Hoseya 14 - IBAYIBOLO 2024

U Hoseya akubalaba aba Izilayeli

¹ Mwee ba Izilayeli, nyokela kwa Mwene u Chala winyu. Imbibi zyinyu zyabawisya!

² Ghalemezye amazyu, po munyokele kwa Mwene. Mumubuzye ukuti, “Tuhobokele imbibi zyitu, sona pokela ulwiputo lwitu, po imilomo yitu yikupalaye.

³ U Asiliya atangatupoka, aswe tutakwiza pakukwelapo pafalasi izya bwite. Tutakwiza pakunenapo sona ukuti, ‘Abachala bitu’ babo twapanga ni nyobe zyitu, pakuti mumwako abalanda bakuchaghamo ichililizi.”

⁴ U Mwene akuti, “Nkwiza pakubapozya ubusambuke bwabo, po nkwiza pakubaghana bulo, pakuti ubukali bwane papabo bwatozoka.

⁵ Pa ba Izilayeli nkwiza pakuba ngati ne nganda, bakwiza pakubazya ngati bwezya, Abantu banaba bakwiza pakumela amagululuzi, amagululuzi ngati makwi agha mwale mu Lebanoni.

⁶ Isamba zyache zikwiza pakutenga ngati likwi ilyiza ilya musyunguti, pakusata posi na posi. Kope ukununkila kwache ngati makwi agha mwale mu Lebanoni.

⁷ Abantu banaba bakwiza pakwikala sona mukazundila kache, bakwiza pakubazya ngati lutabo ulwa mampesya. Bakwiza pakumanyikwa ngati chakung'wela icha vinyo muchisu icha Lebanoni.

⁸ Wee Efulayimu, nkimba imbombe sona ichoni ni vifwani? Nkwiza pakumwamula nukumusungilila akiza. Indi ngati likwi ibisi ilya payini, pakuti ivikomwa vyinyu vyafuma kukwane.”

⁹ Nkimba muntu wenu uwa mahala? Ivwisye ivintu vyosi vinivi. Nkimba muntu wenu yuyo akuvyaghannya ivintu vinivi, avimanye ivintu vinivi. Pakuti izila izya Mwene zigholokite, sona abagholosu bo babo bakwendamo, loli abantu abasambuke bakwipunulamo.