Imbombo 15 - IBAYIBOLO 2024

Ulukomano mu Yelusalemu

¹ Abantu bamo babo bakafuma muchigaba icha Yudeya bakabuka ku Antiyokiya nukwanda pakubamanyisya abitiki ukuti, “Mutangapokiwa pene papo mwasilimuliwa ukuyana ni Ndaghilo izya Mozesi.”

² U Pabuli nu Balanabasi bakanda pakudalinkana nabo nkani nizya fundo iyi. Po kukadumuliwa ukuti u Pabuli nu Balanabasi na bamwabo bamo aba mu Antiyokiya babukaye ku Yelusalemu nukunenezannya na batumiwa poka na basongo aba chipanga nizya fundo iyi.

³ Bakatumiwa ni chipanga, po bo bakwenda muchigaba icha Fonike, na mu Samaliya, bakabalingannya abantu mumo bantu babo bate ba Yuda bakapindukila kwa Chala; amazyu agha ghakabapa ubuhobosu ubukulu abitiki bosi.

⁴ Bo bafika mu Yelusalemu, bakapokeleliwa ni chipanga, na batumiwa, sona na basongo aba chipanga nukubabuzya zyosi zizyo u Chala akabomba ukwendela mumwabo.

⁵ Loli abitiki bamo babo bakaba aba mukabukatila aka ba Falisayi bakimilila nukuti, “Abantu babo bate ba Yuda basilimuliwanje nukubabuzya ukuti bakonkaye Indaghilo izya Mozesi.”

⁶ Abatumiwa na basongo aba chipanga bakakomana poka ukuti banenezannye nizya fundo yila.

⁷ Bo banenezannya akabalilo akatali, u Pitala akimilila nukuti, “Mwee bakamu bane, muzimenye ukuti kale u Chala akansala mumwinyu ukuti indumbilile Amazyu Amiza pakasi pabantu babo bate ba Yuda ukuti bivwe nukusubila.

⁸ U Chala yuyo aghumenye umoyo uwa muntu wesi, akasimikizya kukwabo pakubapa u Muzimu Umuzelu ukuyana namumo akatupelela aswe.

⁹ U Chala atakatulekannya nabo; akabahobokela imbibi zyabo, pachifukwa ichakuti bakasubila.

¹⁰ Po choni chicho mukulonda pakumuyela u Chala pakubapinyilila ikoli musingo abamanyili, lilyo abanyenya bitu pamo aswe twebene tukapotwa pakulinyamula?

¹¹ Awe! Tukusubila ukuti tukwiza pakupokiwa ukwendela muchisa icha Mwene u Yesu ukuyana namumo abantu babo bate ba Yuda bakwiza pakupokeliwa.”

¹² Ichilundilo chosi chikaba myee, bo chikuteghelezya zizyo u Balanabasi nu Pabuli bakubalingannyanga nizya vyika ni viswigho vyosi vivyo u Chala akabomba pakasi pabantu babo bate ba Yuda ukwendela mumwabo.

¹³ Bo bamala pakunena, u Yakobo akati, “Mwee bakamu bane, munteghelezye!

¹⁴ U Simoni alingannya bulo mumo u Chala akabasungilila abantu babo bate ba Yuda pakubapaghula abantu bamo mumwabo ukuti babanje bantu bache.

¹⁵ Zinizi zikwitikizannya na mazyu agha balaghuzi. Pakuti Amasimbo ghakuti,

¹⁶ ‘U Mwene akati: Pisinda pazinizi nkwiza pakunyokela nukunyosezyamo, ubumwene ubwa Devedi, bubo bukawa. Nkwiza pakuzenga sona ichisami chache nukuchiyannya pakuba sona chamaka nkani.

¹⁷ Abantu abakusyala bosi bakwiza pakundonda, sona na bantu bosi babo bate ba Yuda bakwitiziwa ni tabwa lyane.

¹⁸ Po u Mwene akunena bunubu, yuyo akavumbula ivintu vinivi kale.’

¹⁹ “Cho chifukwa nkuti tutakabatamyanje abantu babo bate ba Yuda babo bakupindukila kwa Chala.

²⁰ Loli tubasimbile ukalata uwakuti batakalyanje ivyakulya vivyo vinyazu pachifukwa ichakuti vyabikiwa ku vifwani ukuti chibanje chakwiyipa; ukuti batakabombaye ubwamalaya, ukuti batakalyanje ichinyamana chicho chanyongiwa bulo, sona batakalyanje ibanda.

²¹ Pakuti Indaghilo izya Mozesi zyabelengiwa akabalilo akatali munyumba izyakwiputilamo Isiku ni siku Ilyakutuzya, sona amazyu ghache ghope ghalumbililiwe muvyisu vyosi.”

Abantu babo bate ba Yuda babasimbila ukalata

²² Po abatumiwa, na basongo aba chipanga, poka ni chipanga chosi, bakinong'ona pakusala abantu bamo mukabukatila kabo nukubatuma ku Antiyokiya poka nu Pabuli nu Balanabasi. Bakasala u Yudasi yuyo akwitiziwa ukuti we Balasabasi nu Sila babo bakaba bakuchindikiwa nkani na bitiki,

²³ nukubatuma nu kalata uyu: “Aswe, twe batumiwa poka na basongo aba chipanga, abakamu binyu, tukubalamuka amwe mwe bakamu bitu, bantu babo bate ba Yuda mwebosi, babo bakwikala mu Antiyokiya, Siliya na mu Kilikiya.

²⁴ Twivwa ukuti abantu bamo aba mukabukatila kitu bakabatamya nukubavulungannya amwe pavintu vivyo bakanena. Loli tute sweswe tukabatuma ukuti babombe bunubu.

²⁵ Po tukakomana poka nukwivwana pakusala abantu bamo nukubatuma kukwinyu. Bakwiza poka na bamanyani bitu abaghaniwa u Balanabasi nu Pabuli,

²⁶ babo bakabika ubumi bwabo pachulu pachifukwa icha mbombo iya Mwene witu u Yesu Kilisitu.

²⁷ Po tukubatumila amwe u Yudasi nu Sila, babo bakwiza pakubabuzya pamaso na pamaso zizyo twasimba mukalata uyu.

²⁸ U Muzimu Umuzelu, sona naswe twivwana ukuti tutakabanyamulizye ukatundu uyunji ukuchila pandaghilo zizyo zikulondiwa izyakuti:

²⁹ Mutakalyanje ichakulya chicho chibikiwe ku vifwani ukuti chibanje chakwiyipa; mutakalyanje ibanda, mutakalyanje ichinyamana chicho chanyongiwa bulo, sona mutakalowaye. Mukwiza pakubomba akiza nanti mukuvileghuka ivintu vinivi. Musyale akiza.”

³⁰ Abantu babo bakatumiwa, bakafika mu Antiyokiya. Kulakula bakachibungannya poka ichipanga chosi nukubapa ukalata yula.

³¹ Bo abantu babelenga ukalata yula, bakahoboka na mazyu agha lukazyo ghala.

³² U Yudasi nu Sila, babo bakaba balaghuzi, bakanena nabo mazyu aminji agha lukazyo nukubapa amaka.

³³ Bo bikalako amasiku aminji kulakula, abantu bala bakabanyosya mumutende ku bantu babo bakabatuma.

³⁵ U Pabuli nu Balanabasi bakendelela pakwikala mu Antiyokiya ukumanyisya nukulumbilila amazyu agha Mwene, poka na bawamwabo abanji abinji.

U Pabuli nu Balanabasi bapaghunkana

³⁶ Bo ghachilapo amasiku amanandi u Pabuli akamubuzya u Balanabasi akati, “Zagha tunyokele nukubendela abakamu bitu mukaya kosi akakulu kako tukalumbililamo amazyu agha Mwene, sona twennye mumo bakwikalila.”

³⁷ U Balanabasi akalondagha ukuti u Yohani Maliko abuke poka nabo,

³⁸ loli u Pabuli akinong'ona ukuti chitangaba chizapo pakumusenda pachifukwa ichakuti akabatoloka mu Pamfiliya, sona atakendelela pakubomba nabo imbombo yabo.

³⁹ Po bakadalinkana nkani, umwakuti bakapaghunkana: U Balanabasi nu Maliko bakakwela mubwato nukubuka ku Sayipulasi.

⁴⁰ Loli umwene Pabuli akasala u Sila. Bo abitiki bababika munyobe izya Mwene, bakabuka.

⁴¹ Akadumusannya mu Siliya na mu Kilikiya pakuvikazya ivipanga.