Hoseya 13 - IBAYIBOLO 2024

Ukukalala ukwa Mwene paba Izilayeli

¹ Bo u Efulayimu anena, abantu bakatetema, bakamukwezya nkani u Izilayeli. Loli akananga pachifukwa icha kumwiputa u Baala, po akafwa.

² Bachili bakunanga bulo, bakwipangila bene ivifwani ivya siliva, ivifwani vivyo vikupangiwa akiza nkani, vyosi vinivi bo bafundi babo pakuvipanga. Abantu bakubanena ukuti, “Bakubika ivyakwiyipa ku vifwani ivya ngwata vinivi nukuvifyofyonta.”

³ Polelo bakwiza pakubanga ngati we kabefu uwa pandabindabi, sona bakwiza pakubanga ngati nganda yiyo yikulaghala bulo, abantu banaba bakwiza pakubanga ngati lyelelo lilyo likupupuka, sona ngati lyosi lyilo likufuma pibwindo.

⁴ Loli ane ne Mwene u Chala winyu, yuyo akabefya muchisu icha Ijiputi. Mutakabamanye aba Chala abanji loli ane ne mwene, sona ataliko Umupoki uyunji loli ane ne mwene.

⁵ Nkabasungilila akiza nkani munkolongo, muchisu ichumizu nkani.

⁶ Bo nabalyesya, bakikuta nkani. Bo bikuta bakanda pakwituvya, po bakanduvya.

⁷ Umwakuti nkwiza pakubanyelela ngati nkalamu, sona nkwiza pakubavwamilila ngati we zyela.

⁸ Nkwiza pakubanga ngati we labwe, yuyo bamufyula utwana twache, nkwiza pakabazepulannya. Sona nkwiza pakubamila bulo ngati nkalamu, nukubazepulannya ngati chinyamana icha munkolongo.

⁹ Wee Izilayeli wananganika, pachifukwa ichakuti wansambukila, sona wamusambukila umwavwilizi wako.

¹⁰ Nkimba ali ko kwiyi u mwene wako yuyo angakupoka? Nkimba bali ko kwiyi abalaghili bako mutwaya twako tosi utukulu nkani, babo ukatinji, Mpanga u mwene sona na makambala?

¹¹ Po mubukali bwane nkabapa u mwene, sona mubukalale bwane nkamwefyamo.

¹² Ububibi ubwa ba Efulayimu bwabunganikiwa, zyope imbibi zyabo zyasimbiwa.

¹³ Ububavu ubwa mukolo yuyo ali pakusayiwa bwabawila, loli u mwana ate na mahala. Bo akabalilo kafikila atakulonda pakufuma pakabalilo kache.

¹⁴ Nkwiza pakubatabula kumaka aghipumpa, sona nkwiza pakubasatula kubufwe. Wee bufwe wee, nkimba iviwaya vyako vili ko kwiyi? Wee lipumpa wee, nkimba ukunangannya kwako kuli ko kwiyi? Ntakwiza pakuba ni chililizi nachimochimo.

¹⁵ Napapo aba Efulayimu bangahoboka nkani ngati lutete. Impepo iya Mwene iyakubufumilo ubwizuba, iyikufuma munkolongo, imbwibwi niviziba vikwiza pakukamuka, ivibombelo vyache vyosi ivya mutengo vikwiza pakufyuliwa.

¹⁶ Abantu aba mu Samaliya bafundiwanje pachifukwa icha bubibi bwabo, pakuti bamusambukiye u Chala wabo. Abantu banaba bakwiza pakughoghiwa nupanga, bope abana babo bakwiza pakubabamizya pasi, po abachi babo abalwanda bakwiza pakubazepula.