Inyimbo izya Solomoni 6 - IBAYIBOLO 2024

Abamanyani

¹ Nkimba abukite kwiyi umughaniwa wako, yuyo wakuboneka akiza nkani ukubachila abakolo? Nkimba umughaniwa wako injiliye kwiyi, umwakuti tubukaye poka nawe pakumulondelezya?

Umukolo

² Umughaniwa wane abukite kumughunda, kumughunda wache uwa twakunonezya ivyakulya. Abukite pakudima umudimo wache kumughunda, sona pakubungannya ubwezya.

³ Umughaniwa wane sona nane ne wache, akudima umudimo wache pakasi pa bwezya.

Ulwimbo ulwafayivi Umwanavuli

⁴ Wee wapamoyo wane, we wakuboneka akiza nkani ngati we Tiliza, ukuboneka akiza nkani ngati we Yelusalemu, sona we muchindamu ngati bo basilikali babo banyamuye indembela.

⁵ Utakanyenelezyanje na maso ghako, pakuti amaso ghako ghakundebula. Isisi zyako zili ngati gho mudimo uwa mbuzi, ghugho ghukwika pighamba ilya Giliyadi.

⁶ Amino ghako ghali ngati gho mudimo uwa ng'ozi zizyo bazyozya bulo. Ing'ozi yosi yipasite, sona yitalipo nayimoyimo yiyo yili yene.

⁷ Isaya zyako zili ngati vyo vigaba ivya manyele, muchakuvwinka chicho uvwalite kucheni chako.

⁸ Napapo bangabapo abamwene abakolo 60, na bachi abazya 80, sona abalindu babo batabamenye abanavuli bangabapo abinji nkani.

⁹ Loli inkunda yane, sona wakufikapo wane abachilite bosi, yuyo mulindu weka bulo uwa nyina, sona wapamoyo uwa yuyo akamupapa. Abalindu bakamwennya nukumwitizya ukuti musayiwa, bope abamwene abakolo na bachi abazya bakamupala.

Abamanyani

¹⁰ “Nkimba wewenu yuyo akuboneka ngati ko kubuche, yuyo akulama ngati gho mwezi, sona ngati lizuba?” Nkimba wewenu yuyo akuboneka muchindamu ngati bo basilikali babo banyamuye indembela?

Umughaniwa

¹¹ Nkikila kumughunda wane uwa seke izya mposya, ukuti nennye ubwezya mwikombe. Nkabuka pakwennya nanti amampesya ghanda pakulemba, pamo nanti amanyele ghanda pakubazya.

¹² Bo inchili pakuzyaghannya, nkaba ngati po nkulota, ukuti indi mungolo palubazu bo nikaye nu mwene wane.

Abakolo

¹³ Nyokela, nyokela, wee wamu Shulami, nyokela, kwisinda umwakuti tukwennyanje. Nkimba choni chicho mukumwenelezya umulindu uwamu Shulami, bo ali pakwimba pakasi pa tubukatila tubili utwa bimbi?