Imbombo 5 - IBAYIBOLO 2024

Nizya Ananiya nu Safila

¹ Kukabako umuntu yumo yuyo itabwa lyache akaba we Ananiya, yuyo poka nu muchi wache u Safila bakaghulizya umughunda wabo ghumo.

² Loli akivwana nu muchi wache nukusabulapo indalama zimo zizyo bakaghulizizya umughunda wabo nukubapa abatumiwa zizyo izyakusyala.

³ U Pitala akamubuzya akati, “Nkimba Ananiya choni chicho ukamwitikizya u Satana ukuti injile mumoyo wako nukumuzimbula u Muzimu Umuzelu pakusabulapo indalama zimo zizyo ukaghulizizya umughunda wako?

⁴ Bo utaghughulizizye, umughunda ghulaghula, nkimba ghutakaba wako? Sona bo waghulizya, nkimba indalama zitakaba zyako? Po choni chicho ukinong'ona pakubomba zinizi? Utakabazimbula abantu, loli wamuzimbula u Chala!”

⁵ Panapo na panapo bo u Ananiya ivwa zinizi, akawa pasi nukufwa. Sona abantu bosi babo bakivwa zinizi ubogha bukabalema nkani.

⁶ Abalumendo bakiza nukughunnyembetelela umuvimba wache na menda, bakaghunyamula nukubuka nagho pakughusyila.

⁷ Bo pachila ama awala matatu, wepe umuchi akinjila mulamula ukusita ukuzimanya zizyo zikamubonekela umulume wache.

⁸ U Pitala akamulalusya akati, “Mbuzya, nkimba izi zyo ndalama zyosi zizyo awe nu mulume wako mukaghulizizya umughunda?” Akamula akati, “Eee, zyo zinizi.”

⁹ Po u Pitala akamubuzya akati, “Nkimba choni chicho awe nu mulume wako mukivwana pakumuyela u Muzimu uwa Mwene? Abanavuli babo bakamusyila umulume wako losi ulu bali pamulyango, sona bakwiza pakukunyamula nawe!”

¹⁰ Panapo na panapo akawila muvinama ivya Pitala nukufwa. Abalumendo bakinjila mulamula nukwennya ukuti afuye. Po bakamunyamula nukubuka nawe pakumusyila palubazu nu mulume wache.

¹¹ Ichipanga chosi, sona na banji bosi babo bakivwa zinizi ubogha bukabalema nkani.

Ivimanyilo ni viswigho

¹² Ivimanyilo ni viswigho ivyinji vikabombiwanga pakasi pabantu na batumiwa. Abitiki bosi bakabungana poka mu Ntanda iya Solomoni.

¹³ Nayumo umuntu uwakuzi ukwa kabukatila kabo yuyo akajimba nkani ukwinjila mukabukatila kabo, loli abantu bakabapala nkani.

¹⁴ Loli abantu abinji bakonjelelaghakonjelelagha ku kabukatila kabo—ichilundilo icha banavuli na bakolo babo bakasubilagha mwa Mwene.

¹⁵ Pachifukwa icha zizyo abatumiwa bakabombagha, abantu ababine bakanyamuliwa pakubuka nabo mulubazu ulwa misebo, bakabalambalika pavitala napa vibonde, umwakuti bo u Pitala akudumusannya umuzyezye wache ghungabafikila bamo.

¹⁶ Ivilundilo ivya bantu vikiza ukufuma mutwaya utukulu utwakupalamana nu Yelusalemu. Bakiza na babine, sona na babo bakaba ni mizimu imibibi mumwabo, po bosi bakapola.

Abatumiwa bakuvwimiwa

¹⁷ Po umuputi usongo poka na bamanyani bache aba mukabukatila aka ba Sadukayi bosi bakaba na kabini na batumiwa, po bakinong'ona pakubombapo chimo.

¹⁸ Bakabalema abatumiwa nukubighalila mujele.

¹⁹ Loli ubusiku bulabula uwantumi uwa Mwene akighula imilyango iya jele, yikabafumizya kuzi abatumiwa nukubabuzya ukuti,

²⁰ “Bukagha mu Nyumba iya Chala nukubabuzya abantu zyosi nizya bumi ubupya ubu.”

²¹ Abatumiwa bakivwila, po pandabindabi nkani bakabuka nukwinjila mu Nyumba iya Chala nukwanda pakumanyisya. Umuputi usongo na bamanyani bache bakabitizya abalongozi aba Chiyuda ku lukomano ulwa balongi, po bakatuma abantu kujele ukuti bize nabo abatumiwa pamaso papabo.

²² Loli bo abantu bala bafika kujele, batakabaghamo abatumiwa, po bakanyokela nukubabuzya abalongi ukuti,

²³ “Bo twafika kujele, tukagha yighaliliwe nkani, sona bope abalindilili bakaba maso pamilyango, loli bo twighula inyiyi, tutakamwaghamo nayumo umuntu!”

²⁴ Bo abaputi abasongo nu songo uwa basilikali aba Nyumba iya Chala bivwa zinizi, bakaswigha na zizyo zikababonekela abatumiwa.

²⁵ Po umuntu akiza nukubabuzya ukuti, “Ivwa kuno! Abantu babo mukabighalila mujele bali mu Nyumba iya Chala bakubamanyisya abantu.”

²⁶ Po usongo uwa basilikali aba Nyumba iya Chala akabuka poka na bantu bache pakubasenda abatumiwa. Loli batakabombezya amaka pachifukwa ichakuti bakanyilagha ukuti abantu bangabasumba na mabwe.

²⁷ Bakiza na batumiwa mulamula nukubimika pamaso pa balongi, po umuputi usongo akabalalusya akati,

²⁸ “Tukabachinyintizya nkani ukuti mutakamanyisyanje mwitabwa ilya muntu uyu. Loli ennya zizyo mwabomba! Ubumanyisi bwinyu bwasata mu Yelusalemu mosi, po sona mukulonda ukuti ibanda ilya muntu uyu libanje papitu!”

²⁹ U Pitala na batumiwa bamo bakamula bakati, “Tubaghiye tumwivwile u Chala, nukuchila ukuti tubivwile abantu.

³⁰ Amwe mukamughogha u Yesu pakumukomela pachipinjika, loli u Chala uwa banyenya bitu akamuzyusya kubufwe.

³¹ U Chala akamukwezya nukumubika munyobe izya nyobe yache indilo ukuti abanje Mulongozi nu Mupoki, pakubapa ulusako aba Izilayeli ukuti bapinduke nukuhobokeliwa imbibi zyabo.

³² Aswe twe bakaboni aba vintu vinivi—aswe nu Muzimu Umuzelu, yuyo chabupi icha Chala icha bantu babo bakumwivwila.”

³³ Bo abalongi bivwa zinizi, bakakalala nkani mupaka nukulonda ukuti abatumiwa bala baghoghiwe.

³⁴ Loli mu Falisayi yumo yuyo akaba we Gamaliyeli, akaba mumanyisi uwa Ndaghilo sona akachindikiwa nkani na bantu bosi akimilila pamaso pa balongi. Akalamula ukuti abatumiwa babafumye kuzi pakabalilo akanandi bulo,

³⁵ po akababuzya akati, “Mwee ba Izilayeli, muchebaye na zizyo mukubabombela abantu banaba.

³⁶ Mukukumbuka ukuti kale u Teyuda akaboneka, akalondagha ukuti abanje muntu mumanyikwe, umwakuti abantu papipi 400 bakamukonka. Loli akaghoghiwa, sona abakonki bache bosi bakanyampana, po akabukatila kache kakamalila palapala.

³⁷ Pisinda pazinizi, u Yudasi uwamu Galileya akaboneka pakabalilo kako abantu bakabelengiwanga. Akabadeba abantu ukuti bamukonke. Loli wepe bulo akaghoghiwa, sona abakonki bache bosi bakanyampana.

³⁸ Po pachifukwa chinichi nkubabuzya ukuti mutakababombele nachimochimo abantu banaba. Mubaleke babukaye! Nanti vivyo babatika nukubomba nyinong'ono bulo izya bantu, bakwiza pakupotwa,

³⁹ loli nanti vikufuma kwa Chala, mutangabapota. Mukwiza pakwennya mwebene ukuti mukulwana nu Chala!” Abalongi bakivwila zizyo u Gamaliyeli akanenagha.

⁴⁰ Bakabitizya abatumiwa bala ukuti binjile sona mulamula, bakabasyempa nukubachinyintizya ukuti batakanenele sona mwitabwa ilya Yesu, po bakabasatula.

⁴¹ Bo abatumiwa bepapo pamaso pa balongi, bakahoboka pakuti u Chala akinong'ona ukuti babaghiye pakuyimba pachifukwa icha Yesu.

⁴² Sona isiku ni siku bakendelela pakumanyisya nukulumbilila Amazyu Amiza mu Nyumba iya Chala na munyumba izya bantu ukuti u Yesu we Kilisitu.