Ivyili 13 - IBAYIBOLO 2024

¹ Umwana uwamahala akwivwilagha zizyo uwise akumubuzya, loli umwana uwa misulo akughasulannya amafundwe.

² Umuntu umwiza akulyanga ivikomwa ivya mazyu ghache amiza, loli umuzimbuli akulonda bulo ivyongo.

³ Umuntu yuyo akwilema mukanenele kache akubusungilila ubumi bwache, loli yuyo akunenagha mwalwemwalwe, akwinanga mwene.

⁴ Umukata akunyonywanga bulo ivintu, napapo atakuvyagha, loli vivyo umuntu uwalweke akuvinyonywa, akuvyagha vyosi.

⁵ Umuntu umugholosu abubengite ubumyasi, loli imbombo izya muntu umubibi, zyakukozya isoni.

⁶ Ubwanaloli bukumupokagha umuntu umwiza, loli ububibi bukumunanga umuntu uwa mbibi.

⁷ Umuntu yumo akwipimagha pakuba mukabi, napapo ate nako nakamokamo, bo uyunji akwipima pakuba mupina, loli ali nu bukabi nkani.

⁸ Ubukabi ubwa muntu bungabutabula ubumi bwache, loli umupina atakunyilagha nachimochimo.

⁹ Ulukozyo ulwa muntu umugholosu lukulamagha nkani, loli inyale iya muntu umubibi yikuzimagha.

¹⁰ Amituvyo ghakupelagha bulo ivyongo, loli babo bakwivwilagha zizyo abanji bakubabuzya bali na mahala.

¹¹ Ubukabi ubwakubwaghila umwalubilolubilo bukumala panandipanandi, loli yuyo akubwaghila muntamyo bukukulilakulila.

¹² Nanti chicho umuntu akuchilindilila chapotwa, amaka ghakumuwilagha, loli nanti chicho umuntu achilindililagha chabombiwa, chikuba ngati lyo likwi ilya bumi.

¹³ Umuntu yuyo akuzisulannya zizyo abanji bakumubuzya, akwiza pakunangika, loli yuyo akughivwila amalamulo, akupokela umuvwalo.

¹⁴ Ichimanyisyo icha muntu uwamahala yo mbwibwi iya bumi, sona chikubapokagha abanji kuchipingo icha bufwe.

¹⁵ Abantu bakuhobokagha nu muntu uwamahala, loli izila iya muntu yuyo ate na mahala mpalapala.

¹⁶ Umuntu uwamahala akubombagha ivintu umwamahala, loli umupunganu akwilanjizya pabuzelu ubupunganu bwache.

¹⁷ Intumi imbibi yikubinjizya abantu muntamyo, loli intumi insubiliwa yikupelagha umutende.

¹⁸ Umuntu yuyo akughasulannya amafundwe akuba mupina sona mukozya isoni, loli yuyo akwivwila zizyo abanji bakumubuzya, akuchindikiwanga.

¹⁹ Nanti chicho umuntu akuchilonda chabombiwa chikughusangalusya umoyo, loli abapunganu bakukana pakuzileka imbibi.

²⁰ Umuntu yuyo akwenda nu muntu uwamahala, wepe akubanga wamahala, loli yuyo amanyanite nu mupunganu akwiza pakunangika.

²¹ Ichibibi chikumukonkagha umwenecho, loli umuntu umugholosu ivintu vyache vikumwendelagha akiza.

²² Umuntu umwiza akubalekelagha abizukulu bache ichilingo, loli umuntu umubibi akubalundikilagha ubukabi abantu abagholosu.

²³ Umughunda uwa mupina ghungaba ni chakulya nkani, loli abantu ababibi bakuchifyula ichakulya chilachila.

²⁴ Umupapi yuyo atakumusyempa umwana wache, kokuti amubengite, loli yuyo amughanite umwana wache akumupanga amafundwe.

²⁵ Umuntu umugholosu ali navyo ivyakukwana, loli umuntu umubibi akulindagha bulo nizala.