Ivyili 2 - IBAYIBOLO 2024

Umuvwalo uwa mahala

¹ Wee mwana wane, ghapokele amazyu ghane, nukughasunga amalamulo ghane.

² Tegha amakutu ghako pakughateghelezya amahala nukubika umoyo wako pakwivwisya ivintu.

³ Ubunyonywanje ubumanyi nukulila ukuti ubanje we muntu uwakwivwisya ivintu.

⁴ Ubulondelezyanje ubumanyi ngati po ukulondelezya usiliva, sona ngati po ukubulondelezya ubukabi bubo bufisiwe.

⁵ Polelo ukwiza pakumanya pakumunyila u Mwene nukughaghannya amahala agha Chala.

⁶ Pakuti we Mwene yuyo akupa amahala, sona amahala nukwivwisya ivintu vyache.

⁷ Akubasungila ubupoti abagholosu munyumba yache, we ngulu iya bantu babo bate ni chilema nachimochimo.

⁸ Pakuti akubasungilila abagholosu, sona akubazighilila abasubiliwa.

⁹ Po ukwiza pakubumanya ubugholosu nu bwanaloli, nu bwiza, sona ni zila zyosi inyiza.

¹⁰ Pakuti amahala ghakwiza pakwinjila mumoyo wako, sona ubumanyi bukwiza pakughuhobosya umuzimu wako.

¹¹ Amahala nu bumanyi vikwiza pakukupoka sona ubumanyi bukwiza pakukusungilila.

¹² Amahala ghakwiza pakukupoka munyobe izya bantu ababibi, munyobe izya bantu aba neno imbibi.

¹³ Bakuzileka izila ingolosu loli bakwenda muchisi.

¹⁴ Abantu banaba bakuhoboka pakubomba imbimbi, sona ni mbombo inyonganu.

¹⁵ Izila zyabo zitagholokite, sona izila zyabo nchevu nkani.

¹⁶ Amahala ghakwiza pakukwefya munyobe izya mukolo umalaya, munyobe izya mukolo na mazyu ghache amazimbuli,

¹⁷ yuyo akusoka ku mulume wache, nukulusulannya ulufingo lulo akafinga pamaso pa Chala.

¹⁸ Pakuti inyumba yache yo zila iya kubufwe sona zyope izila zyache izyakubukila kuchisu icha bafwe.

¹⁹ Ataliko nayumoyumo yuyo akubuka kukwache akunyokako, pamo ukuyagha izila iyakubukila ku bumi.

²⁰ Po wendaye muzila izya bantu abiza nukukonka izila iya bagholosu.

²¹ Pakuti abagholosu bo babo bakwiza pakwikalagha muchisu, sona babo bate nakalema nakamokamo bakwiza pakwikalagha mulamula,

²² loli u Chala akwiza pakubefyamo ababibi muchisu chilachila, sona abantu babo te basubiliwa bakwiza pakunyunkuliwamo.