Hoseya 7 - IBAYIBOLO 2024

¹ Bo nkuti imbapozye abantu bane aba Izilayeli, zyope imbibi izya Efulayimu zikaboneka pabuzelu, imbombo imbibi izya Samaliya zikavumbuliwa. Abantu bakubomba bo buzimbuli bwene, abiba bakupankula inyumba izya bantu, sona amavyondongo ghakwiba muminalo.

² Loli batakuzyaghannya, ukuti nkuzikumbuka imbombo zyabo zyosi imbibi. Imbibi zyabo zikubamila, akabalilo kosi bali pamaso papane.

³ Bakumuhobosya u mwene nu bubibi bwabo, sona bakughahobosya amakambala na mazyu aghabumyasi.

⁴ Bosi balowe, sona bakwaka ngati moto uwa muvuno, umoto wache ghugho umupiyi atangasonkelezya mupaka ichinyenya chitutumuke.

⁵ Pisiku ilya lusekelo ulwa mwene witu, amakambala ghakukolwa nu vinyo, sona akubapoka na bantu abalobezyo.

⁶ Amoyo ghabo ghakocha ngati muvuno, sona bakupalamila kukwache umwabuzimbuli. Ubukali bwabo bukwaka panandipanandi busiku bosi, sona pandabindabi bukwaka ngati moto.

⁷ Abantu bosi banaba bakocha nkani ngati muvuno, sona bakubaghogha abalaghili babo. Abamwene babo bosi baghuye, loli atalipo nayumoyumo pakasi papabo, yuyo akunyitizya ukuti imwavwe.

⁸ Aba Efulayimu bakwiyongannya na bantu aba inko izinji, sona bali ngati chitumbuwa ichipapate chicho chipiye ulubazu loka bulo.

⁹ Abayeni bakumumala amaka, loli atakuzyaghannya. Kumutu wache kuli ivwi zyene, loli atakuzimanya.

¹⁰ Ukwitutumula ukwa Izilayeli kukumususya, loli atakunyokela kwa Mwene u Chala wache pamo pakumulondalonda, napapo zyosi zinizi zikumubonekela.

¹¹ Aba Efulayimu bali ngati yo nkunda, yiyo yikuzimbuliwa sona yitakwivwisya. Ilelo bakubitizya aba Ijiputi ukuti babavwe, indabi bakweghamila ku Asiliya ukuti abapoke.

¹² Bo babuka nkwiza pakabakuzulila ichilepa chane. Nkwiza pakubawisizya pasi ngati vyo viyuni. Nkwiza pakubapa amafundwe, ukuyana na zizyo abuziwa ni chilundilo.

¹³ Baghuniwe abantu banaba, pachifukwa ichakuti bepiteko kukwane. Bananganika pachifukwa ichakuti bansambukiye, nkunyonywa pakubatabula loli bakunzimbula.

¹⁴ Batakundaba na moyo ghabo ghosi, loli bakulila pavitala vyabo. Pachifukwa ichakulonda ingano nu vinyo umupya, po bakunsambukila.

¹⁵ Napapo nene nkabakuzya sona nkabapa amaka, loli pope bulo bansambukiye.

¹⁶ Batakunyokela ku Uwakumwanya Nkani, bali ngati bwele bubo bupyokite. Abalongozi babo bakwiza pakughoghiwa nupanga, pachifukwa ichakuti bakutamanta. Po bunubu bakwiza pakusamuliwa muchisu icha Ijiputi.