Imbombo 25 - IBAYIBOLO 2024

U Pabuli pamaso pa Fesita

¹ Bo ghachilapo amasiku matatu ukwandila papo u Fesita akapyanililagha pabulaghili ubwa chisu, akabuka mu Yelusalemu ukufuma mu Kesaliya.

² Mulamula abaputi abasongo na balongozi aba Chiyuda bakiza kukwache nukumubuzya nizya nongwa iya Pabuli. Bakamulaba u Fesita,

³ ukuti abapelele ichisa pakumutuma u Pabuli ku Yelusalemu pakuti bakabatika ukuti bamughoghe muzila.

⁴ U Fesita akamula akati, “U Pabuli akusungiwa mujele mu Kesaliya, po ane nkulonda pakubuka kulakula losi ulu.

⁵ Baleka abalongozi binyu babuke poka nane ku Kesaliya nukunena inongwa iya muntu uyu kulakula, nanti anangite chimo.”

⁶ Bo u Fesita ikala nabo amasiku eyiti pamo teni, akabuka ku Kesaliya. Indabi yache akikala pachitengo ichakulongelapo inongwa nukulamula ukuti bize nu Pabuli pamaso papache.

⁷ Bo u Pabuli afika, aba Yuda babo bakafuma ku Yelusalemu bakamuzyungulila nukwanda pakumutamantila u Pabuli ivintu ivipalapala, vivyo bakapotwa pakuvisimikizya.

⁸ Loli u Pabuli akiyimila mwene pakunena ukuti, “Intanangitepo nachimochimo ukuyana ni Ndaghilo izya Chiyuda, pamo Inyumba iya Chala, pamo kwa Kesale.”

⁹ Loli u Fesita akalondagha pakubahobosya aba Yuda, po akamulalusya u Pabuli akati, “Nkimba ungalonda pakubuka ku Yelusalemu ukuti inongwa yako yilongiwe kulakula pamaso papane?”

¹⁰ U Pabuli akamula akati, “Nkwimilila pantazi pachitengo icha bulongi icha Kesale, kuko imbaghiye pakulongiwa. Ntabanangiyepo nachimochimo aba Yuda ukuyana namumo awe uzimanyiye.

¹¹ Po nanti nananga, pamo nabomba chimo chicho imbaghiye pakughoghiwa nacho, intakukana ukufwa. Loli nanti zizyo aba Yuda bakunena zite zyanaloli, atalipo na yumoyumo yuyo angambika munyobe zyabo. Nkulaba ukuti inongwa yane yilongiwe nu Kesale.”

¹² Bo u Fesita anenezannya na balongi abamwabo, akamula akati, “Walaba ukuti inongwa yako yilongiwe nu Kesale, po kwa Kesale, ko kuko ukwiza pakubuka.”

U Pabuli pamaso pa Agilipa nu Belenike

¹³ Bo pachilapo akabalilo, u Mwene u Agilipa nu Belenike bakiza kwa Kesaliya pakumupokela u Fesita.

¹⁴ Bo bikalako amasiku aminji kulakula, u Fesita akamulingannya u mwene u Agilipa nizya nongwa iya Pabuli akati, “Muno muli umuntu yumo yuyo u Felikisi akamuleka mujele.

¹⁵ Bo nabuka mu Yelusalemu abaputi abasongo na balongozi aba ba Yuda bakiza ninongwa yache, sona bakandaba ukuti indumule ukuti u Pabuli akananga.

¹⁶ Loli nkababuzya ukuti indaghilo izya Chiloma zitakwitikizya pakumubika umuntu munyobe izya banongwa yache, bo atakomanite nabo ukuti abanje nu lusako ulwakwiyimila mwene.

¹⁷ Bo biza kuno, intakataghapo akabalilo, loli indabi yache nkikala pachitengo ichakulongelapo inongwa nukulamula ukuti bize nu Pabuli pamaso papane.

¹⁸ Abanongwa yache bakimilila, loli batakamupapo nayimoyimo inongwa imbibi yiyo nkinong'onagha ukuti bangamupa.

¹⁹ Loli ukudalinkana kwabo kukaba kwakuyana nizya chiputo chabo, sona nizya muntu yumo u Yesu yuyo akafwa, loli u Pabuli akuti mumi.

²⁰ Bo napotwa pakubuzikizya ubwanaloli ubwa nongwa iyi, nkamulalusya u Pabuli nanti angalonda pakubuka ku Yelusalemu ukuti inongwa yache yilongiwe kulakula.

²¹ Loli u Pabuli akalaba ukuti bamusunge panandi mujele mupaka papo u Kesale adumule inongwa yache. Po nkalamula ukuti bamusunge mujele mupaka papo nkwiza pakumutuma kwa Kesale.”

²² U Agilipa akamubuzya u Fesita akati, “Nalondagha ukuti imwivwe nemwene umuntu uyu.” U Fesita akamula akati, “Indabi ukwiza pakumwivwa.”

²³ Indabi yache u Agilipa nu Belenike bakiza nu buchindamu ubukulu nukwinjila munyumba iyakukomanilanamo, poka na basongo aba basilikali na balongozi aba kaya kala. U Fesita akalamula ukuti bize nu Pabuli, po akiza nawe.

²⁴ U Fesita akati, “Wee Mwene Agilipa, na bantu bosi babo bali naswe muno: Mukumwennya umuntu uyu. Aba Yuda bosi muno na mu Yelusalemu bakandaba pakukolomoka ukuti atabaghiye pakuba nubumi.

²⁵ Loli ane intakumwagha ninongwa nayimoyimo yiyo abaghiye pakufwa nayo. Po pakuti umwenecho akalondagha ukuti inongwa yache yilongiwe nu Kesale, po nkadumula pakumutuma kulakula.

²⁶ Loli ane inte nazyo zimo izyanaloli izyakuti ningamusimbila u Kesale nizya yuyo. Po niza nawe pamaso papinyu, sona nkaninkani pamaso papako awe, mwene Agilipa, ukuti nanti wabuzikizya inongwa yache, ningaba nazyo izyakusimba.

²⁷ Pakuti chingaba chabupunganu kukwane ukutuma umukayidi ukusita ukunena inongwa yiyo anangite.”