Hoseya 8 - IBAYIBOLO 2024

Aba Izilayeli bakwiza pakwinula ukankungu

¹ U Mwene akuti Lizya ipati! Izwanga lili pachisonje icha Nyumba iya Mwene, pachifukwa ichakuti abantu balunangannya ulufingo, sona balusambukiye ululaghilo lwane.

² Aba Izilayeli bakundilila bakuti, Wee Chala witu, aswe tukumenye!

³ Loli aba Izilayeli bachikana chicho chiza, po umulwani akwiza pakubachimbizya.

⁴ Aba Izilayeli bakwiyimikila bene abamwene bo batambuzikizizye, sona bakwisalila amakambala bo ntabitikizizye. Nu siliva sona nu golide wabo bakwipangila bene ivifwani, vivyo vikwiza pakubanangannya.

⁵ Mwee bantu aba mu Samaliya, vitaghe ivifwani vyinyu ivya ngwata! Ubukali bwane bukwaka papabo. Nkimba pakwiza pakwendapo kabalilo koni, ukuti abantu banaba biswefye?

⁶ Nkimba ichifwani chinichi chitafuma mu Izilayeli? Chapangiwa nabafundi bulo. Te we Chala, awe, ichifwani ichakubiziwa mu Samaliya chila, chikwiza pakutiziwa mutuvigaba.

⁷ “Aba Izilayeli bakapesa impepo, nukwinula ukankungu. Amapelele ghatakwela nachimochimo, ghatakwiza pakubapa ubusu. Nanti ghakelagha abayeni ngali bakalya ichakulya.

⁸ U Izilayeli bamumila. Ilelo ali pakasi pabantu aba inko, ali ngati chibombelo chicho chite ni mbombo.

⁹ Pakuti babuka kwa Asiliya, ngati yo mpunda yiyo yikwendakwenda bulo yene. U Efulayimu akabalipila indalama kubaghaniwa bache.

¹⁰ Napapo bakalipila indalama pakasi pa inko izinji, nkwiza pakubabungannya poka. Po bakwiza pakuba badedebazu nkani pachifukwa icha kuyiviwa nu mwene wamaka uwamu Asiliya.

¹¹ “Napapo u Efulayimu akazenga ivighemo ivyinji nkani, pachifukwa icha chakwiyipa icha mbibi, Vinivi vyaba vighemo ivyakunangilapo.

¹² Nkabasimbila ivintu ivyinji nkani ivya ndaghilo zyane, loli bakavipima pakuba ngati po vintu viyeni.

¹³ Bakubika ivyakwiyipa kukwane, nukulya inyama yila, loli u Mwene atakuhoboka navyo. Ilelo nkwiza pakubukumbuka ububibi bwabo sona nkwiza pakubafunda pachifukwa icha mbibi zyabo. Po bakwiza pakunyokela kuchisu icha Ijiputi.

¹⁴ Aba Izilayeli bamuluvizye umupeli wabo, nukuzenga inyumba inkulu izya bumwene. U Yuda abalizya utwaya utukulu nkani utwa malinga. Loli Nkwiza pakutuwisizya umoto, ghugho ghukwiza pakughalungulizya amalinga ghabo.”