Ivyili 11 - IBAYIBOLO 2024

¹ U Mwene avibengite ivipimilo ivyabumyasi, loli ivipimilo ivyanaloli vikumuhobosya.

² Nanti umuntu anda pakwikwezya, kokuti akwiza pakukoziwa isoni. Loli nanti umuntu akwiyisya, kokuti ali na mahala.

³ Ubusubiliwa bukubalongozya abantu abagholosu, loli abantu babo te basubiliwa bakunangika pachifukwa icha bumyasi bwabo.

⁴ Ubukabi butangamwavwa umuntu pisiku ilya bulongi, loli ubwanaloli bukumupoka umuntu kubufwe.

⁵ Ubugholosu ubwa muntu yuyo ate ni chilema bukumulongozezya kuzila ingolosu, loli ububibi bukumuwisyanga umuntu umubibi.

⁶ Umuntu umugholosu akupokiwa pachifukwa icha bugholosu bwache, loli ivinyonywa ivibibi vikubategha abantu babo bate basubiliwa.

⁷ Nanti umuntu umubibi afwa, ulusubilo lwache lukumalila palapala, sona vyosi vivyo avisubilagha mumaka ghache vikuba mintu yabulo.

⁸ Umuntu umugholosu akupokiwa kuntamyo, po mubuzilo bwache intamyo zilazila zikumuwila umuntu umubibi.

⁹ Na mazyu ghache umuntu yuyo atakumuchindika u Chala, akumupunuzya umupalamani wache, loli abantu abagholosu bakupona pachifukwa icha mahala.

¹⁰ Akaya akakulu nkani kakuhoboka, nanti ivintu vikubendela akiza abagholosu. Nanti umuntu umubibi afwa, abantu bakukolomoka pachifukwa icha buhobosu.

¹¹ Akaya akakulu nkani kakuchindikiwa nanti abagholosu bakukasaya loli katakunanganika na mazyu agha bantu ababibi.

¹² Umuntu yuyo akumusamula umupalamani wache ate na mahala, loli umuntu yuyo akwivwisya akuba bulo myee.

¹³ Umuntu yuyo akubayeba abamwabo akuvumbula izyakubusyefu, loli umuntu umusubiliwa akuzifisa mumoyo wache.

¹⁴ Kuko kute amahala ichisu chikuwa, loli kuko kuli amahala, ghope umutende ghuliko.

¹⁵ Umuntu yuyo akuba we kaboni uwa yunji akuwilagha muntamyo, loli yuyo achibengite ichikole akuba mumutende.

¹⁶ Umukolo uwa nkalo inyiza akuchindikiwanga, loli umwanavuli umukali akwibunganikila bulo ubukabi.

¹⁷ Umuntu uwachisa akupokela ivintu ivyiza, loli umukali akwiwisizya mwene intamyo.

¹⁸ Umuntu umubibi akuzimbuliwanga bwila na bwila, loli yuyo akupesa ubugholosu akupokelagha umuvwalo uwenecho.

¹⁹ Umuntu yuyo abughanite ubwanaloli, akuba nubumi, loli yuyo akuchimbilila pakubomba ububibi, akufwanga.

²⁰ U Mwene ababengite abantu aba moyo amabibi, loli akuhobokagha na babo bali ni nkalo inyiza.

²¹ Naloli abantu ababibi batakupona ulufundo, loli abagholosu bakwiza pakupona.

²² Ngati yo mpete iya golide mumpuno iya ngulube momumo abeleye umukolo uwakuboneka akiza, loli ate na mahala.

²³ Ubumalilo ubwa chinyonywa icha muntu umugholosu bo bwiza, loli ulusubilo ulwa muntu umubibi lukumalilagha mubukali ubwa Chala.

²⁴ Umuntu yumo akupa mubwabuke, po akuba muntu umukabi. Uyunji mumama, loli pope bulo akuba mupina.

²⁵ Umupi ivintu vikwiza pakumwendelagha akiza, umuntu yuyo akubasangalusya abanji, wepe akwiza pakusangalusiwanga.

²⁶ Abantu bakumughunagha umuntu yuyo akufisa ichakulya ukuti akabilayepo, loli bakumusaya yuyo akughulizya ichakulya pakabalilo kache.

²⁷ Umuntu yuyo akubulondelezya ubwiza, akuvyagha ivintu ivyiza, loli ububibi bukumukonka umuntu yuyo akubulonda.

²⁸ Umuntu yuyo akubusubila ubukabi bwache, akwiza pakufoka, loli umuntu umugholosu akwiza pakulemba ngati mani amateta.

²⁹ Umuntu yuyo akubapelela intamyo abamunyumba yache akuwilagha muntamyo, sona umupunganu akuba wambombo uwa muntu uwamahala.

³⁰ Inkalo inyiza yili ngati likwi ilipela bumi, loli ivyongo vikughogha.

³¹ Umuntu umugholosu akupokelagha umuvwalo pachisu ichapasi, loli umuntu umubibi akupokelagha ulufundo.