Hoseya 12 - IBAYIBOLO 2024

¹ Ichakulya icha ba Efulayimu yo mpepo, sona isiku lyosi bakuyichimbizya impepo iyakubufumilo bwizuba, nukufingana nabo ubumyasi nu lombwa. Bakulapa ichilapo nu Asiliya, sona bakutuma amafuta gha misyunguti ku Ijiputi.

² U Mwene abapiye inongwa abantu aba mu Yuda. Akwiza pakumufunda u Yakobo ukuyana ni nkalo yache, sona akwiza pakumutanizya ukuyana ni mbombo zyache.

³ Bo ali mulwanda ulwa nyina, akachilema ichitende icha wamwabo, sona bo akula akalwana nu Chala.

⁴ Akalwana nu wantumi nukumupota, akalila nukulaba ukuti amupelele ichisa. U Chala akakomana nawe pa Beteli po akanenezannya nawe palapala

⁵ U Mwene u Chala Uwamaka Ghosi, U Mwene lyo litabwa lilyo abantu bamukumbukilaye nalyo!

⁶ Loli unyokelaye kwa Chala wako, lemezya ulughano nu bwanaloli sona mulindililaye bulo u Chala winyu akabalilo kosi.

⁷ Umughulizi avighanite ivipimilo ivyabumyasi sona bighanite nkani pakubalyela abantu.

⁸ Aba Efulayimu bakwitutumula bakuti, “Aswe twe bakabi sona twakaba nkani. Po nubukabi bosi bunubu batakwiza pakutwagha nu bubibi pamo ni mbibi.”

⁹ Ane ne Mwene u Chala winyu, yuyo akabefya muchisu icha Ijiputi. Nkwiza pakubapela ukuti mwikalaye muvisakasa, ukuyana namumo mukabombelagha pa Lusekelo lwa Visakasa.

¹⁰ Nkanena na balaghuzi, nkabavumbulila ivisetuka nukubabuzya ivyili ukwendela mumwabo.

¹¹ Nkimba mu Giliyadi muli ububibi? Abantu bache bate ni mbombo nayimoyimo! Nkimba bakwiyipa inkambaku mu Giligali? Ivighemo vyabo vikwiza pakuba ngati chilunda icha mabwe, pamughunda ghugho balima.

¹² U Yakobo akachimbilila kuchisu icha Alamu. U Izilayeli akabomba imbombo, ukuti asende umuchi wache, sona akadima ing'ozi ukuti imale umuchi wache.

¹³ U Mwene akabefya aba Izilayeli muchisu icha Ijiputi, pakubabombezya abalaghuzi, akabasungilila akiza nkani.

¹⁴ Loli aba Efulayimu bakamukalalizya nkani u Mwene, po bafwanje pachifukwa ichakunanga kwabo. U Mwene akwiza pakubafunda, pachifukwa icha nkozyasoni zizyo babomba.