Hoseya 6 - IBAYIBOLO 2024

Ukupinduka ukwa buzimbuli ukwa ba Izilayeli

¹ Abantu bakuti, “Zagha tunyokele kwa Mwene. Napapo atuzepulannya mutuvigaba, loli akwiza pakutupozya. Napapo atuvulazya, loli akwiza pakutupinya ivilonda.

² Bo ghachilapo amasiku mabili akwiza pakutunyosezyamo nubumi, sona pisiku ilyabutatu akwiza pakutuzusya sona, ukuti tubanje nubumi pamaso papache.

³ Zagha tumumanye u Mwene, zagha tulemezye nkani pakumumanya. Naloliloli akwiza pakuboneka ngati ko kubuche. Akwiza pakutwizila ngati mumo yibeleye ivula pachisiku, sona ngati mumo yikutimila ivula pachisu ichapasi pakabalilo aka lupepo.”

⁴ Mwe ba Efulayimu, nkimba imbombe namwe choni? Wee Yuda, nkimba imbombe ichoni namwe? Ulughano lwako luli ngati we kabefu uwa pandabindabi, ngati yo nganda iya kubuche yiyo yikuzyebeluka bulo.

⁵ Polelo nkakudumulannya mutuvigaba, pakubombezya abalaghuzi bane, nkabaghogha na mazyu agha mumulomo wane, sona ubulongi bwane bukamesya ngati ko kamesya.

⁶ Pakuti intakulonda ivyakwiyipa, loli nkulonda ichisa. Chicho nkunyonywa ko kumumanya u Chala, ukuchila ivyakwiyipa ivyakocha.

⁷ Balunangannya ulufingo, ngati mumo akabombelagha u Adamu, umwakuti batakaba basubiliwa kukwane.

⁸ U Giliyadi ko kaya akakulu nkani aka bantu ababibi, kako kizuye ni banda pachifukwa icha kughoghana.

⁹ Ngati gho mavyondongo ghagho ghakuvwamilila abantu, momumo bope abaputi bakunangila. Bakubaghogha abantu pamusebo uwakubukila ku Shekemu, sona bakubomba ivintu ivikozya soni.

¹⁰ Navyennya ivintu ivyakoghofya vivyo vikubombiwa mu Izilayeli. Kulakula aba Efulayimu bakubomba ubwamalaya, sona aba Izilayeli binyazya bene.

¹¹ Namwe bulo mwe ba Yuda, mukwiza pakwinula ulufundo. Bo nkubapela abantu bane ukuti ivintu vibendelaye akiza.