Ivyili 10 - IBAYIBOLO 2024

Ivyili ivya Solomoni

¹ Ivi vyo vyili ivya Solomoni. Umwana uwamahala akumuhobosya uwise, loli umwana umupunganu akumupelela ichitima unyina.

² Ubukabi ubwa buzimbuli butakumupela umuntu pakuba mukabi, loli ubwanaloli bukumupoka umuntu kubufwe.

³ U Mwene atakwitikizya ukuti umugholosu abanje nizala, loli akumwima umuntu umubibi vivyo akuvinyonywa.

⁴ Umuntu umukata akwiyitizizya mwene ubupina, loli inyobe izyakwiyula zikumupela umuntu pakuba mukabi.

⁵ Umwana yuyo akwinula pachisanya wamahala, loli yuyo akulinda pakughona pakabalilo aka kwinula akukozya isoni.

⁶ Ulusayo lukuba pa bagholosu, loli ivyongo vikulindagha pamilomo iya bantu ababibi.

⁷ Umuntu umugholosu akukumbukiwanga ngati lusayo, loli itabwa ilya muntu umubibi likwiza pakuba ngati chintu ichibozu.

⁸ Umuntu uwa mahala akwivwila amalamulo, loli umupunganu yuyo akunenanena bulo akunanganika.

⁹ Umuntu umugholosu akwikalagha umwakufwasa, loli yuyo akwenda muzila inyonganu akulemiwa.

¹⁰ Umuntu yuyo akumuzimbula uwamwabo pakusinizya na maso, akupela intamyo, sona umupunganu uwakunenanena bulo akupela ukunanganika.

¹¹ Umulomo uwa muntu umugholosu yo mbwibwi iya bumi, loli umulomo uwa muntu umubibi ghukupela bulo ivyongo.

¹² Ulubengo lukupela ivyongo, loli ulughano lukukupikila vyosi.

¹³ Pamulomo uwa muntu uwakwivwisya ivintu, pakuba amahala, loli indisa yikulinda panyuma iya muntu yuyo mupunganu.

¹⁴ Abamahala bakwilundikila amahala, loli pamulomo uwa mupunganu pakumupelela bulo ukunanganika.

¹⁵ Ubukabi ubwa muntu umukabi lyo lilinga lyache, loli ubupina ubwa muntu umupina bo bumalilo bwache.

¹⁶ Umuvwalo uwa mugholosu bo bumi bwache, loli amalipilo agha muntu umubibi lo lufundo.

¹⁷ Umuntu wesi yuyo akwivwila amafundwe akwenda muzila iya kubumi, loli wesi yuyo akughasulannya amafundwe akubasovya abanji.

¹⁸ Umuntu yuyo akufisa ulubengo mumyasi, sona wesi yuyo akuyebagha mupunganu.

¹⁹ Nanti amazyu ghaba minji, imbibi zyope zikuba palapala, loli muntu uwamahala akuchefya ukunenanena.

²⁰ Ululimi ulwa mugholosu we siliva umwiza, loli inyinong'ono izya muntu umubibi zyamwalwemwalwe.

²¹ Amazyu agha muntu umugholosu ghakubavwa abinji, loli abapunganu bakufwa pachifukwa ichakuti bate na mahala.

²² Ulusayo ulwa Mwene lo lulo lukupa ubukabi, sona atakonjelezyapo ichitima.

²³ Umupunganu akuhobokagha nanti akubomba ivintu ivibibi, loli muntu uwakwivwisya ivintu akuhobokagha na mahala.

²⁴ Chicho umuntu umubibi akuchinyilagha cho chicho chikumuwila, loli chicho umuntu umugholosu akuchinyonywanga, cho chicho akuchipokela.

²⁵ Bo ukankungu endapo, abantu ababibi bakupyeliwa kuko, loli abagholosu bakwima bwila na bwila.

²⁶ Ngati mumo uvinyo akubela mumino, sona ngati mumo ilyosi likubela mumaso, momumo abeleye umukata ku yuyo amutumite.

²⁷ Ukumunyila u Mwene kukonjelezya ubumi ubutali, loli amaka agha muntu umubibi ghakuba mapimpa.

²⁸ Ulusubilo ulwa bagholosu lukupelagha ubuhobosu, loli ulusubilo ulwa bantu ababibi lukuzimila bulo.

²⁹ U Mwene lyo lilinga ilya muntu umugholosu, loli akubanangannya babo bakubomba ububibi.

³⁰ Abagholosu batakunyunkuliwanga nalumolumo, loli ababibi batakwiza pakwikalamo muchisu.

³¹ Umulomo uwa muntu umugholosu ghukunenagha ivya mahala, loli ululimi ulwa muntu umumyasi lukwiza pakudumuliwa.

³² Umuntu umugholosu amenye zizyo abaghiye pakunena, loli umuntu umubibi akunenagha ivyamwalwemwalwe.