Inyimbo izya Solomoni 4 - IBAYIBOLO 2024

Umwanavuli

¹ Wee wapamoyo wane, we wakuboneka akiza nkani, sona naloliloli we lutondwa lwane. Amaso ghako ghali ngati gha nkunda muchakuvwinka chicho uvwalite kucheni chako. Isisi zyako zikumekuka ngati mudimo uwa mbuzi, zizyo zikwika pighamba ilya Giliyadi.

² Amino ghako ghali ngati gho mudimo uwa ng'ozi zizyo bazidumulila bulo ameya sona zizyo bazyozya bulo. Ing'ozi yosi yipasite, sona yitalipo nayimoyimo yiyo yili yene bulo.

³ Imilomo yako yili ngati buzi ubuchesamu, sona ghope umulomo wako ghukuboneka akiza nkani. Isaya zyako zili ngati vyo vigaba ivya manyele, muchakuvwinka chicho uvwalite kucheni chako.

⁴ Isingo yako yili ngati cho chitembe icha Devedi, chicho chizengiwe pamwanya nkani, mumo mukupayikiwa ingulu 1,000, izya basilikali abajivu nkani.

⁵ Amabele ghako mabili ghali ngati to twambabala tubili, ngati to tumapasa utwa mpombo tuto tukulya pakasi pabwezya.

⁶ Mupaka izuba lyafuma, bo akazundila kakumala, nkwiza pakukwela pighamba ilya mule, sona na pighamba ilya twakufukiza utwakununkila.

⁷ Wee wapamoyo wane, we wakuboneka akiza nkani, ute ni chilema nachimochimo.

⁸ Wee mughaniwa wane, zagha twepeko kwighamba ilya Lebanoni kuno, twende twepeko kwighamba ilya Lebanoni kuno. Ika pighamba ilya Amana, pamwanya pighamba ilya Senili nilya Helimoni, Epako kuno kumpako izya nkalamu, epako kumaghamba kuko abazyela bakuvwamako.

⁹ Wee wapamoyo wane, waghudebula umoyo wane, wee mughaniwa wane, na maso ghako, sona na mambo ghako ghagho uvwalite musingo yako.

¹⁰ Wee mughaniwa wane, sona wee muchi wane, ulughano lwako lukunhobosya nkani. Lukunhobosya nkani ukuchila uvinyo, sona umunusi uwa mafuta ghako ghuvichilite utwakunonezya ivyakulya.

¹¹ Wee mughaniwa wane, imilomo yako yikutonya ubuchi, sona ulukama nu buchi vili kusi kululimi lwako. Ukununkila ukwa menda ghako kuli ngati gho munusi uwamu Lebanoni.

¹² Wee wapamoyo wane, wee mughaniwa wane, awe uli ngati mughunda ghugho baghuzengeleye ulupaso. Awe uli ngati chiziba chicho chighaliliwe, sona ngati imbwibwi yiyo yimatiwe mulubazu lwache.

¹³ Ukuboneka akiza kwako kuli ngati mughunda uwa manyele, ghugho ghuli ni seke inyiza sona nu twakunonezya ivyakulya ivya hena nu nalidi.

¹⁴ Mulamula mulimo sona utwakufukizya utwakununkila utwa nalidi, nutwa safuloni nutwa kalamusi, nutwa kinamoni poka nu twakufukizya utwakununkila utwakulekanalekana. Mulimo sona amafuta agha mule, nagha aloyi, sona nu twakufukizya utwakununkila utwiza nkani.

¹⁵ Awe we mbwibwi iya mizi yiyo yili mumughunda, we chiziba icha mizi amiza, ghagho ghakufuma musoko izya mu Lebanoni.

Umukolo

¹⁶ Vundumuka, wee mpepo iyakumitu, wee mpepo iyakuntende, zagha. Putilagha mumughunda wane, umwakuti umunusi wache umwiza ghufikaye posi na posi. Leka umughaniwa wane izaghe mumughunda wache, umwakuti alyanje ivikomwa ivyiza.