Ivyili 17 - IBAYIBOLO 2024

¹ Chizapo pakulya ubwika ubumizu papo pali umutende, ukuchila pakuba nu lusekelo munyumba mumo muli ivyongo.

² Umuzya uwamahala akumulaghila umwana uwa mwene yuyo mukozya soni, sona akupyana ichilingo pakasi pa bawamwabo.

³ Umoto gho ghugho ghukusunguluzya usiliva nu golide, loli u Mwene weyuyo akughupima umoyo uwa muntu.

⁴ Umuntu umubibi akwivwila zizyo umuntu umubibi akumubuzya, umumyasi wepe akuteghelezya nkani zizyo abamyasi bakunena.

⁵ Umuntu yuyo akumobezya umupina, kokuti akumusamula Umupeli wache, umuntu yuyo akuhoboka nanti intamyo zyawa, akwiza pakufundiwa.

⁶ Abizukulu yo mpumpu iya muntu umughosi, sona abapapi bo buchindamu ubwa bana.

⁷ Nanti akanenele akiza katakumuyana umupunganu, po vingaba bulibuli na mazyu amazimbuli aghakufuma mumulomo uwa mulaghili?

⁸ Amabeko ghali ngati mulembo walusako ku yuyo akupa ukwinong'ona ukuti ivintu vikumwendelagha akiza kosi kuko akubuka.

⁹ Umuntu yuyo akumuhobokela uwamwabo kokuti akulonda ulughano, loli yuyo akusunga ivyakusingo akubalumannya abamanyani.

¹⁰ Umuntu uwamahala akwivwa lyoka nanti akuchemeliwa, ukuchila indisa 100 zizyo bakumukoma nazyo umupunganu.

¹¹ Umuntu umubibi akulonda ko kumusambukila u Chala, loli intumi iya bufwe yikwiza pakumupelelagha intamyo akabalilo kosi.

¹² Chizapo pakukomana nu labwe yuyo bamufyula abana nukuchila pakukomana nu mupunganu yuyo akubomba ivyabupunganu.

¹³ Nanti umuntu akutanizya ububibi pa bwiza, ububibi butakwiza pakwepaghamo nalumo munyumba yache.

¹⁴ Ukunyamusya ivyongo kuli ngati ko kwighula amizi pachiziba, po chiza pakukanizya ivyongo bo vichili nukusata.

¹⁵ Ukudumula umuntu uwa nongwa ukuti ate ninongwa, sona ukudumula yuyo ate ninongwa ukuti ali ninongwa, u Mwene avibengite vyosi vibili vinivi.

¹⁶ Nkimba choni chicho munyobe izya mupunganu mubanje indalama, bo atakughanyonnywa amahala?

¹⁷ Umumanyani wako weyuyo akughanite akabalilo kosi, sona uwamwinyu akapapiwa ukuti akwavwanje muntamyo.

¹⁸ Umuntu umupunganu akubika ichikole, sona akuba we kaboni uwa mupalamani wache.

¹⁹ Umuntu yuyo avighanite ivyongo, kokuti azighanite imbibi, umuntu uwa mituvyo akwilondela mwene intamyo.

²⁰ Umuntu uwa nyinong'ono inyonganu ivintu vitakumwendelagha akiza, umuntu yuyo muzimbuli akwinjila muntamyo.

²¹ Umwana umupunganu akumupelela uwise ichitima, sona uwise uwa mwana umupunganu atakuhoboka nalumo.

²² Umoyo umusangalusu ghuli ngati gho mulembo, loli umoyo uwa chitima ghukupyola umuzimu.

²³ Umuntu umubibi akupokela amabeko kubusyefu, ukuti abunyongannye ubwanaloli panongwa.

²⁴ Umuntu uwakwivwisya ivintu akubika inyinong'ono kumahala, loli umupunganu akwembezya bulo amaso ghache pachisu chosi.

²⁵ Umwana umupunganu akumupelela uwise ichitima sona akughuvulazya umoyo uwa nyina yuyo amupapite.

²⁶ Te chiza pakumufunda umuntu umusita nongwa, pamo ukubakoma abantu abiza.

²⁷ Umuntu uwamahala atakunena ivintu mwalwemwalwe, sona umuntu uwakwivwisya ivintu atakukalala mwalwemwalwe.

²⁸ Wepe umupunganu abantu bakumupima ngati po wamahala nanti akuba bulo myee, sona wakwivwisya ivintu nanti atakunena mwalwemwalwe.