Hoseya 4 - IBAYIBOLO 2024

U Mwene akubapa inongwa aba Izilayeli

¹ Mwe ba Izilayeli, teghelezya amazyu agha Mwene, pakuti u Mwene abapiye inongwa amwe mwe mukwikala muchisu chinichi. Inongwa yache yo iyi, “Muchisu mutalimo nabumobumo ubusubiliwa pamo ulughano, sona abantu batakubikilako amahala nizya Chala.

² Muli bulo inguno nu bumyasi nukughoghana, nu bwiba, sona nu bwamalaya. Ukubomba imbibi kwafika pabwenecho, sona abantu bakughoghana kabilikabili.

³ Pachifukwa icha zinizi ichisu chikulila, sona bosi babo bakwikalamo bakwiza pakudedebala, umwakuti ivinyamana ivyamunkolongo, ni viyuni sona niswi vikwiza pakuzimila.

⁴ “Patakabepo nayumoyumo umuntu uwakumususya uwamwabo, pamo ukumusitaka uyunji, pakuti abantu bako bali ngati bantu babo bakubasitaka abaputi.

⁵ Mukwipunula pamusanya na pabusiku bulo, abalaghuzi bope bakwipunula poka namwe. Po nkwiza pakumughogha unyoko.

⁶ Abantu bane bakunanganika pachifukwa ichakuti bate na mahala. “Pachifukwa ichakuti mwabusulannya ubumanyi, nane bulo nkubakana pakuba mwe baputi bane. “Pachifukwa ichakuti mwazikana indaghilo izya Chala winyu, nane bulo nkwiza pakubakana abana binyu.

⁷ Bo abaputi bakonjelela ubwinji, momumo bakanangila nane bulo. Bakughulizannya ubuchindamu ubwa Chala ni vintu ivikozya soni.

⁸ Ichakulya chabo zyo mbibi izya bantu bane, sona ububibi yo nyanyi yabo.

⁹ Po nkwiza pakubabombela abaputi ngati zizyo nkababombela abantu. Nkwiza pakubafunda bosi pachifukwa icha zizyo bakubomba, sona nkwiza pakubatanizya pachifukwa icha mbibi zyabo.

¹⁰ “Bakwiza pakulya, loli batakwiza pakwikuta. Bakwiza pakubomba ubwamalaya, loli batakwiza pakubalagha, pachifukwa ichakuti bamukanite u Mwene, umwakuti babombaye ubwamalaya.”

¹¹ U Mwene akuti, “Ubwamalaya, uvinyo uwakale manyi umupya akughanangannya ukwivwisya ukwa bantu bane.

¹² Bakubuzikizya ku chifwani icha ikwi, sona bakulaghula ni indisa yikubamula. Umuzimu uwa bwamalaya wabasovya, umwakuti batakusubiliwa kwa Chala.

¹³ Bakubika ivyakwiyipa vyabo pamwanya pamaghamba, nukocha ivyakwiyipa mutughamba muntende mumakwi agha mupandapanda, pachifukwa ichakuti ghali na kazundila akiza. Polelo abana binyu abalindu bakubomba ubwamalaya, bope abalasagha binyu bakulowa.

¹⁴ “Ntakwiza pakubafunda abana binyu abalindu nanti bakubomba ubwamalaya, sona ntakwiza pakubafunda abalasagha binyu nanti bakulowa, pachifukwa ichakuti abanavuli bo babo bakulowa na bakolo abamalaya, nukubika poka nabo ichakwiyipa ku vifwani, sona abantu babo batakwivwisya bakwiza pakunanganika.

¹⁵ “Mwee ba Izilayeli napapo mukulowa nkani, loli aba Yuda batakabanje ninongwa. “Mutakabukaye ku Giligali, pamo ku Beti Aveni. Mutakalapaye ukuti, ‘Nkulapila mwitabwa ilya Mwene umumi!’

¹⁶ Aba Izilayeli bali na moyo amakafu, ngati mbogho inyana. Po nkimba u Mwene angazidima bulibuli, ngati to twana utwa ng'ozi munganda?

¹⁷ Abantu aba muchisu icha Efulayimu bimamatizizye bene kuvifwani, baleke bulo!

¹⁸ Nanti bang'wela nkani uvinyo bakulowa, sona abalongozi babo bighanite nkani pakubomba inkozyasoni.

¹⁹ Ukankungu akwiza pakubapupuzya, po ivyakwiyipa vyabo vikwiza pakubakozya isoni.