Imbombo 26 - IBAYIBOLO 2024

U Pabuli akwiyimila mwene pamaso pa Mwene u Agilipa

¹ U Agilipa akamubuzya u Pabuli akati, “Unganenapo wemwene.” Po u Pabuli akagholosya inyobe yache nukuyimila mwene ngati lo ulu:

² “Wee Mwene Agilipa! Nkwipima ukuti ne walusako ukuti ilelo nkwiyimila nemwene pamaso papako pavintu vyosi vivyo aba Yuda bakuntamantila,

³ nkaninkani pakuti umenye akiza inyiho izya Chiyuda na madali ghabo ghosi. Po nkukulaba ukuti unteghelezye nu bololo.

⁴ “Aba Yuda bosi babumenye ubumi bwane ukwandila ko kubwana bwane, sona bamenye namumo nikalilagha muchisu chitu, na mukaya aka Yelusalemu.

⁵ Bamenye ukwandila ko kubwandilo, nanti bakulonda bangasimikizya, ukuti ukwandila ko kubwandilo nikaye ngati ne mu Falisayi ukuyana ni ndaghilo izya chiputo chitu.

⁶ Po ilelo nimiliye pano pakulongiwa pachifukwa icha kulindilila ilayizyo lilyo u Chala akabalayizya abanyenya bitu.

⁷ Ichintu choka chicho inko izya bantu bitu 12 zikulindilila pakupokela, bo bakumuchindika u Chala nu moyo wabo ghosi umusanya nu busiku. Mwene, pachifukwa chinichi, nkulongiwa naba Yuda!

⁸ Choni chicho mwe bantu mwe muli pano mukuchagha chipalapala nkani pakusubila ukuti u Chala akwiza pakubazyusya abantu abafwe?

⁹ “Nane bulo nkinong'ona ukuti imbaghiye pakubomba chosi chicho ningabomba pakulisusya itabwa ilya Yesu uwamu Nazaleti.

¹⁰ Zyo zizyo nkabomba na mu Yelusalemu. Nkapokela ubulaghili ubwa baputi abasongo nukubighalila abantu abazelu aba Chala mujele, sona bo bakughoghiwa, nane bulo nkitikizyanga.

¹¹ Utubalilo utwinji nkabafundagha munyumba izyakwiputilamo nukuyezya pakubafyenga ukuti bamusamule u Yesu. Nkabakalalila nkani, umwakuti nkabuka na kutwaya bulo utwakuzi pakubavwima.

U Pabuli akulingannya nizya kupinduka kwache

¹² “Yikaba fundo yiniyi yiyo nkabukila mu Damasika nu bulaghili, sona ni ndaghilo izya baputi abasongo.

¹³ Mwene, bo izuba lyafika pamutu, bo indi muzila, nkennya ulukozyo ulwakulama nkani ukuchila ukulama ukwa izuba ukufuma kumwanya kukandamila na bantu babo nkendagha babo.

¹⁴ Twebosi tukawa pasi nukwivwa izyu likunena nane mu Chihebeli likuti, ‘Wee Sabuli, wee Sabuli! Choni chicho ukunvwima? Ukwivulazya wemwene ngati nkambaku yiyo yikubaya indisa iya mwenecho.’

¹⁵ Nkalalusya nkati, ‘Nkimba wewenu awe, Mwene?’ Po u Mwene akamula akati, ‘Nene Yesu, yuyo ukumuvwima.

¹⁶ Loli nyamuka nukwimilila. Nakubonekela ukuti nkubike pakuba mubombi wane nu kaboni uwa zizyo wazyennya nizya ane, sona na zizyo nkwiza pakukulanjizya muntazi.

¹⁷ Nkwiza pakukupoka muntamyo izya ba Izilayeli nizya bantu babo bate ba Yuda babo nkwiza pakukutumako

¹⁸ ukuti ubighule amaso, sona nukubefyamo muchisi ukuti bize mulukozyo, pakubefyako kumaka agha Satana ukuti bize kwa Chala, umwakuti imbibi zyabo zihobokeliwe, sona nukupokela ubuzilo pakasi pabantu, babo basaliwa pachifukwa icha lwitiko lwabo mumwane.’

U Pabuli akulingannya nizya mbombo yache

¹⁹ “Wee Mwene Agilipa, polelo intakakanapo ukwivwila ichisetuka chicho nkachennya kumwanya.

²⁰ Pakwanda nkalumbilila mu Damasika, ukufuma mula nkalumbilila mu Yelusalemu, sona na mosi mu Yudeya, na pakasi pabantu babo bate ba Yuda ukuti bazileke imbibi zyabo nukupindukila kwa Chala nukubomba ivintu vivyo vingalanjizya ukuti bapindukite naloli.

²¹ Ichi cho chifukwa aba Yuda bakandema, bo indi mu Nyumba iya Chala nukulonda pakungogha.

²² Loli mupaka ni siku ili u Chala anyavwanga. Po nimiliye pano pakubikila ubwakaboni pamaso pa mwebosi, na bana na pamaso pa basongo. Zizyo nkunena ziyanite bulo na zizyo abalaghuzi nu Mozesi bakanena ukuti zikwiza pakubombiwa,

²³ ukuti u Kilisitu abaghiye pakuyimba, sona akwiza pakuba wakwanda pakuzyuka mubantu abafwe, ukuti alumbilile ulukozyo ulwa bupoki ubwa ba Yuda nulwa bantu babo bate ba Yuda.”

²⁴ Bo u Pabuli akwiyimila mwene bunubu, u Fesita akanena na mazyu agha pamwanya akati, “Wee Pabuli, upenite bati! Ukumanyila kwako ukwapamwanya, kwakupennya.”

²⁵ U Pabuli akamula akati, “Awe, intapenite, we muchindikiwa Fesita! Zizyo nkunena zyanaloli.

²⁶ U Mwene u Agilipa avimenye akiza nkani ivintu vyosi vinivi, po ninganena nawe nu bujivu bosi. Nkusubila ukuti chitalipo nachimo chicho utachimenye pakuti ichintu ichi chitakabombiwa kubusyefu.

²⁷ Wee Mwene Agilipa, nkimba ukughasubila amazyu agha balaghuzi? Inzimenye ukuti ukusubila!”

²⁸ Po u Agilipa akamulalusya u Pabuli akati, “Nkimba ukwinong'ona ukuti pakabalilo akapimpa kanaka ungandeba pakuba mukilisitu?”

²⁹ U Pabuli akamula akati, “Napapo kabalilo kapimpa pamo katali, nkwiputa kwa Chala ukuti awe na bosi babo bakunteghelezya ilelo mubanje ngati nene, loli ukwefyako zyene impingu.”

³⁰ Po Umwene, umulaghili uwa chisu u Belenike na bantu bosi bakimilila,

³¹ bo bepapo bakanenezannya benebene bakati, “Umuntu uyu atanangite nachimochimo chicho angaghoghiwa nacho pamo ukubikiwa nacho mujele.”

³² U Agilipa akamubuzya u Fesita akati, “Umuntu uyu ngali asatuliwa nanti atakalondagha ukuti inongwa yache yilongiwe nu Kesale.”