Ivyili 16 - IBAYIBOLO 2024

¹ Umuntu angabatika ivintu mumoyo wache, loli ukwamula ukwenecho kukufuma kwa Mwene.

² Inkalo zyosi izya muntu zikuboneka nyiza kukwache, loli u Mwene weyuyo akuzipima inyinong'ono izya muntu.

³ Bika imbombo zyako munyobe izya Mwene, po imbatiko zyako zikwiza pakukwanilisiwanga.

⁴ Chosi chicho u Mwene achipelite chili nu bumalilo bwache, po ubumalilo ubwa muntu umubibi ko kunanganika.

⁵ U Mwene ababengite abantu abamituvyo, po naloli bakwiza pakufundiwa.

⁶ Pachifukwa icha kwiyiyipa nu busubiliwa, imbibi izya muntu zikuhobokeliwanga, sona pachifukwa ichakumuchindika u Mwene umuntu akuzileghukagha imbibi.

⁷ Nanti inkalo iya muntu yikumuhobosya u Mwene, bope abalwani bache bakuba nawe mumutende.

⁸ Chizapo pakuba navyo vinandi vivyo wavyaghila mubwanaloli ukuchila pakuba nu bukabi ubwakubwaghila mubuzimbuli.

⁹ Umoyo uwa muntu ghukwinong'ona izyakubomba, loli u Mwene weyuyo akukalongozya akendele kache kosi.

¹⁰ U mwene akunena bulo vivyo u Mwene adumula po umulomo wache ghutakabunyongannye ubwanaloli.

¹¹ U Mwene avibengite ivipimilo ivyabumyasi, weyuyo akupima ubung'wamu bosi bubo buli munyambi.

¹² Abamwene bakubengite ukubomba imbibi pakuti ubwanaloli bo bubo bukuchikazya ichitengo.

¹³ Amazyu aghanaloli ghakumuhobosyanga u mwene, sona amughanite umuntu yuyo akunenagha ubwanaloli.

¹⁴ Ubukali ubwa mwene yo ntumi iya bufwe, loli umuntu uwamahala weyuyo akubwisya ubukali bulabula.

¹⁵ Bo icheni icha mwene chikulama kokuti mulimo ubumi, sona ichisa chache chili ngati mabingu agha vula pachisiku.

¹⁶ Chizapo pakuba na mahala ukuchila pakuba nu golide, sona chizapo pakuba muntu uwakwivwisya ivintu ukuchila pakuba nu siliva.

¹⁷ Izila iya muntu umugholosu yikuzileghuka imbibi, yuyo akwisungilila mukendele kache, akubusungilila ubumi bwache.

¹⁸ Amituvyo ghakumunanga umuntu, sona ukwitutumula kukumuwisya umuntu.

¹⁹ Chizapo pakuba muntu uwakwiyisya pakasi pa bapina, ukuchila ukugabana ubukabi na bantu abamituvyo.

²⁰ Umuntu yuyo akwivwila vivyo abanji bakumubuzya, ivintu vikumwendelagha akiza. Musayiwa umuntu yuyo akumusubila u Mwene.

²¹ Umuntu uwamahala akumanyikwa nukwivwisya kwache ivintu, sona akanenele akiza kamenye pakubadeba abantu.

²² Amahala yo mbwibwi iya bumi ku muntu yuyo ali nagho, loli ubupunganu lo lufundo ulwa mupunganu.

²³ Umuntu uwamahala akuchebagha na kanenele kache, sona akanenele kache kakufumusyanga ivintu ivya mahala.

²⁴ Akanenele akiza kali ngati chitenga icha buchi kakunona nkani mumoyo sona kakughupa umubili amaka.

²⁵ Yilipo izila yimo yiyo yikuboneka nyiza ku bantu, loli ubumalilo bwache bo bufwe.

²⁶ Umuntu uwa zala akwiyula pambombo, izala yo yiyo yikumufyenga ukuti abombaye imbombo.

²⁷ Umulovwa akubatikagha ububibi, sona akanenele kache kali ngati moto uwakulungulizya.

²⁸ Umuntu umubibi akupelagha bulo ivyongo, sona umuntu uwa iyebo akubalumannya abamanyani.

²⁹ Umuntu uwalombwa akumusovyanga umupalamani wache, sona akumulongozezya muzila imbibi.

³⁰ Umuntu yuyo akusinizya na maso kokuti akubatika ububibi, sona yuyo akwighalila umulomo wache, akwitikizya ukuti ububibi bubombiwanje.

³¹ Ivwi yo mpumpu iya buchindamu, sona gho muvwalo uwa muntu umugholosu.

³² Chizapo pakuba mufisalyoyo nukuchila pakuba musilikali uwamaka, yuyo akukafyula akaya akakulu nkani nukuchila umusilikali yuyo akukafyula akaya akakulu nkani.

³³ Abantu bakubomba amayele muvikufi loli ubudumulilo bo bwa Mwene umwenecho.