Imbombo 4 - IBAYIBOLO 2024

U Pitala nu Yohani pamaso pa balongi aba Chiyuda

¹ Bo u Pitala nu Yohani bachili bakunena na bantu, abaputi bamo nu songo uwa basilikali aba mu Nyumba iya Chala, naba Sadukayi bamo bakafika.

² Bakakalala pachifukwa ichakuti abatumiwa babili bala bakabamanyisyanga abantu ukuti u Yesu azyukite kubufwe, chicho chikasimikizyanga ukuti abafwe bakwiza pakuzyuka nukuba nubumi sona.

³ Po bakabalema nukubighalila mujele mupaka indabi yache pakuti kukaba ukuti kwila kale.

⁴ Loli abinji babo bakivwa amazyu bakasubila. Sona ubwinji ubwa bitiki bukonjelela pakufika pa 5,000.

⁵ Indabi yache abalongozi aba Chiyuda, abasongo na bamanyisi aba Ndaghilo bakabungana mu Yelusalemu.

⁶ Bakakomana nu muputi usongo u Anasi poka nu Kayafa, nu Yohani, nu Alikizandala, sona na bamwabo babo bakaba bamunyumba iya muputi usongo.

⁷ Bakabimika abatumiwa pamaso papabo nukubalalusya ukuti, “Nkimba mukabomba bulibuli chinichi? Nkimba muli na maka ghoni, pamo mukabombelagha mwitabwa ilya wenu?”

⁸ U Pitala bo izuye nu Muzimu Umuzelu, akabamula akati, “Mwe balongozi aba bantu na basongo;

⁹ nanti tukulalusiwa ilelo nizya mbombo inyiza yiyo yikabombiwa pa muntu umulemazu namumo akapolela,

¹⁰ po mwebosi, sona naba Izilayeli bosi mumanyaye ukuti umuntu uyu imiliye pamaso papinyu apola ukwendela mumaka agha itabwa ilya Yesu Kilisitu uwamu Nazaleti yuyo mukamukomela pachipinjika, loli u Chala akamuzyusya kubufwe.

¹¹ U Yesu weyuyo Amasimbo ghakuti, ‘Ibwe lilyo mwe bazenga nyumba mukalikana, ilelo lyaba lyakulondiwa nkani ukuchila amabwe ghosi.’

¹² Mumwache mwene momumo muli ubupoki pakuti pachisu chosi ichapasi nayumo umuntu yuyo u Chala atupiye ukuti angatupoka.”

¹³ Abalongi bala bakaswigha pakwennya ubujivu ubwa Pitala nu Yohani, nukuzyaghannya ukuti bakaba bantu bulo, babo batakaba nu bumanyi nabumobumo. Po bakazyaghannya ukuti bakabanga poka nu Yesu.

¹⁴ Loli chitakabapo nachimochimo ichakunena pakuti bakamwennya umuntu, yuyo akapola imiliye palapala poka nu Pitala nu Yohani.

¹⁵ Po bakababuzya ukuti bepemo munyumba yiyo bakalongelaghamo inongwa, po bakanda pakunenezannya benebene.

¹⁶ Bakalalusya bakati, “Nkimba tubombe ichoni na bantu aba? Pakuti abantu bosi mu Yelusalemu bazimenye ukuti ichika ichikulu ichi chabombiwa nabo, sona tutangachikana.

¹⁷ Pakunyila ukuti ipangwi ili lingasata pakasi pabantu, zagha tuboghofye ukuti batakanenepo sona nu muntu yumo mwitabwa ilya Yesu.”

¹⁸ Po bakabitizya nukubachinyintizya ukuti batakanenepo pamo ukumanyisya mwitabwa ilya Yesu.

¹⁹ Loli u Pitala nu Yohani bakabamula bakati, “Mulonge mwebene, nkimba choni chicho chizapo pamaso pa Chala—ukubivwila amwe pamo ukumwivwila u Chala?

²⁰ Pakuti tutangaleka pakunena zizyo twiyenezya na maso ghitu, sona nukwiyivwila na makutu ghitu.”

²¹ Po abalongi bakabasoka nkani nukubaleka ukuti babukaye. Bakennya ukuti chitakababaghila ukuti bafundiwanje pakuti abantu bosi bakamupalizyanga u Chala pavivyo vikabombiwa.

²² Umuntu yuyo ichika chikabombeliwapo papache akaba na maka aghakuchila pa 40.

Abitiki bakwiputa ukuti babanje bajivu

²³ Bo u Pitala nu Yohani basatuliwa, bakanyokela ku kabukatila kabo nukubabuzya zizyo abaputi abasongo na balongozi aba Chiyuda banenite.

²⁴ Bo bivwa zinizi, bosi bakaba poka munyiputo kwa Chala nukuti, “Wee Mwene Uwamaka Ghosi ukapela kumwanya ni chisu ichapasi ni nyanja sona na vyosi vivyo vili mulamula!

²⁵ Nu Muzimu Umuzelu ukanena ukwendela mu munyenya witu u Devedi, umubombi wako ukati, ‘Nkimba abantu babo bate ba Yuda bakakalala choni. Nkimba choni chicho abantu bakabatikagha ivyamwalwe?

²⁶ Abamwene aba muchisu ichapasi bakiyannya bene sona abalaghili bakabungana poka pakumusambukila u Mwene nu Mupakiwa wache?’

²⁷ “Naloli, u Helodi nu Pontiyo Pilati bakakomana poka mukaya akakulu nkani kanaka na bantu babo bate ba Yuda, naba Izilayeli pakumusambukila u Yesu, umubombi wako umuzelu, Umupoki yuyo ukamupakazya pakuba we Mwene.

²⁸ Bakabungana poka pakubomba vyosi vivyo awe na maka ghako, sona nu bwighane bwako ukabatika ukuti vikwiza pakubombiwa.

²⁹ Polelo Mwene, wenelezye mumo bakutoghofesezya, po utwavwe aswe twe, babombi bako, pakulumbilila amazyu ghako nu bujivu nkani.

³⁰ Gholosya inyobe yako nukupozya abantu, sona witikizye ukuti ivimanyilo ni viswigho vibombiwe ukwendela mwitabwa ilya Yesu, umubombi wako umuzelu.”

³¹ Bo bamala pakwiputa, ubuzilo bubo bakakomanaghapo bukayingana. Bosi bakizula nu Muzimu Umuzelu nukwanda pakulumbilila amazyu agha Chala nu bujivu nkani.

Abitiki bakugabana ivintu vyabo

³² Akabukatila kosi aka bitiki kakaba ni nyinong'ono nu moyo ghoka. Nayumo umuntu uwa bantu banaba akanena ukuti ivintu vivyo akaba navyo, vyache mwene, loli bosi bakagabana vyosi vivyo bakaba navyo.

³³ Na maka amakulu nkani abatumiwa bakendelela pakusimikizya nizya kuzyuka kubufwe ukwa Mwene u Yesu. Po u Chala akapungulila ulusayo ulukulu nkani pa bosi.

³⁴ Atakabamo nayumo umuntu umupotwe mukabukatila kabo yuyo akasobeliwanga pakuti bamo babo bakaba ni nyumba na maghunda bakaghulizyanga nukubapa abatumiwa indalama zila.

³⁵ Po indalama zila bakagabila abatumiwa ukuyana namumo umuntu akasobeliwanga.

³⁶ Ukuyana namumo u Yosefu uwaluko ulwa Levi uwamu Sayipulasi, yuyo abatumiwa bakamwitizya ukuti Balanabasi (chicho chikung'anamula ukuti, “Yuyo akubakazya abamwabo.”)

³⁷ Akaghulizya umughunda wache, akiza ni ndalama nukubapa abatumiwa.