Imbombo 7 - IBAYIBOLO 2024

Amazyu agha Sitefani

¹ Umuputi usongo akamulalusya u Sitefani akati, “Nkimba izi zyanaloli?”

² U Sitefani akamula akati, “Mwee bakamu bane na batata, munteghelezye! Bo umunyenya witu u Abulahamu achili atabukite pakwikala mu Halani, u Chala uwa buchindamu akamubonekela muchisu icha Mesopotamiya

³ nukumubuzya ukuti, ‘Fumamo muchisu chako. Ubaleke abakamu bako nukubuka kuchisu chicho nkwiza pakukulanjizya.’

⁴ Po akepamo muchisi chache icha Akalideya nukubuka pakwikala mu Halani. Bo uwise uwa Abulahamu afwa, u Chala akamusamizya kuchisu chicho mukwikalamo losi ulu.

⁵ U Chala atakamupako u Abulahamu na kabuzilo nakamokamo ukuti kabanje kache na kache, napapo imita lyoka, loli u Chala akamulayizya pakumupako ichisu ichi, sona ukuti kabanje kache na kache nuluko lwache. Pakabalilo kako u Chala akamulayizyanga, u Abulahamu atakaba na bana.

⁶ Izi zyo zizyo u Chala akamubuzya ukuti, ‘Abaluko lwako bakwiza pakuba bayeni muchisu chicho chite chabo. Kulakula bakwiza pakuba bazya, sona bakwiza pakuyiviwa amaka 400.

⁷ Loli nkwiza pakuzifunda inko zizyo zikwiza pakukubombela pakuba bazya, pisinda pache abaluko lwako bakwiza pakwepamo muchisu chilachila nukunyiputa pabuzilo ubu.’

⁸ U Chala akafingana nu Abulahamu, po ukusilimula kukaba chimanyilo icha lufingo. U Abulahamu akamusilimula u Yisaki, bo pachilapo u sabata weka ukwandila pisiku lilyo akapapiwa. U Yisaki akamusilimula umwana wache u Yakobo; wepe u Yakobo akabasilimula abana bache 12, abanyenya abamanyikwe abaluko lwitu.

⁹ “Abana aba Yakobo bakaba na kabini nu wamwabo u Yosefu nukumughulizya ngati we muzya mu Ijiputi. Loli u Chala akaba nawe

¹⁰ nukumupoka muntamyo zyache zyosi. Bo u Yosefu aboneka pamaso pa Falabo, u mwene uwamu Ijiputi, u Chala akamupa inkalo inyiza na mahala. Po u mwene akamubika u Yosefu pakuba mulaghili uwamu Ijiputi, sona usongo uwa kunyumba iya bumwene.

¹¹ Po izala yikawa muchisu chosi icha Ijiputi nicha Kenani, yiyo yikapela amayimba amakulu nkani, umwakuti abanyenya bitu bakapotwa pakuchagha ichakulya.

¹² Bo u Yakobo ivwa ukuti mu Ijiputi mukaba ichakulya, akabatuma abana bache, abanyenya bitu. Ubu bukaba bulendo bwabo ubwakwanda.

¹³ Pabulendo bwabo ubwabubili u Yosefu akilanjizya mwene ku bawamwabo, po u Falabo akamanya nizya mbumba iya Yosefu.

¹⁴ Po u Yosefu akatuma intumi kwa wise u Yakobo, pakumubuzya ni mbumba yache yosi, babo bosi poka bakaba abantu 75 ukuti bize mu Ijiputi.

¹⁵ Po u Yakobo akabuka mu Ijiputi mumo yuyo na bana bache bakafwila.

¹⁶ Imivimba yabo bakayinyamulila mu Shekemu, mumo bakayisyila mwipumpa, lilyo u Abulahamu akaghula ku bana aba Hamoli ni ndalama.

¹⁷ “Bo akabalilo kakwana akakuti u Chala abombe zizyo akamulayizya u Abulahamu, abantu bitu mu Ijiputi bakabala nkani.

¹⁸ Pabumalilo u mwene yuyo atakazimanya nizya Yosefu akanda pakulaghila mu Ijiputi.

¹⁹ Akabenda pasi abanyenya bitu nukubayivya pakubafyenga ukuti babaleke ababonda babo kuzi kutwaya twabo, ukuti tufwile kulakula.

²⁰ Kakaba kabalilo kanaka kako u Mozesi akapapiwa, umwana umwiza nkani pamaso pa Chala. Akaleliwa munyumba iya wise amezi matatu,

²¹ bo bamwefyamo munyumba iya wise, umwana umulindu uwa Falabo akamuseba nukumulela ngati mwana wache.

²² Bakamumanyisya u Mozesi amahala ghosi agha mu Ijiputi, sona akaba muntu uwamaka mumazyu na mumbombo bulo.

²³ “Bo u Mozesi afika amaka 40, akinong'ona pakubendela abakamu bache aba Izilayeli.

²⁴ Akamwennya umuntu uwa muchisu icha Ijiputi akumuyivya yumo uwa babo, akabuka pakumupoka nukutanizya pakumughogha umuntu uwamu Ijiputi.

²⁵ U Mozesi akinong'ona ukuti abantu bache bangazyaghannya ukuti u Chala akamutuma pakubapoka muntamyo zyabo, loli batakazyaghannya.

²⁶ Indabi yache akabennya aba Izilayeli babili bakulwa benebene, akayezya pakubamanyannya. Akanena ukuti, ‘Mwe bantu, mwe bana muntu, po nkimba choni chicho mukulwa bunubu?’

²⁷ Loli yuyo akamuyivya uwamwabo akamusunkila u Mozesi kulubazu nukumulalusya ukuti, ‘Nkimba wewenu akakubika pakuba we mulaghili nu mulongi pakasi papitu?

²⁸ Nkimba ukulonda pakungogha ukuyana namumo ukamughoghela umu Ijiputi yula mumabwila?’

²⁹ Bo u Mozesi ivwa zinizi, akachimbilamo mu Ijiputi nukubuka pakwikala muchisu icha Midiyani. Kulakula akapapako abana babili.

³⁰ “Bo ghachilapo amaka 40, uwantumi uwakumwanya akamubonekela u Mozesi muchivwati ichakwaka numoto munkolongo papipi ni ghamba ilya Sinayi.

³¹ U Mozesi akaswigha na vivyo akavyennya, po akapalamila papipi ukuti enelezye. Loli akivwa izyu ilya Mwene likuti,

³² ‘Ane ne Chala uwa banyenya binyu, u Chala uwa Abulahamu nuwa Yisaki sona nuwa Yakobo.’ U Mozesi akatetema nubogha, sona atakajimba ukwennyako.

³³ U Mwene akamubuzya akati, ‘Vula inkwato zyako pakuti ubuzilo bubo wimitepo buzelu.

³⁴ Naghennya amayimba agha bantu bane mu Ijiputi. Nivwa ukukoloma kwabo, po niza pakubapoka. Zagha losi ulu ukuti nkutume kuchisu icha Ijiputi.’

³⁵ “U Mozesi weyuyo aba Izilayeli bakamukana. Bakamulalusya bakati, ‘Nkimba wewenu akakubika pakuba we mulaghili nu mulongi pakasi papitu?’ Sona weyuyo u Chala akamutuma ukuti abanje we songo nu mupoki ukwendela mu wantumi uwakumwanya yuyo akamubonekela muchivwati ichakwaka numoto.

³⁶ U Mozesi akabalongolela abantu ukwepamo mu Ijiputi, akabombagha ivyika ni viswigho mu Ijiputi napa Nyanja Inchesamu, sona na munkolongo amaka 40.

³⁷ U Mozesi weyuyo akababuzya aba Izilayeli ukuti, ‘U Chala akwiza pakubatumila umulaghuzi ukuyana namumo akantumila, sona akwiza pakuba yumo uwa bantu binyu.’

³⁸ Weyuyo akabungana poka naba Izilayeli munkolongo. Akaba mulamula na banyenya bitu poka nu wantumi uwakumwanya, yuyo akamubuzya pighamba ilya Sinayi nukutupokelela amazyu agha bumi agha Chala.

³⁹ “Loli abanyenya bitu bakakana pakumwivwila, bakamusunkila kulubazu nukulonda ukuti ngali banganyokela kuchisu icha Ijiputi.

⁴⁰ Po bakanena kwa Aloni bakati, ‘Utupangile abachala babo bakwiza pakutulongolela. Aswe tutakuzimanya zizyo zyamuwila umuntu yula u Mozesi, yuyo akatulongolela pakwepamo mu Ijiputi.’

⁴¹ Palapala bakapanga ichifwani chicho chikaboneka ngati ngwata, bakabika ivyabupi ku chifwani chila nukuba nu lusekelo ulwakuchindikila zizyo abene bakapanga ni nyobe zyabo.

⁴² Po u Chala akabapa inkonto nukubavwituka ukuti biputaye bulo ni ntondwa izya kumwanya ukuyana namumo zisimbiliwe mwibuku ilya balaghuzi ukuti, ‘Mwee ba Izilayeli! Mutakangoghelagha nene ivinyamana vyinyu nukubika ivyabupi amaka 40 munkolongo?

⁴³ Loli ilelo mwachinyamula ichisakasa icha chala u Moleki, sona nu lutondwa ulwa chala winyu u Lefani, vikaba vifwani vivyo mukamata ukuti muvyiputaye. Polelo nkwiza pakubatuma pakuba mwe bazya ukuchila ichisu icha Babiloni.’

⁴⁴ “Abanyenya bitu bakaba ni Chisakasa munkolongo ichakusimikizya ukuti u Chala akaba nabo. Chikapangiwa bulo mumo u Chala akamubuzizya u Mozesi ukuti apangile, ukuyana namumo u Mozesi akamulanjizizya.

⁴⁵ Pisinda pache abanyenya bitu bakachipokela Ichisakasa chilachila ku batata babo. Bakachinyamula, bo bakubuka nu Yoshwa pakufyula ichisu munyobe izya inko izya bantu, babo u Chala akabachimbizya pamaso papabo. Ichisakasa chila chikikala kulakula mupaka pakabalilo aka Devedi.

⁴⁶ U Chala akahoboka nkani nu Devedi, po u Devedi akamulaba ukuti amwitikizye ukuti amuzengele inyumba iyakwikalamo u Chala uwa Yakobo.

⁴⁷ Loli akaba we Solomoni yuyo akamuzengela inyumba.

⁴⁸ Loli u Chala Uwakumwanya Nkani atakwikala munyumba zizyo zizengiwe na bantu, ukuyana namumo umulaghuzi akulaghulila ukuti,

⁴⁹ U Mwene akunena ukuti, ‘Kumwanya cho chitengo chane icha bumwene, sona ichisu ichapasi cho chakutuzizyapo inyayo zyane Nkimba nyumba yoni yiyo munganzengela? Nkimba ubuzilo bubo imbaghiye pakwikalamo buli ko kwiyi?

⁵⁰ Nkimba inte nene nkapanga ivintu vyosi vinivi?’ ”

⁵¹ U Sitefani akendelela pakunena ukuti, “Mwe bantu aba moyo amakafu mwee. Amoyo ghinyu ghayanite bulo na bantu abakuzi, sona muli na mapuli! Ukuyana namumo bakabombelagha abanyenya binyu, akabalilo kosi amwe mukumukana u Muzimu Umuzelu!

⁵² Nkimba kukabako umulaghuzi yumo yuyo abanyenya binyu batakamuvwimapo? Bakaghogha abantumi aba Chala, babo kale bakafumusya izya kwiza ukwa Mubombi wache Umugholosu. Po losi ulu mwamubika munyobe izya balwani nukumughogha.

⁵³ Amwe mwemwe mukapokela Indaghilo izya Chala, zizyo zikapeghiwa kukwinyu ukwendela mubantumi, loli mutakazyivwila!”

Bakumusumba u Sitefani na mabwe

⁵⁴ Bo abalongi bakuteghelezya kwa Sitefani, bakakalala nukumumemenela amino.

⁵⁵ Loli nu bwizule ubwa Muzimu Umuzelu, u Sitefani akennya kumwanya nukwennya ubuchindamu ubwa Chala, sona u Yesu imiliye kunyobe indilo iya Chala.

⁵⁶ Akati, “Ennya, nkwennya kumwanya kwighukite, sona u Mwana uwa Muntu imiliye kunyobe indilo iya Chala.”

⁵⁷ Loli abene bakakolomoka nkani, bakighalila amakutu ghabo ni nyobe zyabo. Panapo na panapo bosi poka bakamunyelela,

⁵⁸ bakamuwesela kuzi ukwa kaya kala nukumusumba na mabwe. Abakaboni bakasungisya amenda ghabo ku mulumendo yuyo bakatinji Sabuli.

⁵⁹ Bo bakwendelela pakumusumba na mabwe, u Sitefani akanda pakwiputa ukuti, “Wee Mwene Yesu, pokela umuzimu wane!”

⁶⁰ Akafughama nukulila na mazyu agha pamwanya ukuti, “Wee Mwene! Utakakumbuke imbibi yabo iyi.” Bo anena zinizi akafwa.