Inyimbo izya Solomoni 5 - IBAYIBOLO 2024

Umwanavuli

¹ Wee wapamoyo wane, sona mughaniwa wane, ninjila mumughunda wane. Indi pakwilagha amafuta agha mule, poka nu twakufukizya utwakununkila utunji. Nkulya ichitenga poka nu buchi bwache, sona nkung'wela uvinyo wane poka nu lukama lwane. Mwee bamanyani bane, lyanga, ng'welagha mupaka papo mwikuta, mwee baghaniwa bane.

Abamanyani Ulwimbo ulwafolo Umukolo

² Nkaghona loli umoyo wane ghukachelezya. Teghelezya umughaniwa wane akukong'osya akuti, “Nyighulilako wee wapamoyo wane, wee mughaniwa wane, sona wee nkunda yane nu wakufikapo wane. Inganda yinyesizye kumutu wane, zyope isisi zyane zyanyeka nu bunyezu ubwa pabusiku.”

³ Navula kale amenda, po nkimba ingavwale sona? Nasukusula kale munyayo, po nkimba inzinyazye sona?

⁴ Umughaniwa wane akafumizya inyobe yache pibwindo nukundema, po umoyo wane ghukanda pakukoma pachifukwa icha yuyo.

⁵ Nkanyamuka pakumwighulila umughaniwa wane, bo inyobe zyane zikutonya na mafuta agha mule. Tope utufingwi twane tukatonyagha na mafuta agha mule bo tulemite ichilemelo icha lwiyi.

⁶ Nkamwighulila umughaniwa wane, loli nkagha ukuti epitepo kale. Nkatamiwa nkani mumoyo wane, pachifukwa ichakuti akabuka. Nkamulondelezya, loli intakamwagha, nkamwitizya, loli atakanyamula.

⁷ Abalindilili bakanyagha, bo bakwendela akaya akakulu nkani kala. Bakankoma nukumvulazya, sona abalindilili bala bakanvula inkazo yane.

⁸ Mwee bakolo aba mu Yelusalemu, lapa, nanti mwamwagha umughaniwa wane, mumubuzye ukuti ulughano lwantenguye nkani.

Abamanyani

⁹ Awe we wakuboneka akiza nkani ukubachila abanji, sona we mwiza nkani ukubachila abakolo bosi. Nkimba uwapamoyo wako yunuyu abachilite bosi bulibuli, umwakuti utulapizye bunubu?

Umukolo

¹⁰ Umughaniwa wane akuboneka akiza nkani, ghope umubili wache mwiza, sona mumanyikwe nkani pakasi pabantu 10,000.

¹¹ Umutu wache ghuli ngati we golide umwenecho, zyope isisi zyache zyakulukanalukana, sona nfitu ngati we chigobe.

¹² Amaso ghache ghakuboneka akiza ngati zyo nkunda zizyo zyikaye mulubazu ulwa soko izya mizi, bo zyoghite mulukama.

¹³ Isaya zyache zili ngati maghunda agha twakunonezya ivyakulya, tuto tukufumya umunusi umwiza nkani. Imilomo yache yili ngati bwezya, sona yikutonya na mafuta agha mule.

¹⁴ Inyobe zyache zili ngati mpingwi izya golide, zizyo bazilabannya na mabwe aghamutengo. Umubili wache ghukuboneka ngati zyo mpembe izya zovu, zizyo bazilabannya na mabwe agha safile.

¹⁵ Ivinama vyache viyanite ni mpanda izya mabwe aghamutengo zizyo bazikazizye pavyakwikalila ivya golide umwenecho. Akabonekele kache kali ngati gho maghamba agha Lebanoni, sona akuboneka akiza nkani ngati gho makwi agha mwale.

¹⁶ Imilomo yache yikunhobosya nkani, mumwache vyosi vili akiza bulo. Mwee bakolo aba mu Yelusalemu, umu momumo abeleye umughaniwa wane, sona nu mumanyani wane.