Inyimbo izya Solomoni 8 - IBAYIBOLO 2024

¹ Mwee, nalondagha nkani ngali waba we muyemba wane, yuyo inkonka nawe ibele lyoka! Po nanti nakwagha kuzi, ngali nakufyofyonta po ngali patakabapo nayumoyumo umuntu uwakunsamula.

² Ngali nakwinjizya munyumba iya mayi, muchipinda icha yuyo akampapa. Ngali nakupiye uvinyo umunoni ukuti ung'welaye, nukuti ung'welaye amizi agha manyele ghane.

³ Inyobe yache iyamongo yilemite kunkonto yane, sona anfukatiye ni nyobe yache indilo.

⁴ Mwee bakolo aba mu Yelusalemu, nkubalapizya ukuti, mutakaluneng'ennyanje pamo ukulunyamusya ulughano, mupaka papo lwalondela ulwenecho.

Abamanyani aba mukolo

⁵ Nkimba wenu yunuyu yuyo akufumila munkolongo, bo amweghamiye umughaniwa wache? Muntende mwikwi ilya manyele po papo nkakunyamusya, palapala unyoko akamela ulwanda, sona po papo ukapapiliwanga.

Umukolo

⁶ Umbikaye mumoyo wako ngati cho chidindo, sona ngati chidindo panyobe yako. Pakuti ulughano lwamaka ngati bo bufwe, sona ubuzuba bukalite umoyo ngati gho mapumpa. Ulughano lukwaka ngati moto sona luli ngati ndimi izya moto.

⁷ Napapo amizi ghangaba minji nkani loli ghatangamazya inyota iya lughano, sona zyope isoko izyakwizula zitangaluzimya. Napapo umuntu angabika ubukabi bwache bosi, pachifukwa icha lughano, pope bulo akwiza pakwisamula mwene.

Abayemba aba mukolo

⁸ Aswe tuli nawe umuyemba witu umunandi, sona achili atamelite amabele. Nkimba tumubombelaye choni umuyemba witu yunuyu nanti umwanavuli akwiza pakumuzingilila?

⁹ Nanti akabanga ngati lubumba, ngali twamuzengeye ichitembe icha siliva. Nanti akabanga ngati mulyango, ngali twamuzengeye ulupaso ulwa matabwa agha mwale.

Umukolo

¹⁰ Ane ne lubumba, sona amabele ghane ghali ngati chitembe. Po kukwache indi ngati ne muntu uwakumuhobosya.

Umwanavuli

¹¹ U Solomoni akaba nu mughunda uwa mampesya mu Baala Hamoni, po akabazimya abalimi umughunda ghula. Umulimi wesi akamulipila ivikomwa ivyakukwana isalabazya izya siliva 1,000.

¹² Loli umughunda wane uwa mampesya gho wane nu wane, po wee Solomoni, isalabazya izya siliva 1,000 zyo zyako, sona isalabazya izya siliva 200 zya balimi bala.

¹³ Awe we ukwikala mumughunda, abamanyani bane bakulonda bivwanje izyu lyako, po nyitikizya ukuti nane bulo indyivweko izyu lyako.

Umukolo

¹⁴ Wee mughaniwa wane, lubilo, sona ubanje ngati yo mbabala. Pamo ubanje ngati ko kana aka mpombo, kako kali pighamba papo pamelite utwakufukizya utwakununkila.