Imbombo 24 - IBAYIBOLO 2024

U Pabuli pamaso pa Felikisi

¹ Bo ghachilapo amasiku fayivi, umuputi usongo u Ananiya akabuka ku Kesaliya na balongozi bamo aba Chiyuda, poka nu mwimilili panongwa yuyo akaba we Telitula. Bakiza pamaso pa Felikisi nukunena inongwa yiyo bakaba nayo pa Pabuli.

² Bo bamwitizya u Pabuli ukuti ime pantazi, po u Telitula akanda pakunena inongwa yache ngati lo ulu: “We muchindikiwa! Pasi pabulongozi bwako tukaba mumutende akabalilo akatali, sona ivyinji ivyiza vikubombiwa muchisu chitu pachifukwa icha bulongozi bwako ubwamahala.

³ Zinizi tukazipokela nu buhobosu nkani akabalilo kosi, sona posi na posi.

⁴ Intakulonda pakukutaghila akabalilo kako, loli pope bulo nkukulaba ukuti utupelele ichisa nukuteghelezya zizyo tukulonda pakunena mubupimpa.

⁵ Twamwagha umuntu uyu ukuti we ntamyo, yuyo akwandizya ivyongo pakasi paba Yuda pachisu chosi ichapasi, sona we mulongozi uwa kabukatila aka ba Nazalini.

⁶ Sona akayezyanga pakuyinyazya Inyumba iya Chala, po tukamulema.

⁸ Nanti wamulalusya umuntu uyu, awe wemwene ukwiza pakumanya chicho anangite.”

⁹ Aba Yuda bope bakinjililamo pakunena ukuti zyosi zinizi zikaba zyanaloli.

U Pabuli akunena amazyu aghakwipokela mwene pamaso pa Felikisi

¹⁰ Umulaghili uwa chisu akamusinizya u Pabuli ukuti anene, po u Pabuli akati: “Inzimenye ukuti ukaba mulongi uwa chisu ichi amaka aminji. Po nahoboka nkani ukuti niyimile nemwene pamaso papako.

¹¹ Awe wemwene ungamanya akiza nkani, ghatakachilapo na masiku 12, mumo nkabukila mu Yelusalemu pakwiputa.

¹² Abanongwa yane batakanyaghapo nkudalinkana nu muntu nayumoyumo mu Nyumba iya Chala, pamo ukwandizya ivyongo pakasi pabantu munyumba izyakwiputilamo, pamo pabuzilo nabumobumo mukaya aka.

¹³ Polelo batangasimikizya ukuti zizyo bakunena zyanaloli.

¹⁴ Loli ichintu chene chicho nkwitika chakuti nkumwiputa u Chala uwa banyenya bitu pakukonka Izila, yiyo bakunena ukuti yabumyasi. Nkusubila muvyosi vivyo visimbiwe mu Ndaghilo izya Mozesi, sona na mu mabuku agha balaghuzi.

¹⁵ Nkusubila mwa Chala ukuyana bulo namumo abene bakusubila ukuti abantu bosi abagholosu na babibi bakwiza pakuzyuka kubufwe.

¹⁶ Po akabalilo kosi nkuyezya pakubomba inyiza ukuti imbanje nu mabyebye umwiza pamaso pa Chala na bantu.

¹⁷ “Bo nikala akabalilo akatali kuzi ukwa Yelusalemu, nkanyokela kulakula ukuti imbuke imbape ivyabupi abantu bane, sona nukuti imbike ivyakwiyipa.

¹⁸ Akabalilo kako nkabombagha zinizi, bakanyagha mu Nyumba iya Chala, bo namalizya bulo pakubomba inyiho izyakwiswefya. Palapala patakabapo ichilundilo pamo ichongo.

¹⁹ Loli aba Yuda bamo aba muchigaba icha Asiya babo bali pano, abene bizaye pantazi papako nukunena nanti bali ninongwa nane.

²⁰ Pamo leka abantu babo bali pano banene bene inongwa yiyo banyagha nayo, bo nimiliye pamaso pa balongi,

²¹ loli ichintu chene chicho nkananga chingaba chakuti, bo nimiliye pamaso papabo nkakolomoka nkani ukuti, ‘Nkulongiwa namwe ilelo pachifukwa ichakuti nkusubila ukuti abantu abafwe bakwiza pakuzyuka kubufwe.’ ”

²² Po u Felikisi, yuyo akazimanya akiza nkani izya Zila iya Mwene, akayimika inongwa nukuti, “Bo u Lisiyasi, usongo uwa basilikali afika, nkwiza pakudumula inongwa yako.”

²³ Akamulamula usongo uwa basilikali yuyo akamwenelezyanga u Pabuli ukuti amwenelezyanje, loli utubalilo tumo amupanjeko ubusatuke nukubitikizya abamanyani bache ukuti bamupe ivyakusobelwa vyache.

U Pabuli pamaso pa Felikisi nu Dulusila

²⁴ Bo ghachilapo amasiku ghamo u Felikisi akiza nu muchi wache u Dulusila yuyo akaba mu Yuda. Akamwitizya u Pabuli nukumuteghelezya, bo akunena izya lwitiko mwa Kilisitu Yesu.

²⁵ Bo u Pabuli akunena nizya bugholosu, nizya kwilema, sona nizya Isiku lilyo u Chala akwiza pakubalonga abantu, u Felikisi akaba nubogha nukumubuzya ukuti, “Ungabuka losi ulu. Nkwiza pakukwitizya sona nanti nakagha akabalilo.”

²⁶ Pakabalilo kanako akinong'ona ukuti u Pabuli akwiza pakumubeka ni ndalama, cho chifukwa akamwitizyanga kabilikabili.

²⁷ Bo ghachilapo amaka mabili, u Polokiyo Fesita akapyana pa Felikisi ngati we mulaghili uwa chisu. U Felikisi akalondagha pakubahobosya aba Yuda, po akamuleka u Pabuli mujele.