Ivyili 1 - IBAYIBOLO 2024

Ubwiza ubwa vyili

¹ Ivi vyo vyili ivya Solomoni umwana uwa Devedi, yuyo akaba we mwene uwamu Izilayeli.

² Ivyili vinivi vibamanyisyanje abantu amahala ni nkalo, nukwivwisya ubusanuzyi ubwa mazyu amapalapala.

³ Vibamanyisyanje sona inkalo inyiza na kikalile aka mahala pakubomba ingolosu, nukubombela mubwanaloli,

⁴ pakuti babo batamanyiye bapokelaye amahala, sona abalumendo bakwiza pakukaba ubumanyi ubwiza.

⁵ Nanti umuntu uwamahala aghivwa, onjelezyepo ubumanyi bwache, sona abantu abakwivwisya baghaghilepo amahala.

⁶ Abantu bivwisye ivyili ni vifwanikizyo, na mazyu agha bamanyi ni vyili vyabo.

⁷ Ukumunyila u Mwene bo bwandilo ubwa mahala, loli abapunganu bakughasulannya amahala na mafundwe.

Isoki nizya bangali ababibi

⁸ Wee mwana wane, ivwa zizyo ane ne ghuso nkukumanyisya sona utakazisulaye zizyo unyoko akukumanyisya.

⁹ Pakuti yo mpumpu iya kumutu wako, na mambo agha musingo yako.

¹⁰ Wee mwana wane, nanti abantu abambibi bakukudeba, utakabitikizyanje.

¹¹ Nanti bakuti, “Twende tubukaye poka. Zagha tuvwamililaye pakukupula ibanda ilya muntu, zagha tubavwamililaye abasita nongwa,

¹² zagha tumuzimizye bulo umumi ngati muntu yuyo asyiliwa, azimile chimyemye ngati muntu yuyo ali mwipumpa.

¹³ Po tukwiza pakuvyagha ivintu ivyakulekanalekana ivyamutengo nukwizuzya inyumba zyitu ni vintu ivyakufyula.

¹⁴ Zagha winjile mukabukatila kitu, tukwiza pakugabana nawe ivintu vivyo tukwiba.”

¹⁵ Wee mwana wane, utakabukaye poka nabo, utakachele pakukanya izila zizyo bakwendamo.

¹⁶ Pakuti ivinama vyabo vikuchimbilila kumbibi, sona bengo nkani pakubaghogha abantu.

¹⁷ Chintu ichabupunganu nkani nanti ukutegha ichipingo bo iviyuni vikukwennya.

¹⁸ Abantu banaba bakuvwamilila ibanda lyabo sona bakwivwamilila bene.

¹⁹ Ubu bo bumalilo ubwa bantu bosi babo bakubwagha ubukabi pachifukwa icha bwite, ubukabi bulabula bukubaghogha abenecho.

Isoki pachifukwa ichakukana amahala

²⁰ Amahala ghakwitizya mumisebo, ghakukolomoka muminalo.

²¹ Amahala ghakwitizya mumisebo, ghakunena amazyu pamilyango iya kaya akakulu nkani ghakuti.

²² “Mwee bapunganu, nkimba mukwiza pakuba mwe bapunganu mupaka liyi?” Mwee balobezyo, nkimba mukwiza pakuhoboka nu lobezyo lwinyu mupaka liyi sona mwee bapunganu, nkimba mukwiza pakughabenga amahala mupaka liyi?

²³ Nanti mwivwanga isoki zyane, ngali imbabuzizye inyinong'ono zyane, sona ngali imbamanyizizye amahala ghane.

²⁴ Loli pachifukwa ichakuti mukankana, bo nkubitizya sona mutakanyivwila, bo nagholosya inyobe yane ukuti imbavwe

²⁵ pakuti mukazisulannya zizyo nkabalingannyanga sona mukakana ukuti imbape amafundwe.

²⁶ Po nane nkwiza pakubaseka nanti intamyo zyabizila, nkwiza pakubobezya nanti amayimba ghabawila.

²⁷ Nkwiza pakubobezya nanti ubogha bwabagha ngati mpepo, nanti intamyo zyabizila ngati kankungu pamo nanti ukubaba nintamyo vyabizila.

²⁸ “Po bakwiza pakunyitizya, loli ntakwiza pakwamula, bakwiza pakundondelezya, loli batakwiza pakunyagha.”

²⁹ Pachifukwa ichakuti bakaghabenga amahala nukukana pakumunyila u Mwene,

³⁰ pakuti bakakana ukuti imbamanyisye sona nukuti imbape amafundwe,

³¹ po bakwiza pakulya ivikomwa ivya mbombo zyabo nukwikuta ni vintu vivyo bakabatika pakuvibomba.

³² Pakuti abapunganu bakunangika pachifukwa ichakuti bakunkana, sona bakwighogha bene pachifukwa icha mituvyo ghabo.

³³ Loli umuntu yuyo akunyivwila, akwiza pakwikalagha umwakufwasa, atakwiza pakufwa, sona atakwiza pakuba nubogha nabumobumo.