Imbombo 23 - IBAYIBOLO 2024

¹ U Pabuli akenelezya abalongi bala nukuti, “Mwee bakamu bane, mupaka ilelo namubombela u Chala nu mabyebye wane umwiza.”

² Umuputi usongo u Ananiya akabalamula babo bakimilila papipi nu Pabuli ukuti bamukome pa mulomo.

³ Po u Pabuli akamubuzya akati, “Nawe u Chala akwiza pakukukoma, awe we lubumba ulwa ibanya. Wikaye panapo ukundonga ukuyana ni Ndaghilo izya Mozesi, loli nkimba choni chicho ukunanga Indaghilo pakubalamula ukuti bankome?”

⁴ Abantu babo bakimilila papipi nu Pabuli bakamubuzya bakati, “Choni chicho ukumutuka umuputi usongo uwa Chala.”

⁵ U Pabuli akamula akati, “Mwee bakamu bane, intazimenye ukuti we muputi usongo. Amasimbo ghakuti, ‘Mutakamutukaye umulaghili uwa bantu bako.’ ”

⁶ Loli bo u Pabuli ennya ukuti bamo aba mukabukatila kala bakaba ba Sadukayi, sona nukuti abanji bakaba ba Falisayi, akakolomoka nkani pamaso pa balongi akati, “Mwee bakamu bane, ane ne mu Falisayi umwana uwamu Falisayi. Indi pakulongiwa pano pachifukwa ichakuti nkusubila ukuti abafwe bakwiza pakuzyuka kubufwe.”

⁷ Bo anena bulo amazyu ghanagha, aba Falisayi naba Sadukayi bakanda pakudalinkana, sona ichilundilo chosi chikagabinkana.

⁸ (Pakuti aba Sadukayi bakatinji abantu batakwiza pakuzyuka kubufwe, sona nukuti abantumi ni mizimu vitaliko. Loli aba Falisayi bakasubila muvyosi vitatu ivi.)

⁹ Kukaba ichongo ichikulu nkani, po abamanyisi bamo aba Ndaghilo babo bakaba aba mukabukatila aka ba Falisayi bakimilila nukukana nkani ukuti, “Tutakuchagha nachimochimo chicho umuntu uyu anangite. Buli nanti umuzimu pamo uwantumi anenite nawe?”

¹⁰ Ukudalinkana kukendelela nkani, umwakuti usongo uwa basilikali akanyila ukuti bangamunyonkolannya bulo u Pabuli. Po akabalamula abasilikali bache ukuti babukaye ku bantu bala nukumupoka u Pabuli nukubuka nawe mwilinga.

¹¹ Ubusiku bulabula u Mwene akimilila papipi nu Pabuli nukumubuzya ukuti, “Utakanyilaye! Ukaba we kaboni wane mu Yelusalemu muno, po ubaghiye pakuba we kaboni wane sona na mu Loma bulo.”

Aba Yuda babatika nizya kumughogha u Pabuli

¹² Bo kwacha, aba Yuda bakabatika nizya kumughogha u Pabuli. Bakalapa kwa Chala ukuti batakwiza pakulya pamo ukung'wela kamo mupaka papo bamughogha u Pabuli.

¹³ Abantu babo bakabatika nizya kumughogha u Pabuli bosi poka bakachila pa 40.

¹⁴ Po bakabuka ku baputi abasongo na balongozi aba Chiyuda nukubabuzya ukuti, “Twalapa twebosi ukuti tutakwiza pakulya nakamo mupaka papo twamughogha u Pabuli.

¹⁵ Ilelo awe poka na balongi mutume amazyu kwa songo nkani uwa basilikali uwa Chiloma ukuti ize nu Pabuli kukwako ngati po ukulonda ukuti umanye akiza nkani nizya nongwa yache. Loli tukwiza pakwiyannya ukuti tumughoghe bo atafikite na kuno.”

¹⁶ Loli bo umwipwa uwa Pabuli ivwa nizya lubatiko lulalula, akinjila mwilinga nukumubuzya u Pabuli.

¹⁷ Po u Pabuli akamwitizya umusilikali usongo weka nukumubuzya ukuti, “Bukagha nu mulumendo uyu kwa songo uwa basilikali ali nawe na mazyu.”

¹⁸ Umusilikali yula akabuka nawe kwa songo uwa basilikali nukumubuzya ukuti, “Umukayidi u Pabuli anyitizizye nukuntuma ukuti nize nu mulumendo uyu kukwako pakuti ali na mazyu nawe.”

¹⁹ Usongo akamulema umulumendo yula panyobe, akabuka nawe palubazu nukumulalusya ukuti, “Nkimba ukulonda pakumbuzya ichoni?”

²⁰ Umulumendo yula akati, “Abalaghili aba Chiyuda bakivwana ukuti bakulabe ukuti indabi wize nu Pabuli kubuzilo ubwa Chiyuda ubwakulongela inongwa ngati po abalongi bakulonda bamanye akiza nkani nizya nongwa yache.

²¹ Loli utakabateghelezye pakuti balipo abantu abakuchila pa 40, babo bakwiza pakumuvwamilila u Pabuli ukuti bamughoghe. Balapa ukuti batakwiza pakulya pamo ukung'wela nakamo mupaka papo bamughogha. Losi ulu biyanizye kale ukuti bamughoghe, bakulindilila bulo kukwako ukuti udumule.”

²² Usongo uwa basilikali yula akati, “Utakamubuzyepo nayumo umuntu ukuti wambuzya zinizi.” Po akamubwezya umulumendo yula.

U Pabuli bakumutuma kwa Felikisi umulaghili uwa Chiloma

²³ Po usongo nkani uwa basilikali akitizya abasongo bache babili nukubabuzya ukuti, “Babuzye abasilikali 200 ukuti biyannye pakubuka ku Kesaliya na kabalilo aka nayini koloko pabusiku, poka na bakukwela ifalasi 70 na bampalala 200.

²⁴ Mumupe u Pabuli ifalasi zimo ukuti akwelepo, sona mwende nawe akiza mupaka ku mulaghili uwa Chiloma, u Felikisi.”

²⁵ Po usongo yula akasimba ukalata uyu:

²⁶ Ane ne Kalabudiyasi Lisiyasi, nkukulamuka awe muchindikiwa Felikisi umulaghili uwa chisu.

²⁷ Aba Yuda bakamulema umuntu uyu, sona bakaba papipi pakumughogha. Bo nazyaghannya ukuti akaba mwenekaya uwa Chiloma, po nkabuka na basilikali bane nukumupoka.

²⁸ Nkalondagha nkani ukuti imanye chicho akananga, po nkabuka nawe kubuzilo ubwakulongelako inongwa.

²⁹ Nkagha ukuti atanangite nachimochimo chicho abaghiye pakufwa nacho pamo pakubikiwa nacho mujele, loli nkagha ukuti kukaba kudalinkana bulo nizya lulaghilo lwabo.

³⁰ Sona bo nabuziwa ukuti abantu babatika nizya kumughogha, panapo na panapo nkamutuma kukwako. Nkababuzya abanongwa yache ukuti bize ninongwa yache pamaso papako.

³¹ Ubusiku bulabula abasilikali bakamusenda u Pabuli ukuyana namumo bakabuziliwa nukubuka nawe ku Antipatili.

³² Indabi yache abasilikali babo bakendagha pasi bakanyokela kwilinga nukubalekela babo bakakwela ifalasi ukuti bendelele pakwenda nawe.

³³ Bo bafika mu Kesaliya, bakabika ukalata kwa mulaghili uwa chisu nukumubika u Pabuli munyobe zyache.

³⁴ Umulaghili uwa chisu yula akabelenga ukalata nukumulalusya u Pabuli ukuti akafuma muchigaba choni. Bo azyaghannya ukuti akufuma mu Kilikiya,

³⁵ akati, “Nkwiza pakuteghelezya inongwa yako bo abanongwa yako bafika.” Po akalamula ukuti u Pabuli asungiwe munyumba iya mwene u Helodi.