Ivyili 12 - IBAYIBOLO 2024

¹ Umuntu yuyo aghaghanite amafundwe, kokuti aghaghanite amahala, loli umuntu yuyo aghabengite amafundwe, kokuti mupunganu.

² Umuntu umwiza u Mwene, akuhoboka nawe, loli akumulonga umuntu yuyo akubatika pakubomba ububibi.

³ Umuntu atangikalana pakubomba ububibi, loli umuntu umugholosu atanganyunkuliwa.

⁴ Umukolo uwa nkalo inyiza yo mpumpu iya mulume wache, loli umukolo yuyo akumukozya isoni umulume, ali ngati chilonda icha mafila ku mulume.

⁵ Inyinong'ono izya muntu umugholosu zyanaloli, loli amahala agha muntu umubibi mazimbuli.

⁶ Amazyu agha muntu umubibi ghakughogha, loli amazyu agha muntu umugholosu ghakumupokagha.

⁷ Abantu ababibi bakunanganika nukuluviwa, loli inyumba iya muntu umugholosu yikwikalana.

⁸ Umuntu akupaliwanga ukuyana na mahala ghache, loli umuntu uwa nyinong'ono inyonganu akusamuliwanga.

⁹ Chizapo ukuba muntu bulo nukuba nu wambombo weka, ukuchila pakwipima pakuba ngati po we muntu uwapamwanya, loli bo ute ni chakulya.

¹⁰ Umuntu umugholosu akuvipasikizya ivitekwa vyache, loli umuntu umubibi ate ni chisa nachimochimo.

¹¹ Umuntu yuyo akulima umughunda wache akuba ni vyakulya ivyinji, loli umuntu yuyo akwilagha bulo nubumi mupunganu.

¹² Umuntu umubibi akuvinyonywa vivyo umuntu umubibi akwiba, loli amagululuzi agha muntu umugholosu ghakwikalana.

¹³ Amazyu amabibi cho chipingo icha muntu umubibi, loli umuntu umugholosu akuponagha intamyo.

¹⁴ Akanenele akiza gho muvwalo uwa muntu, ngati mumo zibeleye imbombo zyache inyiza.

¹⁵ Imbombo izya mupunganu zikubonekagha nyiza kukwache, loli umuntu uwamahala akwivwila zizyo abanji bakumubuzya.

¹⁶ Ubukali ubwa mupunganu bukumanyikwanga lubilolubilo, loli umuntu uwamahala akuzisulannya intuko.

¹⁷ Ukaboni uwanaloli akubikila ubwakaboni ubwanaloli, loli ukaboni umumyasi akutamantagha bulo.

¹⁸ Amazyu aghamwalwemwalwe ghakulasa ngati yo mpalala, loli amazyu agha muntu uwamahala ghakupozya.

¹⁹ Amazyu aghanaloli ghakubangako bwila na bwila, loli ubumyasi bukubangako pakabalilo akapimpa bulo.

²⁰ Mumoyo uwa bantu babo bakubatika ububibi, mukuba ubumyasi, loli abantu babo bakwinong'ona nizya mutende bakuhobokagha.

²¹ Nazimozimo intamyo zizyo zikumuwila umuntu umugholosu, loli umuntu umubibi akukomanagha nintamyo bwila.

²² U Mwene aghubengite umulomo uwabumyasi, loli akuhobokagha na bantu babo bakubombela mubwanaloli.

²³ Umuntu uwamahala akufisagha amahala ghache, loli umupunganu akwilanjizya pabuzelu ubupunganu bwache.

²⁴ Umuntu walweke akwiza pakulaghilagha, loli umukata akuba muzya.

²⁵ Ichitima chikuba ngati we katundu umung'wamu mumoyo uwa muntu, loli akanenele akiza kakumusangalusya.

²⁶ Umuntu umugholosu akumulongozya umupalamani wache, loli izila iya muntu umubibi yikumusovya.

²⁷ Abantu abakata batakuvyaghamo vivyo bakuvilonda, loli abantu abalweke bakubwagha ubukabi.

²⁸ Izila iyanaloli yikumulongozezya umuntu kubumi, loli izila imbibi yikumulongozezya kubufwe.