Ivyili 14 - IBAYIBOLO 2024

¹ Umukolo uwamahala akuzenga inyumba yache, loli umupunganu akuyimongolannya ni nyobe zyache.

² Umuntu yuyo akwenda muzila ingolosu akumuchindika u Mwene loli yuyo akwenda muzila inyonganu akumusamula u Mwene.

³ Amazyu agha mupunganu yo ndisa yiyo yikumukoma umwenecho, loli amazyu agha muntu uwamahala ghakumupoka.

⁴ Kuko kute inkambaku izyakulimila, zyope intamba zitakubangako, loli nanti inkambaku ziliko, zyope intamba zikuba nyizule.

⁵ Ukaboni umusubiliwa atakutamanta, loli ukaboni umuzimbuli akunenagha bo bumyasi.

⁶ Umuntu uwalobezyo akulonda amahala loli atakughagha, amahala ghakwizagha ku muntu uwakwivwisya ivintu.

⁷ Umuleghukaye umupunganu, pakuti atangakumanyisya amahala naghamoghamo.

⁸ Amahala agha muntu umuchevu ghakumwighula umuntu amaso, loli ubupunganu bukumuzimbula umuntu umupunganu.

⁹ Umupunganu atakupasyanga napapo ananga, loli abagholosu bakulondelanagha ubwiza.

¹⁰ Umoyo ghuzimenye zizyo zikumubaba umuntu, po atalipo nayumoyumo yuyo angagabana ukuhoboka kwache nu muntu uyunji.

¹¹ Inyumba iya muntu umubibi yikunanganika, loli ichisakasa icha muntu umugholosu chikwikalana.

¹² Yilipo izila yiyo yikuboneka ngati nyiza ku muntu, loli ubumalilo bwache bo bufwe.

¹³ Napapo umuntu angaseka loli mumoyo muli ichitima sona ubumalilo ubwa buhobosu bungaba cho chitima.

¹⁴ Umuntu umubibi akupokelagha umuvwalo ukuyana ni nkalo yache, loli umuntu umwiza akupokelagha umuvwalo ukuyana ni mbombo zyache.

¹⁵ Umupunganu akusubilagha vyosi bulo, loli umuntu uwamahala achebite na kendele kache.

¹⁶ Umuntu uwamahala akumuchindika u Mwene, nukubuleghuka ububibi, loli umupunganu akudebukila bulo ivintu mwalwemwalwe.

¹⁷ Umuntu yuyo akukalala mwalwemwalwe akubomba izya bupunganu, loli umuzimbuli abantu bakumubengagha.

¹⁸ Umupunganu akupyanagha ubupunganu, loli umuchevu bakumuvwika impumpu iya mahala.

¹⁹ Abantu ababibi bakubafughamilila abantu abiza, sona abantu ababibi bakufughama pamilyango iya bantu abagholosu.

²⁰ Umupina akubengiwa nu mupalamani wache bulo, loli abakabi bali na bamanyani abinji.

²¹ Umuntu yuyo akumusamula umupalamani wache, kokuti akunanga, loli musayiwa umuntu yuyo akubavwa abapotwe.

²² Umuntu yuyo akubatikagha ububibi, akunanga, loli yuyo akwinong'onagha pakubomba inyiza, abantu bakumughana nukumupelela ichisa.

²³ Umuntu akupokelagha umuvwalo nanti akwiyula pambombo, loli ukunenanena bulo kukumupelela umuntu ubupina.

²⁴ Ubukabi ubwa muntu uwamahala yo mpumpu yache, loli umupunganu akumanyikwa nu bupunganu bwache.

²⁵ Ukaboni umusubiliwa akubupoka ubumi, loli ukaboni umumyasi mughoghi.

²⁶ Umuntu yuyo akumuchindikagha u Mwene, ali nu lusubilo ulwenecho, sona abana bache bakuba na pakuponela.

²⁷ Ukumunyila u Mwene ko mbwibwi iya bumi kuko kukumupoka umuntu kuchipingo icha bufwe.

²⁸ Ubwinji ubwa bantu bo buchindamu ubwa mwene, loli nanti abantu nabamo, ubumwene bwache bute ni mbombo.

²⁹ Umuntu umufisalyoyo weyuyo akwivwisya ivintu, loli yuyo akukalala mwalwemwalwe akulanjizya pabuzelu ubupunganu bwache.

³⁰ Umoyo uwakufwasa ghukumupa umuntu ubumi ubwiza, loli akabini kakubozya amafupa.

³¹ Umuntu yuyo akubayivya abapina, kokuti akumusamula Umupeli wache. Loli yuyo akubapelela ichisa abapotwe, kokuti akumuchindika u Chala.

³² Umuntu umubibi akunangika pachifukwa icha bubibi bwache, loli umuntu umugholosu akuba na pakuponela napapo angafwa.

³³ Amahala ghakwikala mumoyo uwa muntu uwakwivwisya ivintu, loli mumoyo uwa mupunganu ghatakwikalaghamo.

³⁴ Ubwanaloli bukulukwezya uluko ulwa bantu, loli imbibi zikubakozya isoni abantu.

³⁵ Uwambombo uwamahala akumuhobosya u mwene wache, loli ubukali bwache bukulinda po pa wambombo umukozya isoni.