Hoseya 11 - IBAYIBOLO 2024

Ulughano ulwa Chala paba Izilayeli

¹ Pakabalilo kako u Izilayeli akaba mwana munandi, nkamughana nkani, po nkamwitizya umwana wane umulumendo, ukuti epemo mu Ijiputi.

² Napapo nkamwitizya u Izilayeli akinji bulo, loli akepaghako nkani kukwane. Bakabika ivyakwiyipa kwa Baala, sona bakafukizya utwakununkila ku vifwani.

³ Nkaba nene nkamumanyisya u Efulayimu pakwenda, nkamulema panyobe. Loli batakazyaghannya ukuti nkaba nene nkabapozya.

⁴ Nkabalongozya ni chisa sona nu lughano, ni chisa chilachila nkanyamula ikoli musingo zyabo, po nkafughama pakubalyesya.

⁵ Batakwiza pakunyokela kuchisu icha Ijiputi, sona aba Asiliya bakwiza pakubalaghila, pachifukwa ichakuti bakakana pakupinduka.

⁶ Ubwite bukwiza pakunangannya utwaya twabo utukulu nkani, bukwiza pakunangannya sona impingwi izya nyiyi, nukumazya imbatiko zyabo zyosi.

⁷ Abantu bane balemezizye pakunkana, Napapo bakwitizya ku Wakumwanya Nkani, loli batakunchindika nubwanaloli.

⁸ Wee, Izilayeli ningakuluvya bulibuli? Nkimba ningakupa bulibuli u Efulayimu? Nukukuleka we Izilayeli nkimba ningakupa bulibuli ngati we Adima? Nukukubombela ngati we Zeboyimu? U moyo wane wanduka, sona chope ichililizi chandema nkani.

⁹ Ntakwiza pakufumya ubukali bwane ubwakoghofya, pamo pakumunangannya sona u Efulayimu, pakuti ane ne Chala, tene muntu awe. Ane ne Muzelu indi pakasi papinyu. Ntakwiza nu bukali.

¹⁰ Abantu bane bakwiza pakumukonka u Mwene, pakuti akwiza pakubuluma ngati nkalamu, bo akubuluma, abana bache aba kubwinjililo bwizuba, bo bakwiza kukwache, bakwiza pakutetema.

¹¹ Bakwiza bakutetema ngati viyuni vya muchisu icha Ijiputi, sona ngati nkunda izya muchisu icha Asiliya. Po u Mwene akuti, “Nkwiza pakubabwezya mutwaya twabo.”

Imbibi izya ba Izilayeli

¹² U Efulayimu anzyunguliye nu bumyasi, sona bope aba Izilayeli banzyunguliye nu buzimbuli. Abantu aba mu Yuda bachili bali nu Chala, sona basubiliwa nkani ku yuyo Muzelu.