Imbombo 10 - IBAYIBOLO 2024

U Pitala nu Kolineliya

¹ Mukaya aka Kesaliya mukabamo umuntu yumo yuyo akaba we Kolineliya, yuyo akaba we songo uwa basilikali aba Chiloma, akabukatila kako bakatinji, “Akabukatila aka Itale.”

² Umwene ni mbumba yache yosi bakaba bantu abakumwiputa u Chala. Akabomba imbombo inkulu pakubavwa bantu abapina aba Chiyuda, sona akabalilo na kabalilo akamwiputagha u Chala.

³ Isiku limo akabalilo aka fili koloko pachamabwila akennya ichisetuka. Muchisetuka chilachila akamwennya akiza nkani uwantumi uwakumwanya uwa Chala akwiza kukwache nukuti, “Kolineliya!”

⁴ Akamwenelezya uwantumi yula nubogha nukumulalusya ukuti, “Wee Mwene, nkimba cho choni ichi?” Uwantumi akamula akati, “U Chala ahobokite ni nyiputo zyako, sona akumbuka imbombo zyako inyiza pakasi pabantu abapina.

⁵ Po losi ulu utume abantu bamo mu Yopa ukuti bamwitizye umuntu yumo yuyo we Simoni Pitala.

⁶ Umuntu uyu muyeni munyumba iya Simoni, umuvukutamakwela, yuyo akwikala mulubazu ulwa nyanja.”

⁷ Bo uwantumi yuyo akanenagha nawe abuka, u Kolineliya akabitizya abambombo bache babili, poka nu musilikali, yuyo akaba muntu uwakumwiputa u Chala.

⁸ Bo u Kolineliya abalingannya zyosi zizyo zikabombiwa, akabatuma mu Yopa.

⁹ Indabi yache, bo bali muzila, sona bo bakupalamila mu Yopa, u Pitala akakwela pachisonje ukuti ipute bo izuba lili pamutu.

¹⁰ Izala yikamubaba po akalonda ichakulya. Loli bo bali pakuyannya ichakulya, akennya ichisetuka.

¹¹ Akennya kumwanya kwighukite, sona ichintu chimo chicho chikaboneka ngati chimwenda ichikulu, chicho chikalemiwa munkuto zyache zyosi folo chikwisiwa pasi.

¹² Mulamula mukaba ivinyamana ivyakulekanalekana; ivinyamana ivya vinama folo, ni vyakwavula, sona ni viyuni.

¹³ Po izyu likivwika likati, “Pitala, nyamuka. Ghogha ulye.”

¹⁴ Loli u Pitala akati, “Mwene, awe! Intaliye nalumolumo ichintu chicho chamwiko sona chinyazu.”

¹⁵ Izyu lila likivwika sona likati, “Chicho u Chala achipaghula ukuti chizelu, utakinong'onaye ukuti chinyazu.”

¹⁶ Zinizi zikabombiwa katatu, panapo na panapo ichimwenda chila chikasendiwa pakunyokela kumwanya.

¹⁷ Bo u Pitala akuswigha nizya ching'anamulo icha vintu vivyo akavyennya muchisetuka chila, abantu babo bakatumiwa nu Kolineliya bakamanya kuko inyumba iya Simoni yikaba. Po bakimilila pamulyango uwa lupaso.

¹⁸ Bakitizya nukulalusya ukuti, “Nkimba aliko kuno, umuyeni yumo, yuyo itabwa lyache we Simoni Pitala?”

¹⁹ Bo u Pitala achili akuyezya pakwivwisya iching'anamulo icha chisetuka chila, u Muzimu Umuzelu akati, “Ivwa kuno! Abantu batatu bali kuno bakukulonda.

²⁰ Po nyamuka nukwika, sona ubuke nabo umwakusita ukuzyelazyela pakuti nene nabatuma.”

²¹ Po u Pitala akika nukubabuzya abantu bala ukuti, “Umuntu yuyo mukumulonda, nene. Nkimba choni chicho mwiza kuno?”

²² Bakamula bakati, “Usongo u Kolineliya atutuma. Umwene muntu mugholosu, yuyo akumwiputa u Chala, sona achindikiwe nkani naba Yuda bosi. Uwantumi uwakumwanya uwa Chala akamubuzya ukuti akwitizye awe ukuti ubuke kunyumba yache, ukuti ivwe zizyo ukulonda pakunena.”

²³ U Pitala akabapokela abantu bala munyumba mula pakuba bayeni bache. Indabi yache akanyamuka nukubuka nabo, sona bope abitiki bamo aba mu Yopa bakabuka poka nawe.

²⁴ Indabi yache akafika mu Kesaliya, kuko u Kolineliya akamulindililagha, poka na bakamu bache, sona na bamanyani babo akabitizya.

²⁵ Bo u Pitala ali papipi pakwinjila, u Kolineliya akiza ukuti amupokele. Po akamufughamilila muvinama vyache.

²⁶ Loli u Pitala akamunyamusya nukuti, “Imilila, ane ne muntu bulo.”

²⁷ U Pitala akendelela pakunena kwa Kolineliya, bo akwinjila munyumba, mumo akabagha abantu abinji babunganite poka.

²⁸ Akababuzya akati, “Amwe mwebene muzimenye akiza nkani ukuti umu Yuda atakwitikiziwa pakwendelana pamo ukwangalilana na bantu babo bate ba Yuda. Loli u Chala andanjizya ukuti umuntu yuyo amupaghula ukuti muzelu intakamupimaye pakuba muntu yuyo ate muzelu pamo munyazu.

²⁹ Bo wanyitizya intakazyelazyelapo pakwiza, loli nkulonda pakuti imanye ichifukwa chicho ukanyitizizya?”

³⁰ U Kolineliya akati, “Amasiku matatu ghagho ghachilapo, pakabalilo ngati ko kanaka, aka fili koloko pachamabwila, bo nkwiputa munyumba yane, umwakuchenusya umuntu yumo yuyo akavwala amenda amazelu akimilila pamaso papane

³¹ nukumubuzya ukuti, ‘Wee Kolineliya! U Chala ivwa inyiputo zyako, sona akumbuka imbombo zyako inyiza pakasi pabantu abapina.

³² Po tuma umuntu yumo mu Yopa ukuti amwitizye u Simoni Pitala. Muntu muyeni munyumba iya Simoni, umuvukutamakwela, yuyo akwikala mulubazu ulwa nyanja.’

³³ Panapo na panapo nkakutumila amazyu, po chaba chiza nkani ukuti wiza. Polelo twebosi tuli pano pamaso pa Chala tukulindilila ukwivwa chosi chicho u Mwene akulinganizye pakunena.”

Amazyu agha Pitala

³⁴ U Pitala akanda pakunena akati, “Ilelo nazyaghannya ukuti naloli u Chala atakwennya icheni icha muntu,

³⁵ loli akumupokela umuntu wesi yuyo akumwiputa nukubomba chicho chigholosu ukusita pakwennya uluko lwache.

³⁶ Mughamenye amazyu ghagho u Chala akabatumila aba Izilayeli, pakubabuzya Amazyu Amiza aghamutende ukwendela mwa Yesu Kilisitu, yuyo we Mwene uwa bosi.

³⁷ Muvimenye ivintu ivikulu vivyo vikabombiwa muchisu chosi icha Izilayeli, ukwandila muchigaba icha Galileya, bo u Yohani alumbilila ukuti abantu boziwe.

³⁸ Muzimenye izya Yesu uwamu Nazaleti, sona namumo u Chala akamupakazya nu Muzimu Umuzelu na maka. Akabuka kosi na kosi, akabomba inyiza nukupozya abantu bosi babo bakaba pasi pabulaghili ubwa Satana, pakuti u Chala akaba nawe.

³⁹ Aswe twe bakaboni aba vyosi vivyo akabomba mu Izilayeli na mu Yelusalemu. Polelo bakamughogha pakumukomela pachipinjika.

⁴⁰ Loli u Chala akamuzyusya kubufwe bo ghachilapo amasiku matatu nukumulanjizya pabuzelu.

⁴¹ Atakababonekela abantu bosi, loli abakaboni bene babo u Chala akabasala kale, kokuti aswe sweswe tukalya nukung'wela poka nawe bo azyuka kubufwe.

⁴² Po akatulamula ukuti tulumbilile Amazyu Amiza pakasi bantu nukubasimikizya ukuti weyuyo u Chala amusalite pakuba mulongi uwa bantu abumi na bafwe.

⁴³ Abalaghuzi bosi bakasimikizya nizya yuyo, ukunena ukuti umuntu wesi yuyo akusubila mumwache, u Chala akwiza pakumuhobokela imbibi zyache ukwendela mwitabwa lyache.”

Abantu babo bate ba Yuda bakupokela u Muzimu Umuzelu

⁴⁴ Bo u Pitala achili akunena, u Muzimu Umuzelu akabikila bosi babo bakateghelezyanga amazyu ghache.

⁴⁵ Abitiki aba Chiyuda babo bakafuma mu Yopa poka nu Pitala bakaswigha ukuti u Chala apungulila ichabupi chache icha Muzimu Umuzelu mubantu babo bate ba Yuda bope.

⁴⁶ Pakuti bakabivwa bakunenela mundimi injeni nukubupala ubukulu ubwa Chala. U Pitala akati,

⁴⁷ “Abantu banaba bapokela u Muzimu Umuzelu ukuyana namumo naswe bulo tukapokelela. Nkimba alipo umuntu yumo yuyo angabakanizya pakoziwa na mizi?”

⁴⁸ Po akabalamula ukuti boziwe mwitabwa ilya Yesu Kilisitu. Sona bakamulaba ukuti ikale nabo amasiku amanandi bulo.