Imbombo 9 - IBAYIBOLO 2024

Ukupinduka ukwa Sabuli

¹ Loli u Sabuli akendelela pakuboghofya abamanyili aba Mwene nukulonda pakubaghogha. Akabukagha kwa muputi usongo

² nukulaba abakalata ukuti abuke nabo munyumba izyakwiputilamo mu Damasika, umwakuti nanti angabagha bamo abakonki aba Zila iya Mwene, abapinye, bosi abanavuli na bakolo nukwiza nabo mu Yelusalemu.

³ Bo u Sabuli apalamila kukaya akakulu nkani aka Damasika, umwakuchenusya bulo ulukozyo ulwakufuma kumwanya lukamulamila.

⁴ Po akawa pasi nukwivwa izyu likunena likuti, “Sabuli, Sabuli! Choni chicho ukunvwima?”

⁵ Akamulalusya akati, “Nkimba wewenu awe, Mwene?” Izyu lila likamula likati, “Nene Yesu, yuyo ukumuvwima.

⁶ Loli nyamuka nukubuka mukaya akakulu nkani mumo bakwiza pakukubuzya zizyo ubaghiye pakubomba.”

⁷ Abantu babo bakendagha nu Sabuli bakima bulo myee; bakivwa bulo ichongo, loli batakamwennya nayumo umuntu.

⁸ U Sabuli akanyamuka nukwighula amaso ghache, loli atakennyapo nachimochimo. Po abantu bala bakamulema panyobe nukwinjila nawe mu Damasika.

⁹ Akaba mufwamaso amasiku matatu, sona atakalyanga pamo ukung'wela chimo.

¹⁰ Mu Damasika mulamula mukaba umumanyili yumo, yuyo akaba we Ananiya. U Mwene akamubuzya muchisetuka ukuti, “Ananiya!” Akamwamula akati, “Mwene, ane indi pano.”

¹¹ U Mwene akamubuzya akati, “Nyamuka nukubuka kuzila yiyo bakatinji, ‘Izila Ingoloke.’ Kulakula kunyumba iya Yudasi umubuzikizye umuntu yumo itabwa lyache we Sabuli, yuyo afumite ku Talisa. Ali pakwiputa,

¹² sona muchisetuka ennya umuntu yumo, yuyo we Ananiya iza nukubika inyobe papache ukuti ennye sona.”

¹³ U Ananiya akamwamula akati, “Mwene, abantu abinji bambuzya nizya muntu yunuyu, sona nizya vintu ivyinji ivyakoghofya vivyo ababombela abantu bako abazelu mu Yelusalemu.

¹⁴ Polelo iza muno mu Damasika nu bulaghili ubwa baputi abasongo ukuti abapinye bosi babo bakukwiputa awe.”

¹⁵ U Mwene akamubuzya akati, “Bukagha pakuti namusala ukuti ambombele, ukufumusya itabwa lyane pakasi pabantu babo bate ba Yuda, na bamwene, sona na pakasi paba Izilayeli.

¹⁶ Ane nemwene nkwiza pakumulanjizya amayimba ghosi ghagho akwiza pakukomana nagho pachifukwa icha nene.”

¹⁷ Po u Ananiya akabuka, nukwinjila munyumba mumo mukaba u Sabuli nukubika inyobe papache. Akati, “Mukamu Sabuli, u Mwene u Yesu, yuyo akakubonekela pazila bo ukwiza kuno, antuma ukuti wennye sona, nukwizula nu Muzimu Umuzelu.”

¹⁸ Panapo na panapo utuntu tukawa mumaso agha Sabuli tuto tukabonekagha ngati to tupapa utwa iswi, po akanda pakwennya sona. Akanyamuka nukoziwa;

¹⁹ bo alya ichakulya, amaka ghache ghakanyokelamo. U Sabuli akikala amasiku manandi poka na bamanyili mu Damasika.

U Sabuli akulumbilila mu Damasika

²⁰ Panapo na panapo akanda pakulumbilila munyumba izyakwiputilamo ukuti u Yesu we Mwana uwa Chala.

²¹ Bosi babo bakamwivwa bakaswigha nukulalusya ukuti, “Nkimba ate weyuyo akaghoghagha abantu mu Yelusalemu, babo bakamwiputagha umuntu yuyo tukatinji Yesu? Nkimba atiziye kuno imbombo yilayila iyakubapinya abantu nukubabika munyobe izya baputi abasongo?”

²² Loli ubulumbilili ubwa Sabuli bukendelelagha pakuba bwamaka nkani, umwakuti chikabamala nkani amahala aba Yuda babo bakikalagha mu Damasika pakubasimikizizya ukuti u Yesu akaba we Mesiya.

²³ Bo ghachilapo amasiku aminji, aba Yuda bakakomana poka nukubatika izila izyakumughoghela u Sabuli,

²⁴ loli bakamubuzya u Sabuli nizya lubatiko lwabo. Pamusanya na pabusiku bakalindililagha mumilyango iya lupaso uwa kaya akakulu nkani ukuti bamughoghe u Sabuli.

²⁵ Loli ubusiku bumo, abamanyili aba Sabuli bakamusenda nukumwisizya muchidudunga ukwendela pibwindo lilyo likaba palubumba ulwa lupaso.

U Sabuli mu Yelusalemu

²⁶ U Sabuli akabuka ku Yelusalemu nukuyezya ukwinjila mukabukatila aka bamanyili. Loli bosi bakamunyilagha pachifukwa ichakuti batakamusubila ukuti akaba mumanyili.

²⁷ Po u Balanabasi akamusenda nukubuka nawe ku batumiwa. Akabalingannya mumo u Sabuli akamwenezezya u Mwene pazila, sona nukuti u Mwene akanena nawe. Akababuzya sona mumo u Sabuli akalumbilila nu bujivu nkani mwitabwa ilya Yesu mu Damasika.

²⁸ Po u Sabuli akikala nabo poka nukwenda mu Yelusalemu mosi pakulumbilila nu bujivu nkani mwitabwa ilya Mwene.

²⁹ Wepe akanenagha nukudalinkana naba Yuda babo bakanenagha Ichigiliki, loli bakayezya pakumughogha.

³⁰ Bo abitiki bazyaghannya, bakamusenda u Sabuli nukubuka nawe mu Kesaliya nukumutuma ku Talisa.

³¹ Po ichipanga icha mu Yudeya, mu Galileya, na mu Samaliya chikaba na kabalilo akamutende nukwendelela pakumwiputa u Mwene. U Muzimu Umuzelu akachikazya nukuchavwa pakukula, po chikaba ichakumunyila u Mwene.

U Pitala mukaya aka Lida na Yopa

³² Bo u Pitala akwenda posi na posi pakubendela abantu abazelu aba Chala babo bakikalagha mu Lida,

³³ akakomana nu muntu yumo yuyo akaba we Eneya, yuyo ivinama vyache vifuye, sona akapotwanga pakunyamuka pachitala chache amaka eyiti.

³⁴ U Pitala akamubuzya akati, “Eneya, u Yesu Kilisitu akukupozya. Nyamuka nukutenga pachitala chako.” Panapo na panapo u Eneya akanyamuka.

³⁵ Abantu bosi babo bakikalagha mu Lida na mu Shaloni bakamwennya, po bakapindukila kwa Mwene.

³⁶ Mu Yopa mukaba umumanyili umukolo yumo yuyo akaba we Tabita. (Itabwa lyache ilya mu Chigiliki bakuti Dolika, chicho chikung'anamula ukuti, “Imbabala.”) Akabalilo kosi akabombagha inyiza nukwavwa abapina.

³⁷ Pakabalilo kalakala akabinagha nukufwa. Umuvimba wache bakaghozya nukughulambalika muchipinda chicho chikaba pamwanya pachamwabo.

³⁸ Akaya aka Yopa katakaba kubutali nkani nakaya aka Lida, po bo abamanyili aba mu Yopa bivwa ukuti u Pitala ali mu Lida, bakatuma abantu babili na mazyu aghakuti, “Twalamba, endelela wize kuno.”

³⁹ Po u Pitala akanyamuka nukubuka nabo. Bo afika, bakabuka nawe muchipinda chilachila mumo abafwilwe bosi bakamubunganila, ukulila nukumulanjizya inkazo na menda ghagho u Dolika akasona bo achili mumi.

⁴⁰ U Pitala akabafumya bosi kuzi, akafughama nukwiputa. Akaghalabukila ku muvimba nukuti, “Wee Tabita, nyamuka!” Po akighula amaso ghache, bo amwennya u Pitala, akanyamuka nukwikala.

⁴¹ U Pitala akamulema inyobe nukumwimika. Po akabitizya abitiki bosi, poka na bafwilwe nukubalanjizya u Tabita umumi.

⁴² Imbili yikasata mu Yopa mosi, po abantu abinji bakasubila mwa Mwene.

⁴³ U Pitala akikala amasiku aminji mu Yopa munyumba iya muntu yuyo itabwa lyache akaba we Simoni, umuvukutamakwela.