Ivyili 15 - IBAYIBOLO 2024

¹ Ukwamulila mubufisalyoyo kukuzimya ubukali, loli ukwamula mwalwemwalwe kukunyamusya ubukali.

² Amazyu agha muntu uwamahala ghakumupanga umuntu amahala, loli umulomo uwa mupunganu ghukunenagha zyo ntuko.

³ Amaso agha Mwene ghakwennya posi na posi, ghakubenelezya ababibi na biza bulo.

⁴ Akanenele akiza kakuba ngati lyo likwi ilya bumi, loli amazyu amazimbuli ghakughuvulazya umoyo uwa muntu.

⁵ Umupunganu akughasulannya amafundwe agha wise, loli umuntu uwamahala akwivwila nanti akuchemeliwa.

⁶ Munyumba iya muntu umugholosu mukubangamo ubukabi ubwinji nkani, loli ubukabi ubwa muntu umubibi bukumwisizya intamyo.

⁷ Umulomo uwa muntu uwamahala ghukufumusyanga amahala, loli te momumo zibeleye nu mupunganu.

⁸ U Mwene achibengite ichakwiyipa icha muntu umubibi, loli ulwiputo ulwa muntu umugholosu lukumuhobosyanga.

⁹ U Mwene azibengite imbombo izya muntu umubibi, loli amughanite yuyo akubomba ubwanaloli.

¹⁰ Umuntu yuyo akuyikana izila ingolosu akufundiwanga, umuntu yuyo akubengite ukuchemeliwa akufwanga.

¹¹ Nanti ubufwe nukunanganika vili pabuzelu bulo pamaso pa Mwene, po zingaba bulibuli nu moyo uwa muntu?

¹² Umuntu uwalobezyo atakulonda pakuchemeliwa, sona atakumubuzikizya umuntu uwamahala.

¹³ Nanti umoyo ghukuhoboka, chope icheni chikuhobokagha, loli umoyo uwa chitima ghukughuvulazya umuzimu.

¹⁴ Umuntu uwakwivwisya ivintu akughalondagha amahala, loli umulomo uwa mupunganu ghukunenagha bo bupunganu.

¹⁵ Amasiku ghosi agha muntu umupina ghakuba mapalapala, loli ubumi ubwa muntu umuhobosu bukuba lusekelo.

¹⁶ Chizapo pakuba mupina nukumuchindika u Mwene ukuchila pakuba we mukabi nukuba mumayimba.

¹⁷ Chizapo pakulya izya mani papo pali ulughano, ukuchila pakulya inyama papo pali ulubengo.

¹⁸ Umuntu uwakukalala mwalwemwalwe akunyamusyanga ivyongo, loli umufisalyoyo akupela umutende.

¹⁹ Izila iya muntu umukata yizuye na mivwa, loli izila iya muntu umugholosu gho musebo umukulu.

²⁰ Umwana uwamahala akumuhobosyanga uwise, loli umwana umupunganu akumusamula unyina.

²¹ Umupunganu akuhobokagha nu bupunganu bwache, loli umuntu uwakwivwisya ivintu akwenda muzila ingolosu.

²² Imbatiko zitakukwanilisiwanga nanti amahala naghamo, loli nanti abakukulingannya amahala binji, imbatiko zikukwanilisiwanga.

²³ Umuntu akuhobokagha nanti wamwamula akiza, amazyu ghagho ghakuneniwanga pakabalilo kache ghakunona nkani.

²⁴ Umuntu uwamahala akwenda muzila iya kubumi, umwakuti atakinjilaye mwipumpa.

²⁵ U Mwene akuyimongolannya inyumba iya muntu uwa mituvyo, loli akuyenelezya impaka izya mukolo umufwilwe.

²⁶ U Mwene azibengite inyinong'ono izya muntu umubibi, loli amazyu agha muntu umwiza ghakumuhobosyanga.

²⁷ Umupafu akubitizizya abamunyumba yache intamyo, loli yuyo aghabengite amabeko akuba nubumi.

²⁸ Umuntu umwiza akwinong'ona tasi namumo angamulila, loli umuntu umubibi akunenagha bulo mwalwemwalwe.

²⁹ U Mwene akuba kubutali nu muntu umubibi, loli akwivwa ulwiputo ulwa muntu umugholosu.

³⁰ Icheni ichakusangaluka chikughuhobosya umoyo uwa muntu, sona akanenele akiza kakughupozya umubili.

³¹ Umuntu yuyo akutegha amakutu kumafundwe, akwikalagha mukabukatila aka bantu abamahala.

³² Umuntu yuyo akughasulannya amafundwe akwisamula mwene, loli wesi yuyo akwivwila nanti akuchemeliwa, akuba wakwivwisya ivintu.

³³ Ukumunyila u Mwene kukumumanyisya amahala umuntu, sona umuchizi ghukwizagha nanti umuntu akwiyisya mwene.