Hoseya 9 - IBAYIBOLO 2024

Ulufundo paba Izilayeli

¹ Mwee ba Izilayeli mutakahobokaye, mutakasekelaye ngati mumo zikubombela inko izinji. Pakuti mutakaba mwe basubiliwa kwa Chala winyu, mughaghanite amalipilo agha bamalaya, pabuzilo ubwa kukomelapo inyinulo.

² Loli apakukomelapo inyinulo sona ni chakukamilamo uvinyo, vitakwiza pakubalela abantu. Mutakwiza pakuba sona nu vinyo umupya uwa kung'wela

³ Batakwiza pakulekiwa muchisu icha Mwene. U Izilayeli akwiza pakunyokela ku Ijiputi nukulya ichakulya ichinyazu mu Asiliya.

⁴ Batakwiza pakubika ichakwiyipa icha vinyo kwa Mwene pamo pakubika ivyakwiyipa vivyo vikumuhobosya. Ivyakwiyipa vinivi vikuba ngati cho chibama, icha bantu abakulila. Abantu bosi banaba babo bakulya chinichi babanje banyazu. Ichakulya chinichi chikuba chazala yabo. Te chakubikiwa mu Nyumba iya Mwene.

⁵ Nkimba mukwiza pakubomba ichoni pisiku ilya lusekelo lila, Pisiku ilya lusekelo ulwa Mwene?

⁶ Napapo bangakulyegha ukunanganika, ichisu icha Ijiputi chikwiza pakubabungannya, po abantu aba mu Memufisi bakwiza pakubasyila. Usiliva wabo akwiza pakuvwinka amivwa, sona amivwa ghakwiza pakumela muvisakasa vyabo.

⁷ Amasiku aghakufundiliwa ghafikila, ghope amasiku agha muvwalo ghafikila. Aba Izilayeli bazimanye zinizi. Pachifukwa ichakuti imbibi zyinyu nyinji nkani, sona lope ulubengo lwinyu lukulu, po mukuti umulaghuzi mupunganu, wepe umuntu yuyo akulongoziwa nu muzimu apenite.

⁸ Umulaghuzi we mulindilili uwa Efulayimu, poka nu Chala wane. Loli bamuteghite ivipingo muzila, sona lope ulubengo luli mu Nyumba iya Chala wache.

⁹ Naloliloli abantu banaba baba bamabeko nkani, ngati masiku agha Gibeya. U Chala akwiza pakubukumbuka ububibi bwabo, po akwiza pakubafunda pachifukwa icha mbibi zyabo.

¹⁰ “Bo namwagha u Izilayeli nkaba ngati naghagha amampesya munkolongo. Bo nkubennya aba banyenya, nkaba ngati po nkuvyennya ivikomwa ivya kwanda ivya makuyu. Loli bo biza pighamba ilya Baala Pewoli bakipaghulila bene ichifwani icha nkozyasoni, sona mukaba ngati chintu icha mwiko chicho mukachighana.

¹¹ Ubuchindamu ubwa Efulayimu bukwiza pakubuluka ngati chiyuni, batakwiza pakupapa, bope abachi babo batakwiza pakuba, nulwanda sona batakwiza pakumelagha ulwanda.

¹² Napapo bangabalela abana, nkwiza pakubasenda. Chighune nkani ku bantu banaba, bo nepukako kukwabo!

¹³ Nkubennya aba Efulayimu ngati kaya aka Tile, kabyaliwe mubuzilo ubwiza, loli u Efulayimu akwiza na bana bache pakughoghiwa.”

¹⁴ Wee Mwene, ubapanje nkimba ungabapa ichoni? Ubapanje inyanda zizyo zikwepa, sona na mabele ghagho ghatakufuma ulukama.

¹⁵ “Nkubabenga pachifukwa icha bubibi bubo babomba muchisu icha Giligali, sona na pachifukwa icha mbombo imbibi zizyo babomba, po nkwiza pakubefyamo munyumba yane. Ane ntakwiza pakubaghana nalumo sona. Abalongozi babo bosi basambuke.

¹⁶ Aba Efulayimu badumuliwa, igululuzi lyabo lyuma, batangapa sona ivikomwa. Napapo bangapapa abana, nkwiza pakubaghogha abana babo abaghaniwa.”

¹⁷ U Chala wane akwiza pakubapa inkonto, pachifukwa ichakuti batamwivwila. Bakwiza pakwendakwendagha bulo pakasi pa inko.