Imbombo 16 - IBAYIBOLO 2024

U Timoti akubuka nu Pabuli nu Sila

¹ U Pabuli akenda mupaka kukaya akakulu nkani aka Delibe nu Lisitila. Mulamula mu Lisitila mukikalagha umumanyili yumo, yuyo akaba we Timoti. Unyina akaba mu Yuda umwitiki, loli uwise akaba mu Giliki.

² Abitiki bosi aba mu Lisitila na mu Ikoniya bakamupala u Timoti.

³ U Pabuli akalondagha ukuti u Timoti abuke poka nawe pabulendo bwache, po akamusilimula. Akabomba zinizi pachifukwa ichakuti aba Yuda bosi babo bakikala mubuzilo bula bakamanya ukuti uwise akaba mu Giliki.

⁴ Bo bakudumusannya mutwaya, bakabapa abitiki amalamulo, ghagho ghakapangiwa na batumiwa na basongo aba chipanga mu Yelusalemu nukubabuzya ukuti bendelele pakughakonka.

⁵ Po bunubu ivipanga vikaba na maka mulwitiko nukukula, po isiku ni siku akabukatila kakonjelelaghakonjelelagha.

U Pabuli akwennya ichisetuka mukaya akakulu nkani aka Tulowa

⁶ U Pabuli na bamanyani bache bakadumusannya muchigaba icha Filigiya na muchigaba icha Galatiya pachifukwa ichakuti u Muzimu Umuzelu atakabitikizya ukuti balumbilile amazyu muchigaba icha Asiya.

⁷ Bo bafika pampaka iya Misiya, bakayezya pakwinjila muchigaba icha Bitiniya, loli u Muzimu uwa Yesu atakabitikizya.

⁸ Po bakadumusannya muchigaba icha Misiya nukubuka mu Tulowa.

⁹ Pabusiku u Pabuli akennya ichisetuka mumo akennya umuntu uwa muchigaba icha Makedoniya imiliye nukumulaba ukuti, “Wize kuno ku Makedoniya ukuti utwavwe!”

¹⁰ Bo u Pabuli achennya bulo ichisetuka chila, panapo na panapo tukiyannya pakubuka ku Makedoniya pakuti tukinong'ona ukuti u Chala atwitizya ukuti tulumbilile Amazyu Amiza pakasi pabantu kulakula.

Nizya Lidiya mukaya aka Filipi

¹¹ Tukanyamuka nu bwato ubukulu mu Tulowa, tukagholoka bulo nukubuka mu Samotilaki, po indabi yache tukafika mu Neyapoli.

¹² Ukufuma kulakula tukabuka mu Filipi, akaya akakulu nkani muchigaba icha Makedoniya; sona abantu aba mukaya kalakala bakaba ba Chiloma. Tukikala amasiku aminji nkani mulamula.

¹³ Pisiku Ilyakutuzya tukepamo mukaya akakulu nkani kala nukubuka mulubazu ulwa lusoko, kuko tukinong'onagha ukuti kukabako ubuzilo ubwakwiputilako. Tukikala pasi nukunena na bakolo babo bakabungana kulakula.

¹⁴ Weka uwa babo bakateghelezyanga akaba we Lidiya uwa mukaya aka Tiyatila. Akaghulizyanga amenda amachesamile, sona akaba mukolo yuyo akamwiputagha u Chala. U Mwene akamwighula umoyo wache ukuti ateghelezye zizyo u Pabuli akanenagha.

¹⁵ Pisinda pache bo yuyo na bantu abamunyumba yache boziwa, akatwitizya aswe akati, “Nanti naloli mwanyennya ukuti ne mwitiki mwa Mwene, zagha mwikale munyumba yane.” Akatupepeka ukuti tubuke.

U Pabuli nu Sila bighaliliwa mujele mukaya aka Filipi

¹⁶ Isiku limo bo tukubuka kubuzilo ubwakwiputilako, tukakomana nu mulindu umuzya yuyo akaba nu muzimu umubibi ghugho ghukamupelagha ukuti anene ivya muntazi. Akamukabilagha umwene wache indalama inyinji nkani nu bulaghuzi bwache.

¹⁷ Akamukonka u Pabuli naswe, akukolomoka akati, “Abantu aba babombi aba Chala Uwakumwanya Nkani! Bakubabuzya mumo mungapokeliwa!”

¹⁸ Akabomba zinizi amasiku aminji, mupaka u Pabuli akakalala nkani, umwakuti akaghalabuka nukughubuzya umuzimu umubibi ghula ukuti, “Mwitabwa ilya Yesu Kilisitu nkukulamula ukuti ufumemo mumwache!” Panapo na panapo umuzimu umubibi ghula ghukepamo mumwache.

¹⁹ Bo abenecho aba mulindu yula bazyaghannya ukuti ulusako lwabo lulo bakakabilagha nalo indalama lwabuka, bakamulema u Pabuli nu Sila nukubawesela ku munalo ukuti bakomane na balaghili.

²⁰ Bakiza nabo pamaso pa balongi aba Chiloma nukuti, “Abantu aba ba Yuda, sona bali pakuvulungannya akaya kitu aka.

²¹ Bakumanyisya inyiho zizyo tutakwitikizya pamo ukuyezya pakuzikonka pakuti aswe twe ba Chiloma.”

²² Ichilundilo chope chikinjililapo pakubakoma u Pabuli nu Sila. Po abalongi bakazepulannya amenda agha Pabuli nu Sila nukubalamula ukuti basyempiwe.

²³ Bo babasyempa nkani bakabataghila mujele, po bakamulamula umulindilili uwa jele yula ukuti ighalile nkani.

²⁴ Pachifukwa icha lulaghilo lunulu, umulindilili yula akabinjizya muchipinda icha mukasi nkani nukupinyilila ivinama vyabo muvipimpi.

²⁵ Pakasi pabusiku u Pabuli nu Sila bakiputagha nukwimba inyimbo izya Chala, po abakayidi abamwabo bakabateghelezyanga.

²⁶ Umwakuchenusya bulo kukaba akasenyenta akakulu nkani, umwakuti kakaneng'ennya ulwalo ulwa jele yila. Panapo na panapo inyiyi zikighuka, sona zyope ni mpingu izya bakayidi bosi zikasatuka.

²⁷ Umulindilili yula akanyamuka. Bo ennya ukuti inyiyi izya jele zyighukite, akinong'ona ukuti abakayidi bachimbilamo. Po akawesa upanga wache nukulonda ukwighogha mwene.

²⁸ Loli u Pabuli akakolomoka nkani akati, “Utakivulazye! Twebosi tuli munumu!”

²⁹ Bo umulindilili uwa jele akitizya ukuti bamupe inyale, akachimbilila mukasi nukuwila munyayo izya Pabuli nu Sila bo akutetema.

³⁰ Po akabafumya kuzi nukubalalusya ukuti, “Mwe basongo, nkimba ningabomba choni ukuti impokiwe?”

³¹ Bakamwamula bakati, “Usubile mwa Mwene u Yesu Kilisitu, po awe poka ni mbumba yako mukwiza pakupokiwa.”

³² Po bakalumbilila amazyu agha Mwene kukwache, sona na ku bantu bosi abanji abamunyumba yache.

³³ Pakabalilo kalakala, umulindilili uwa jele akabasenda nukubasuka ivilonda vyabo. Panapo na panapo yuyo poka ni mbumba yache yosi bakoziwa.

³⁴ Po akamusenda u Pabuli nu Sila pakubuka nabo kunyumba yache nukubapa ichakulya. Yuyo poka ni mbumba yache bakahoboka nkani, pachifukwa ichakuti bakasubila mwa Chala.

³⁵ Abalongi bala bakatuma abasilikali abasongo nu lulaghilo ulwakuti, “Basatule abantu aba ukuti babukaye.”

³⁶ Po umulindilili uwa jele yula akamubuzya u Pabuli akati, “Abalongi balamula ukuti awe nu Sila musatuliwe. Munganyamuka nukubuka mumutende.”

³⁷ Loli u Pabuli akababuzya abasongo aba basilikali akati, “Abene bakatusyempela pachilundilo icha bantu loli ukusita ninongwa nayimoyimo, aswe twe ba Chiloma! Po bakatutaghila mujele. Po ilelo bakulonda ukutwefyamo chimyemye bulo? Awe, twakana! Baleke bize batwefye bene.”

³⁸ Abasilikali bakababuzya zinizi abalongi. Po bo bivwa ukuti u Pabuli nu Sila bakaba ba Chiloma bakanyila

³⁹ Abene bakabuka nukulambilizya kukwabo, po bakabefyamo mujele nukubabuzya ukuti babukaye.

⁴⁰ U Pabuli nu Sila bakepamo mujele nukubuka kunyumba iya Lidiya. Kulakula bakakomana na bitiki, bakanena amazyu aghakubakazya, po pabumalilo bakanyamuka nukubuka.