Imbombo 8 - IBAYIBOLO 2024

¹ Po u Sabuli akaba palapala pakusimikizya nizya kughoghiwa ukwa Sitefani. Isiku lilalila ichipanga mu Yelusalemu chikanda pakuvwimiwa nkani. Abitiki bosi ukwefyako abatumiwa, bakanyampana muvigaba vyosi ivya Yudeya nu Samaliya.

U Sabuli akuchivwima ichipanga

² Abantu bamo aba Chala bakamusyila u Sitefani, nukumulila nkani ni chitima.

³ Loli u Sabuli akayezya pakuchinangannya nkani ichipanga, umwakuti akabukagha inyumba ni nyumba pakubalema abitiki, bosi abanavuli na bakolo nukubighalila mujele.

Amazyu Amiza ghakulumbililiwa muchigaba icha Samaliya

⁴ Abitiki babo bakanyampana posi na posi, bakalumbililagha Amazyu Amiza kosi kuko bakabukagha.

⁵ U Filipu akabuka mukaya akakulu nkani aka mu Samaliya nukulumbilila pakasi pabantu nizya Kilisitu, Umupoki umusaliwa nu Chala yula.

⁶ Bo ivilundilo ivya bantu vyamwivwa u Filipu nukwennya ivimanyilo vivyo akabomba, bosi bakateghelezya nkani zizyo akanenagha.

⁷ Imizimu imibibi yikepamo mubantu abinji pakukolomoka, sona abantu abinji babo bafuye ivinama na balemazu bakapola.

⁸ Po mukaya kalakala mukaba ubuhobosu nkani.

⁹ Loli mukaya mulamula mukikalagha umuntu yumo yuyo akaba we Simoni, yuyo kale akabaswighisya nkani abantu aba mu Samaliya na mayele ghache. Umwene akituvyanga ngati we muntu yumo umukulu nkani.

¹⁰ Abantu bosi mulamula, abanandi na basongo, bakamuteghelezya nkani. Bakanena bakati, “Umuntu uyu we maka agha Chala ghagho bakughitizya ukuti, ‘Maka Amakulu.’ ”

¹¹ Bakamuteghelezya pachifukwa ichakuti, ukwa kabalilo akatali nkani akabaswighisya abantu na mayele ghache.

¹² Loli bo basubila amazyu agha Filipu ghagho ghakanenagha nizya Mazyu Amiza agha Bumwene ubwa Chala agha Yesu Kilisitu, bakoziwa, bosi abanavuli na bakolo.

¹³ U Simoni wepe akasubila. Bo oziwa, akikalagha poka nu Filipu, po chikamumala nkani amahala, bo ennya ivimanyilo ni vyika ivikulu vivyo vikabombiwanga.

¹⁴ Bo abatumiwa mukaya akakulu nkani aka Yelusalemu bivwa ukuti abantu aba mu Samaliya bakapokela amazyu agha Chala, bakabatumila u Pitala nu Yohani.

¹⁵ Bo bafika, bakabiputila abitiki bala ukuti bapokele u Muzimu Umuzelu.

¹⁶ Pakuti umuntu wesi uwa babo akaba achili atapokelite u Muzimu Umuzelu, loli bakoziwa bulo mwitabwa ilya Mwene u Yesu.

¹⁷ Po u Pitala nu Yohani bakabika inyobe papabo, sona bakapokela u Muzimu Umuzelu.

¹⁸ U Simoni akennya ukuti abitiki bakapeghiwa u Muzimu Umuzelu, bo abatumiwa babika inyobe papabo, akalondagha pakubapa indalama

¹⁹ nukuti, “Nane bulo mumpeko amaka, umwakuti umuntu wesi yuyo ane nabikapo inyobe papache, angapokela u Muzimu Umuzelu.”

²⁰ Loli u Pitala akamwamula akati, “Awe wemwenecho poka ni ndalama zyako mubukile poka ku Gehena, pachifukwa icha kwinong'ona ukuti ungaghula ichabupi icha Chala ni ndalama.

²¹ Ute ni chigaba pamo ubuzilo mumbombo yitu pakuti umoyo wako ghute mugholosu pamaso pa Chala.

²² Polelo pinduka nukuchileka ichintu chako ichibibi ichi nukumwiputa u Mwene ukuti akuhobokele pachifukwa icha kwinong'ona ichintu ngati cho ichi.

²³ Pakuti nkwennya ukuti wizuye nukubaba ukwa kanyongo, sona we muzya uwa mbibi.”

²⁴ U Simoni akanena kwa Pitala nu Yohani akati, “Napela, munyiputilaye kwa Mwene ukuti nachimochimo icha vintu vivyo mwanena chitakambonekele.”

²⁵ Bo bamala pakusimikizya nukulumbilila amazyu agha Mwene, u Pitala nu Yohani bakanyokela mu Yelusalemu. Bo bali muzila, bakalumbilila Amazyu Amiza mutwaya utwinji utwa mu Samaliya.

U Filipu ni kambala ilya mu Etiyopiya

²⁶ Uwantumi uwa Mwene akamubuzya u Filipu akati, “Nyamuka nukubuka kulubazu ulwakuntende kuzila yiyo yikubuka ku Gaza ukufuma mu Yelusalemu.” (Iyi zila iya munkolongo.)

²⁷ Po u Filipu akanyamuka nukubuka. Ikambala limo lilyo likapasiwa, sona akaba mumanyikwe muchisu icha Etiyopiya, yuyo akaba we songo uwakwenelezya ichuma icha Mwene Umukolo u Kandaki uwamu Etiyopiya. Akaba pabulendo ubwakubuka kukaya kache ukufuma mu Yelusalemu pakumwiputa u Chala,

²⁸ po akabwelagha kukaya pangolo yache. Bo ali muzila, akabelengagha mwibuku ilya umulaghuzi u Yesaya.

²⁹ U Muzimu Umuzelu akamubuzya u Filipu akati, “Bukagha wendaye papipi ni ngolo yache.”

³⁰ U Filipu akachimbilila ingolo yila nukumwivwa akubelenga mwibuku ilya mulaghuzi u Yesaya. Akamulalusya akati, “Nkimba ukuzyivwisya zizyo ukubelenga?”

³¹ Ikambala lila likamula likati, “Nkimba ningazyivwisya bulibuli, ukusita yumo uwakundingannya?” Akamwitizya u Filipu ukuti akwele nukwikala nawe mungolo mulamula.

³² Amasimbo ghagho akabelengagha gho agha, “Ngati ng'ozi yiyo yasendiwa pakubuka nayo pakuboliwa ngati we mwana uwa ng'ozi yuyo atakuzuma ichongo, bo bali pakumudumula ameya ghache, po atakanenapo nachimochimo.

³³ Bakamusula, sona panongwa yache patakabapo ubwanaloli. Nkimba wewenu angalingannya izya baluko lwache? Pakuti ubumi bwache pachisu ichapasi pano bwafika pabumalilo.”

³⁴ Ikambala lila likamulalusya u Filipu likati, “Mbuzya, nkimba umulaghuzi akunena nizya wenu? Nkimba akwinena mwene, pamo akunena nizya yunji bulo?”

³⁵ Po u Filipu akanda pakumulingannya Amazyu Amiza agha Yesu ukwandila mu Masimbo agha.

³⁶ Bo bakwenda, bakafika pabuzilo bumo bubo pakaba amizi. Po ikambala lila likanena likati, “Ennya, pano pali amizi. Nkimba choni chicho chingankanizya ukuti noziwe?”

³⁸ Ikambala lila likalamula ingolo yache ukuti yimilile, po u Filipu ni kambala lila bakikila mumizi, sona u Filipu akamozya.

³⁹ Bo bepamo mumizi mula, u Muzimu uwa Mwene akamwefyapo u Filipu. Ikambala lila litakamwennyapo sona u Filipu, loli akendelela nu bulendo bwache, izuye nu buhobosu.

⁴⁰ Loli u Filipu akazyaghannya ukuti ali mu Azota. Akabuka mu Kesaliya, po muzila akalumbilila Amazyu Amiza mutwaya tosi.