Inyimbo izya Solomoni 2 - IBAYIBOLO 2024

¹ Ane ne bwezya ubwa ku Shaloni, sona ne bwezya ubwa mwikombe.

Umwanavuli

² Ngati mumo bubeleye ubwezya pakasi pa mivwa, momumo abeleye uwapamoyo wane pakasi pa balindu.

Umukolo

³ Ngati mumo libeleye ikwi ilya manyele mumusitu, momumo abeleye umughaniwa wane pakasi pa balumendo. Nkuhoboka nkani pakwikala mukazundila kache, sona ivikomwa vyache vyope vikunona nkani mumulomo wane.

⁴ Ansendela kunyumba iya lusekelo, sona ulughano yo ndembela yache papane.

⁵ Undyesyanje amampesya amumizu, sona unsangalusyanje na manyele, pakuti indi nizala iya lughano.

⁶ Inyobe yache iyamongo yilemite kunkonto yane, sona anfukatiye ni nyobe yache indilo.

⁷ Mwee bakolo aba mu Yelusalemu, lapila mwitabwa ilya mbabala, sona nilya mpombo ukuti, Mutakaluneng'ennyanje pamo ukulunyamusya ulughano, mupaka papo lwalondela ulwenecho.

Ulwimbo ulwabubili Umukolo

⁸ Ivwa kuno, ennya mughaniwa wane, akwiza bo akunyelanyela mumaghamba, sona bo akuchimbila mutumaghamba.

⁹ Umughaniwa wane ali ngati mbabala, pamo ngati ko kana aka mpombo. Ennya imiliye kwisinda kulubumba lwitu, bo ali pakunanamizya pibwindo.

¹⁰ Umughaniwa wane akanena, sona akambuzya akati, Wee wapamoyo wane, nyamuka wee lutondwa lwane, twende tubukaye.

Umwanavuli

¹¹ Ennya, akabalilo aka lupepo kamala, sona yope ivula yamala.

¹² Ubwezya bukuboneka pachisu ichapasi, sona akabalilo akakwimbila kafika, ukulila ukwa nkunda kukwivwika muchisu chitu.

¹³ Ikuyu lyanda pakwela ivikomwa, ghope amampesya ghanda pakubazya ubwezya ubwakununkila. Nyamuka wee wapamoyo wane, wee lutondwa lwane, zagha.

¹⁴ Inkunda yane yivwamite mumpako izya mabwe, sona nu mwakuvwamamo mumaghamba. Leka nennyanje icheni chako, sona nivwanje izyu lyako. Pakuti izyu lyako lyiza nkani, sona chope ni cheni chako chikuboneka akiza.

¹⁵ Utulemele abakabila, sona nu twakabila, tuto tukunangannya amaghunda ghitu agha mampesya, pakuti amampesya ghitu ghanda bulo pakubazya.

Umukolo

¹⁶ Umughaniwa wane sona nane ne wache, akudima umudimo wache pakasi pa bwezya.

¹⁷ Mupaka izuba lyafuma, bo akazundila kakumala, nyokako we mughaniwa wane. Ubanje ngati yo mbabala, pamo ngati kana aka mpombo pakasi pamaghamba.