongo gho muchizi uwa muntu, loli umupunganu aghanite nkani pakudalinkana.

⁴ Umukata atakulima pakabalilo kache, po pakabalilo akakwinula akuvilondelezya, loli atakuvyagha.

⁵ Inyinong'ono izya muntu zili ngati mizi amibizu, loli umuntu uwakwivwisya ivintu weyuyo akusembamo amizi.

⁶ Abantu abinji bakwipimagha bene pakuba basubiliwa, po nkimba wewenu yuyo angamwagha umuntu umusubiliwa?

⁷ Umugholosu weyuyo ali nubumi bubo bute ni chilema nachimochimo, sona basayiwa abana bache babo bakweghelela inkalo yache.

⁸ Nanti u mwene akwikala pachitengo icha bulongi, na maso ghache akubamanya ababibi bosi.

⁹ Nkimba wewenu yuyo anganena ukuti, “Ane ne muzelu, ane inte ni chilema nachimochimo pamo imbibi”?

¹⁰ Ivipimilo vyosi ivyabumyasi u Mwene avibengite.

¹¹ Nu mwana bulo akumanyikwa ni mbombo zyache, nanti inkalo yache nyiza sona ngolosu.

¹² Amakutu gho ghakwivwila, sona maso gho ghakwenezezya, u Mwene weyuyo avipelite vyosi.

¹³ Utakatughanaye utulo, lumo ungaba we mupina, banga maso po ukwiza pakuba ni chakulya nkani.

¹⁴ Nanti umuntu akughula ichintu akuti, “Mwee chili nu mutengo, naloli chili nu mutengo,” loli nanti achighula nukwepapo, akwanda pakwituvya.

¹⁵ Ugolide alipo, na mabwe aghamutengo minji nkani, loli umulomo ghugho ghukunenagha ivyamahala ghuvichilite vyosi vinivi.

¹⁶ Senda umwenda uwa muntu yuyo akumubikila ubwakaboni umuyeni pa nkongole, uchisendaye pakuba chikole icha muyeni yula.

¹⁷ Ichakulya ichakuchikabila mubuzimbuli chikunona nkani ku muntu yuyo akuchilya, loli pabumalilo pache chikuba ngati lufumbi mumulomu wache.

¹⁸ Imbatiko zizyo zikwitikiziwa nu bulongozi ubwa bantu zikwenda akiza, po ulwanje ubwite nu bulongozi ubwiza.

¹⁹ Umwendanato akuvumbula ivya kubusyefu, po umuleghukaye umwendanato yulayula.

²⁰ Nanti umuntu akumutuka uwise pamo unyina, akwiza pakuba ngati nyale yiyo yikuzima muchisi.

²¹ Ubukabi ubwakubukabila mubusita kwiyula butakuba nu lusayo nalumolumo.

²² Utakatinji, “Nkwiza pakutanizya imbibi pa mbibi.” Umulindililaye u Mwene akwiza pakukwavwa.

²³ Ivipimilo ivyabung'wamu ivyabuzimbuli gho mwiko kwa Mwene sona ivipimilo ivyabumyasi te vyiza.

²⁴ Izila zyitu zikulamuliwa nu Mwene po nkimba umuntu angayimanya bulibuli izila yache?

²⁵ Chipingo kwa muntu pakubika kwa Mwene umwakusita ukwinong'onela, pachifukwa ichakuti lumo angandula inyinong'ono bo afingana kale.

²⁶ U mwene uwamahala akubamanya abantu ababibi, sona akubafunda umwakusita ukubapelela ichisa.

²⁷ Umuzimu uwa muntu yo nyale iya Mwene yiyo yikuvumbula vyosi ivya mukasi.

²⁸ Ulughano nu busubiliwa vikumusungilila u mwene sona ichitengo chache chikusungililiwa nu bugholosu.

²⁹ Ubuchindamu ubwa balumendo gho maka ghabo, ivwi bo buchindamu ubwa baghosi.

³⁰ Ukukomiwa ko kuko kukuswefya ububibi, sona indisa zyo zizyo zikumupozya umuntu mukasi.