Hoseya 5 - IBAYIBOLO 2024

Nizya bulongi ubwa ba Izilayeli

¹ “Mwe baputi, ivwa kuno, sona mwe ba Izilayeli, teghelezya! Mwee bamunyumba iya bumwene, teghelezya, pakuti mukwiza pakulongiwa. Amwe mwaba mwe chipingo icha Mizipa, sona ichilepa chicho bachikuzuliye pa Taboli.

² Abantu abakusambuka bali pambombo iyakughogha, loli nkwiza pakubapa amafundwe bosi.

³ Imbamenye akiza nkani abantu aba mu Efulayimu, bope aba Izilayeli batavwamite pamaso papane. Mwe bantu aba mu Efulayimu, ilelo mwaba mwe bamalaya, sona aba Izilayeli banyaziwe.”

⁴ Imbombo zyabo zitakubitikizya pakunyokela kwa Chala wabo. Umuzimu uwa bwamalaya ghuli mumoyo wabo, sona batamumenye u Mwene.

⁵ Ukwikwezya ukwa ba Izilayeli kukubasimikizya, Aba Efulayimu bope bakwipunula mumbibi zyabo. Abantu aba muchisu icha Yuda bope bakwipunula poka nabo.

⁶ Bo bakubuka ni ng'ozi sona ni ng'ombe zyabo pakumulonda u Mwene, batakwiza pakumwagha. Pachifukwa ichakuti epitepo pakasi papabo.

⁷ Bate basubiliwa kwa Mwene, pakuti bapapa umusiwana. Po ulusekelo lwabo ulwa Kupanta ukwa Mwezi umupya lukwiza pakubanangannya poka na maghunda ghabo.

⁸ Ipati livwikaye mu Gibeya, lizya ulupembe mu Lama. Wee Beti Aveni, kolomoka mwee ba Benjamini longolela.

⁹ Ichisu icha Efulayimu chikwiza pakuba chisami pisiku lilyo abantu bache bakwiza pakufundiwa. Nkwiza pakufumusya ubwanaloli pakasi panko izya ba Izilayeli bosi.

¹⁰ Abalongozi aba mu Yuda bali ngati bantu, babo bakwandulannya impaka. Nkwiza pakubapungulila ubukali bwane, ngati kwizula ukwa mizi.

¹¹ Abantu aba Efulayimu bakuyiviwa nkani, bakukanyililiwa pasi pabulongi, pakuti badumula pakuzikonka indaghilo izya bantu.

¹² Ane indi ngati zyo mpezu kwa Efulayimu, sona ngati ne chintu ichibozu ku bamunyumba iya Yuda.

¹³ Bo aba Efulayimu babwennya ububine bwabo, sona bo abantu aba mu Yuda bavyennya ivilonda vyabo, po aba Efulayimu bakabuka kwa Asiliya, pakumulaba u mwene uwa maka nkani ukuti abavwe. Loli atakakupoka, sona atakakupozya ivilonda vyako.

¹⁴ Pakuti nkwiza pakuba ngati ne nkalamu kuba Efulayimu, sona ngati nkalamu iya maka kwa Yuda. Nkwiza pakubazepulannya mutuvigaba nukubazompola. Po atalipo nayumo uwakubapoka.

¹⁵ Nkwiza pakunyokela kubuzilo bwane, mupaka bilate imbibi zyabo. Bo bali muntamyo zyabo, bakwiza pakundonda na moyo ghabo ghosi.