Inyimbo izya Solomoni 3 - IBAYIBOLO 2024

¹ Ubusiku bosi bo ingonite pachitala chane, nkamulondagha yuyo umoyo wane ghumughanite. Nkamulondagha, loli intakamwagha.

² Nkamulondelezya mukaya akakulu nkani, na mumisebo sona na muminalo. Nkamulondelezya yuyo umoyo wane ghumughanite, Nkamulondagha, pope bulo intakamwagha.

³ Abalindilili bakanyagha, bo bali pakwendela akaya akakulu nkani. Po nkabalalusya nkati, “Nkimba mwamwennyapo yuyo umoyo wane ghumughanite?”

⁴ Bo nabachila bulo abalindilili bala, po nkamwagha yuyo umoyo wane ghumughanite. Nkamulema sona intakamulekezya, mupaka nkiza nawe munyumba iya mayi nukumwinjizya muchipinda icha yuyo akampapa.

⁵ Mwee bakolo aba mu Yelusalemu, lapila mwitabwa ilya mbabala, sona nilya mpombo ukuti, Mutakaluneng'ennyanje, pamo ukulunyamusya ulughano mupaka papo lwalondela ulwenecho.

Ulwimbo ulwabutatu Umukolo

⁶ Nkimba wewenu yuyo akufumila munkolongo, yuyo akwiza ngati yo mpanda iya lyosi? Apakaye amafuta aghakununkila agha mule, sona nu munusi uwa twakufukizya utwakununkila utwa baghulizi.

⁷ Ennya, amachila ghagho bamunyamuliyepo u Solomoni, bo abasilikali 60 abajivu bali pakumusindikila, sona babo banavuli abamaka nkani mu Izilayeli.

⁸ Bosi banaba balemite abapanga, sona bamenye nkani pakulwa ubwite. Umuntu wesi ali nupanga wache palubazu, ukuti alwe ubwite na babo bakwiza pabusiku.

⁹ U mwene u Solomoni akipangila mwene amachila, ghagho ghakaba gha makwi agha mu Lebanoni.

¹⁰ Impanda zyache zikaba zya siliva, sona kwisinda kwache kukaba kwa golide. Ichitengo chache chikalukiwa nu mwenda umuchesamile, ghugho umwalughano abakolo aba mu Yelusalemu bakaghulabannya akiza nkani.

¹¹ Fuma kuzi, mwee bakolo aba mu Ziyoni, mwize mumwennye u mwene u Solomoni! Avwalite impumpu yiyo unyina akamuvwika, pisiku ilya sendwa yache, sona pisiku lilyo umoyo wache ghukahoboka nkani.