Imbombo 3 - IBAYIBOLO 2024

U Pitala akumupozya umuntu umulemazu

¹ Isiku limo u Pitala nu Yohani bakabukagha mu Nyumba iya Chala pakabalilo aka fili koloko pachamabwila, akabalilo aka nyiputo.

² Pamulyango uwa Nyumba iya Chala ghugho ghukitiziwanga ukuti Umulyango Umwiza pakabapo umuntu yuyo akapapiwa mulemazu. Isiku ni siku bakamunyamulagha nukumubika pamulyango ghula ukuti abalabaye abantu babo bakinjilagha mu Nyumba iya Chala.

³ Bo amwennya u Pitala nu Yohani bakwinjila mu Nyumba iya Chala, akabalaba ukuti bamupeko chimo.

⁴ Bakamwenelezya, po u Pitala akamubuzya akati, “Ennya kuno!”

⁵ Po akabennya nukusubila ukuti pamo akwiza pakupokela chimo kukwabo.

⁶ Loli u Pitala akamubuzya akati, “Inte ni ndalama nazimo, loli nkukupa chicho indi nacho: Mwitabwa ilya Yesu Kilisitu uwamu Nazaleti nkukulamula ukuti endagha!”

⁷ Po akamulema ni nyobe yache indilo nukumwavwa ukuti anyamuke. Panapo na panapo inyayo nu tupulung'unyu vikaba na maka;

⁸ akanyela, akimilila ni vinama vyache nukwanda pakwendakwenda. Po akinjila poka nabo mu Nyumba iya Chala bo akwenda nukunyelanyela, sona akumupala u Chala.

⁹ Bo abantu bosi bamwennya akwenda nukumupala u Chala,

¹⁰ bakamumanya ukuti weyuyo akikalagha pa Mulyango Umwiza uwa Nyumba iya Chala nukulabalaba. Bosi bakaswigha nkani, sona chicho chikamubonekela umuntu yula chikabamala nkani amahala.

Amazyu agha Pitala mu Nyumba iya Chala

¹¹ Bo umuntu yula achili amumiliye u Pitala nu Yohani muntanda yiyo bakayitizyanga ukuti Intanda iya Solomoni, abantu bakaswigha nkani nukubachimbilila.

¹² Bo u Pitala abennya abantu, akababuzya akati, “Mwee ba Izilayeli, nkimba choni chicho mukuswigha na zinizi, sona choni chicho mukutwenelezya? Nkimba mukwinong'ona ukuti sweswe twamwendezya umuntu uyu na maka ghitu pamo pachifukwa ichakuti tukumwiputa nkani u Chala?

¹³ U Chala uwa Abulahamu nuwa Yisaki sona nuwa Yakobo, u Chala uwa banyenya bitu weyuyo akamupa umubombi wache u Yesu ubuchindamu. Loli mukamubika munyobe izya balwani nukumukana pamaso pa Pilati, napapo u Pilati akalondagha pakumusatula.

¹⁴ Akaba Muzelu sona Mugholosu, loli mukamukana, po mukamulaba u Pilati ukuti ababulile ivyondongo lila.

¹⁵ Mukamughogha yuyo akupa ubumi, loli u Chala akamuzyusya kubufwe. Aswe twe bakaboni ba zinizi.

¹⁶ Umuntu uyu mukumwennya nukumumanya akapola pachifukwa icha lwitiko lwache mwa Yesu. Ivinama vyache vyaba na maka mwitabwa ilya Yesu ukuyana namumo mwebosi mukwenezya.

¹⁷ “Polelo bakamu bane, inzimenye ukuti zizyo amwe na balongozi binyu mukabomba kwa Yesu mukazibomba umwakusita kumanya.

¹⁸ U Chala akafumusya kale nkani ukwendela mu balaghuzi bosi ukuti u Kilisitu wache abaghiye pakuyimba; sona zikakwanilisiwa bunubu.

¹⁹ Muzileke imbibi zyinyu nukupindukila kwa Chala, ukuti azimye imbibi zyinyu. Nanti mukubomba bunubu u Mwene akwiza pakubapa akabalilo akakutuzikizya,

²⁰ sona akwiza pakubatumila u Yesu, yuyo akabasalila pakuba Mesiya winyu.

²¹ U Yesu abaghiye pakwikala ko kumwanya mupaka akabalilo kakwane akakuti ivintu vyosi viyaniziwe pakuba vipya ukuyana namumo u Chala akafingila kale ukwendela mu balaghuzi bache abazelu.

²² Pakuti u Mozesi akati, ‘U Mwene u Chala winyu akwiza pakubatumila umulaghuzi ukuyana namumo akantumila sona akwiza pakuba yumo uwa bantu binyu. Mubaghiye pakwivwila vyosi vivyo akababuzya pakubomba.

²³ Nanti umuntu yumo atakumwivwila umulaghuzi yulayula akwiza pakusabuliwako pakasi pabantu aba Chala nukumuzimizya.’

²⁴ Abalaghuzi bosi babo bakaba na mazyu agha Chala, ukwandila pakabalilo aka Samuweli mupaka na bosi babo bakiza pisinda, bope bakafumusya zizyo zikubombiwa mumasiku agha.

²⁵ Zizyo u Chala akalayizya ukwendela mu balaghuzi bache, zyinyu. Mwebenecho aba lufingo lulo u Chala akafinga na banyenya binyu ukuyana namumo akanenela kwa Abulahamu ukuti, ‘Ukwendela mu baluko lwako nkwiza pakubasaya abantu aba inko zyosi muchisu ichapasi.’

²⁶ Po u Chala akasala umubombi wache nukumutuma tasi kukwinyu, pakubasaya amwe ukuti umuntu wesi apinduke kuzila zyache izya bubibi.”