Hoseya 3 - IBAYIBOLO 2024

U Hoseya akusayana nu muchi wache

¹ U Mwene akambuzya akati, “Bukagha ughanane sona nu mukolo yula napapo ali nu mwanavuli uyunji, sona nukuti umukolo yunuyu we malaya. Umughanaye ngati mumo u Mwene abaghaniye aba Izilayeli, napapo abantu banaba bakubiputa abachala abanji, sona nukuti abaghanite nkani pakubika ichakwiyipa icha ivitumbuwa ivipapate ivya mampesya.”

² Po nkiyimala pakubika isalabazya 15 izya siliva, sona ni vidudunga 7 ivya mapemba.

³ Nkamubuzya nkati, “Ilelo Wikalaye munyumba yane amasiku aminji, po utakabombaye sona ubwamalaya, pamo ukulowa sona nu mwanavuli uyunji. Nane bulo nkwiza pakwikalagha poka nawe.”

⁴ Pakuti aba Izilayeli bakwiza pakwikala amasiku aminji nkani bo bate nu mwene pamo umulongozi bo batakubika ivyakwiyipa pamo pakuba na mabwe amazelu pamo u efodi pamo ichifwani.

⁵ Loli bo pachilapo akabalilo aba Izilayeli bakwiza pakunyokela nukumulondelezya u Mwene u Chala wabo, sona nu Devedi u mwene wabo. Bakwiza kwa Mwene bo bakutetema umwakuti bapokele ubwiza bwache ubwa bumalilo.