Hoseya 2 - IBAYIBOLO 2024

¹ “Po ubabuzye abawamwinyu ukuti, ‘Mwe bantu bane, sona ubabuzye abayemba bako ukuti indi nichililizi namwe.’ ”

U Izilayeli ali ngati mukolo yuyo te musubiliwa

² Muchemele unyoko, muchemele, pakuti ate muchi wane, sona nane inte ne mulume wache. Umubuzye ukuti aleke ubwamalaya bwache, sona nu bulowe bubo ali nabo.

³ Lumo ningamuvula amenda, nukumuleka bwazi ngati po pisiku ilya kupapiwa kwache. Nkwiza pakumupela pakuba ngati yo nkolongo, pakuba ngati cho chisu ichumizu, sona nkwiza pakumughogha ni nyota.

⁴ Ntakwiza pakuba nichililizi nabana bache, pachifukwa ichakuti bakapapiliwa mubulowe.

⁵ Unyina atakaba musubiliwa, sona akamela ulwandwa bo akubomba inkozyasoni. Akati, “Nkwiza pakubakonka abapamoyo bane, babo bakumpa ichakulya, na mizi. Bakumpa sona ameya, na menda amatonte, na mafuta agha misyunguti, sona nu vinyo.”

⁶ Polelo nkwiza pakuwighalila umusebo wache na mivwa, nkwiza pakumuzengelela nulupaso umwakuti atakayaghe izila.

⁷ Akwiza pakubachimbilila abapamoyo bache, loli atakwiza pakubalema. Akwiza pakubalondalonda. Loli atakwiza pakubagha. Po akwiza pakunena ukuti, “Nkunyokela ku mulume wane uwakwanda, ngati mumo zikabelagha pakwanda pala. Pakuti kale ivintu vikabapo akiza ukuchila pakabalilo aka.”

⁸ Atakazimanya ukuti nkaba nene, ne nkamupa ingano, nu vinyo, sona na mafuta. Atakazimanya ukuti nkaba nene nkamupa usiliva umwinji nu golide, yuyo bakabombezya pakumwiputa u chala wabo u Baala.

⁹ “Polelo nkwiza pakumufyula ingano yane bo yatona, sona nkwiza pakumufyula u vinyo nanti ayaniziwa. Nkwiza pakumufyula ameya ghane, sona na menda ghane amatonte, ghagho akalonda pakuvwinka inkule yache.

¹⁰ Po nkwiza pakuyibika pabuzelu inkule yache, pamaso pa baghaniwa bache. Atalipo nayumoyumo umuntu yuyo akwiza pakumupoka munyobe zyane.

¹¹ Nkwiza pakulumazya ulusekelo lwache losi, ulusekelo lwache ulwa pamwaka ulwa Kupanta ukwa Mwezi. Nkwiza pakulumazya ulusekelo ulwa Kupanta ukwa Mwezi, nu lusekelo lwache ulwa Isiku Ilyakutuzya, kokuti ulusekelo ulwa mumasikumumasiku.

¹² Nkwiza pakughanangannya amampesya ghache, na makwi agha makuyu, ghagho akatinji gho malipilo ghache aghakufuma ku baghaniwa bache. Nkwiza pakughapela pakuba ngati gho musitu, sona ivinyamana ivyamuzi vikwiza pakughalya.

¹³ Nkwiza pakumufunda pachifukwa icha masiku agha ba Baala, ghagho akafukizya utwakununkila ku bachala bache aba Baala. Akipela mwene pakuba wakuboneka akiza, pakubombezya ugolide ni vyakwibonesekezya akiza, Akabakonka abaghaniwa bache, akanduvya ane ne Mwene.”

¹⁴ Polelo nkwiza pakumudeba umukolo yula, nukubuka nawe kunkolongo, sona nkwiza pakunena nawe akiza nkani.

¹⁵ Kulakula nkwiza pakumunyosekezya umughunda wache uwa mampesya, sona nkwiza pakulipela Ikombe ilya ntamyo pakuba mulyango uwa Lusubilo. Kulakula akwiza pakwamula ngati mo mumasiku agha bulindu bwache, ngati mo mumasiku ghagho akepela mu Ijiputi.

¹⁶ U Mwene akuti, “Pakabalilo kalakala, ukwiza pakunyitizya ukuti mulume wane.” Utakwiza pakunyitizya sona ukuti Baala wane.

¹⁷ Nkwiza pakughefyamo amatabwa agha aba Baala pamalomo ghache, sona abantu batakwiza pakughakumbukamo sona amatabwa ghabo pakwiputa.

¹⁸ Mumasiku ghalaghala nkwiza pakufinga ulufingo ni vinyamana ivyamunkolongo, ni viyuni, sona ni vinyamana vivyo vikwavula. Nkwiza pakumazya ubwele, na bapanga, sona nu bwite, umwakuti bikalaye umwakufwasa.

¹⁹ Nkwiza pakukuzingila bwila na bwila. Nkwiza pakukuzingila mubugholosu, na mubwanaloli, nu lughano lulo lutakumala nalumolumo, sona ni chililizi

²⁰ Nkwiza pakukuzingila mubusubiliwa, po ukwiza pakumanya ukuti ane ne Mwene.

²¹ U Mwene akuti, “Mumasiku ghalaghala nkwiza pakwighula kumwanya, po ivula yikwiza pakutima pachisu ichapasi.

²² Itope lyope likwiza pakupa ingano, nu vinyo umupya, na mafuta gha syunguti, umwakuti u Yezileli avibombezyanje imbombo.

²³ Nkwiza pakubikazikizya aba Izilayeli muchisu chane, nkwiza pakuba nichililizi na bantu babo kale intakabaghana.” Abantu babo batakitiziwa ukuti, “Mute mwe bantu bane.” Nkwiza pakubitizya ukuti, “Amwe mwe bantu abane.” Bakwiza pakunena ukuti, “Awe we Chala witu.”