Ivyili 19 - IBAYIBOLO 2024

¹ Chizapo pakuba mupina yuyo akwenda mubugholosu, nukuchila pakuba nu mupunganu yuyo akunena ivyamwalwemwalwe.

² Te chiza ukuti umuntu abanje nu lweke bo ate na mahala, pamo ukwenda lubilolubilo nukupulumpa.

³ Ubupunganu ubwa muntu bukubunangannya ubumi bwache, pope bulo umoyo wache ghukumukalali u Mwene.

⁴ Ubukabi bukubitizya abakulya nabo abinji, loli umupina ate na bamanyani.

⁵ Ukaboni umumyasi akwiza pakufundiwa, sona akunena ubumyasi atangapona ulufundo.

⁶ Abinji bakulonda pakuba bamanyani aba muntu umumanyikwe, sona umuntu wesi akulonda pakuba mumanyani uwa muntu umupi.

⁷ Nanti umuntu umupina akubengiwa na bakamu bache bosi, po zingaba bulibuli na bamanyani bache? Abene po bakwiza pakumuchimbila nukubuka kubutali.

⁸ Umuntu yuyo aghaghanite amahala kokuti abughanite ubumi bwache, sona yuyo akwivwisya ivintu, ivintu vyache vikumwendelagha akiza.

⁹ Ukaboni umumyasi naloli akwiza pakufundiwa, sona wepe umwendanato akwiza pakufundiwa.

¹⁰ Nanti umupunganu chitakumuyana pakwikala nubumi ubwakwilagha, po zingaba bulibuli nu muzya pakubalaghila abamwene.

¹¹ Amahala ghakumupela umuntu pakuba mufisalyoyo, ubuchindamu bwache bughonite pakusita kubikilapo umoyo pa zizyo umuntu amukalalizizye.

¹² Ubukali ubwa mwene buli ngati ko kubuluma ukwa nkalamu, loli ichisa chache chili ngati yo nganda pisote.

¹³ Umwana umupunganu akumuvulazya uwise, sona umukolo uwa pamulomo ayanite bulo ni chisonje chicho chikutonya.

¹⁴ Inyumba nu bukabi yo mpyana yiyo abapapi bakuyilekagha, loli umukolo uwamahala akufuma kwa Mwene.

¹⁵ Ubukata bukumughoneka umuntu utulo utwa bufwe sona umukata akutamiwanga nizala.

¹⁶ Umuntu yuyo akwivwila amalamulo akubusungilila ubumi bwache, loli yuyo akughasulannya amalamulo akwiza pakufwa.

¹⁷ Umuntu yuyo akumupelela ichisa umupina akumwazimya u Mwene sona akwiza pakumupa umuvwalo ukuyana ni mbombo zyache inyiza.

¹⁸ Umupanje amafundwe umwana wako bo achili mwana umunandi, nanti utakubomba bunubu kokuti ukumunanga.

¹⁹ Umuntu umukali afundiwanje, nanti ukumupoka, kokuti ukwiza pakuchibomba sona.

²⁰ Teghelezya zizyo bakukulingannya sona ubupokele ubumanyisi, po pabumalilo pache ukwiza pakuba we wamahala.

²¹ Umuntu angabatika inyinji nkani mumoyo wache, loli ubwighane ubwa Mwene bo bubo bukukwanilisiwanga.

²² Chicho chikulondiwa mumuntu bo busubiliwa, chizapo pakuba mupina nukuchila pakuba we mumyasi.

²³ Ukumunyila u Mwene kukumupanga umuntu ubumi, akufwasagha sona ichibibi chitangamupalamasyapo.

²⁴ Nanti umuntu umukata injizya inyobe mumbale, akupotwa pakuyifisya kumulomu wache.

²⁵ Nanti wamukoma umuntu uwalobezyo kokuti akumanyilapo amahala, umuchemelaye umuntu yuyo ate na mahala po akwiza pakumanyilapo zimo.

²⁶ Umwana yuyo akumutamya uwise pamo ukumuchimbizya unyina, akwikozya mwene isoni.

²⁷ Wee mwana wane, nanti ukuchisulannya ichimanyisyo chane, ukwiza pakwepukako kumazyu agha mahala.

²⁸ Ukaboni umubibi akunyongannya ubwanaloli, sona ichakulya icha mupunganu bo bubibi.

²⁹ Ukunanganika kukumulindililagha umuntu uwalobezyo, sona indisa yikulindagha po panyuma iya mupunganu.