Inyimbo izya Solomoni 7 - IBAYIBOLO 2024

Umwanavuli

¹ Wee mulindu uwa chimwene, inyayo zyako zikuboneka akiza nkani, bo uvwalite inkwato. Intapatapa zyako zityelemukite akiza ngati mabwe aghamutengo, ghagho ghapangiwe nu fundi umwenecho.

² Inkuvu yako yibulunganite ngati lubako, lulo uvinyo atakumalamo nalumo. Umusana wako ghuli ngati muzigho uwa ngano, ghugho ghuzyunguliliwe nu bwezya.

³ Amabele ghako ghali ngati bo bampombo babili, ngati to tumapasa utwa mbabala.

⁴ Isingo yako yili ngati chitembe icha mpembe izya zovu. Amaso ghako ghali ngati vyo viziba ivya mu Heshiboni, ivya papipi nu mulyango uwa kaya akakulu aka Bati Labimu. Impuno yako yili ngati chitembe icha mu Lebanoni, yiyo yikwenannya nakaya akakulu nkani aka Damasika.

⁵ Umutu wako ghukuboneka pamwanya ngati lighamba ilya Kalimeli. Isisi zyako inchesamile, zikubadebula abamwene.

⁶ Wee mughaniwa wane, we wakuboneka akiza nkani, sona ukunhobosya nkani.

⁷ Umubili wako ghugholokite nkani ngati likwi ilya mabale, sona amabele ghako ghali ngati nkose izya seke.

⁸ Po nkati, “Nkwiza pakukwela mwikwi ilya mabale, nkwiza pakuyabamo ivikomwa vyache.” Amabele ghako ghabanje bulo ngati zyo nkose izya mampesya, ukununkila ukwa muyi wako kuli ngati munusi uwa manyele.

⁹ Umulomo wako ghuli ngati we vinyo umwiza nkani. Uvinyo yunuyu apunguliwanje pa mughaniwa wane, bo akwenda panandipanandi pamilomo yache, na mumino ghache.

Umukolo

¹⁰ Ane ne wache uwa mughaniwa wane, po ichinyonywa chache chili papane.

¹¹ Wee mughaniwa wane, twende tubukaye kuzi ukwa kaya, twende pakughona mutwaya pabusiku.

¹² Tulabile pandabindabi nkani tubuke kumaghunda pakwennya nanti amampesya ghanda pakulemba, sona nanti ghanda pakubazya. Twende pakwennya nanti amanyele ghanda pakubazya, kulakula nkwiza pakukulanjizya ulughano lwane.

¹³ Ikwi ilya mulembo uwa mpapo likufumyanga umunusi umwiza nkani, sona pakaya kitu pali ivikomwa ivyiza ivyakulekanalekana. Vilipo ivyakale ni mpya bulo, vizyo nkusungiye awe, wee mughaniwa wane.