Hoseya 10 - IBAYIBOLO 2024

¹ Aba Izilayeli bakaba ngati lo lutabo ulwa mampesya, lulo lukwela ivikomwa vyache. Bo ivikomwa vyache vikubala, bope bakazenga ivighemo ivyinji nkani. Bo ivintu vyabo vikubendela akiza muchisu, bope bakavighana nkani ivikumbusyo ivya mabwe amapaghuliwa.

² Amoyo ghabo mazimbuli, po bafundiwanje pachifukwa icha mbibi zyabo. U Mwene akwiza pakuvimongolannya ivighemo vyabo, nukuvinangannya ivikumbusyo vyabo ivya mabwe amapaghuliwa.

³ Po bakwiza pakunena ukuti, “Tute nu mwene, pakuti tutakamuchindikapo u Mwene. Napapo tukaba nu mwene, nkimba po ngali atubombeye ichoni?”

⁴ Bakulayizya pakubomba ivintu ivyinji nkani, bakulapa ivilapo ivyabumyasi, sona bakunena amazyu ghagho ghate ni mbombo, bo bakulapa ivilapo. Polelo ubulongi bwabo bukumela ngati lisote ibibi.

⁵ Abantu babo bakwikala mu Samaliya bakuchinyila ichifwani icha ngwata icha mu Beti Aveni. Abantu bache bakwiza pakuchilila, abaputi bache bakwiza bakuchilila, pachifukwa icha buchindamu bwache. Pakuti chasendiwa, nukubuka kuchisu icha buzya.

⁶ Ichifwani chila chikwiza pakusendiwa nukubuka nacho ku Asiliya, ukuti chibanje chabupi kwa mwene umukulu. Aba Efulayimu bakwiza pakusamuliwa aba Izilayeli bope bakwiza pakuba ni soni, pachifukwa icha kwivwila amahala ghabo.

⁷ U Samaliya nu mwene wache ananganika bali ngati akakwi akakwambama pamizi.

⁸ Ubuzilo ubwapamwanya ubwa Aveni, imbibi iya ba Izilayeli yimongoliwanje. Amivwa ni ntolovu vikwiza pakumela mulamula, nukuvivwinka ivighemo vyabo. Po bakwiza pakughabuzya amaghamba ukuti, “Tufisaye bulo!” Nukutubuzya utughamba ukuti, “Tuwilaye!”

⁹ Wee Izilayeli, ukananga ukwandila pakabalilo aka Gibeya, sona wendelela pakunanga. Po nkimba ubwite butakabanangannya ababomba mbibi mu Gibeya?

¹⁰ Nanti nighana nkwiza pakubapa amafundwe abantu aba inko izinji bakwiza pakubunganila. Nukubapinya ni mpingu, pachifukwa icha mbibi zibili.

¹¹ U Efulayimu ali ngati mpampali yiyo yimanyiziwe, yiyo yighanite pakukoma ingano. Nkwiza pakumuvwika ikoli pasingo yache iyakuboneka akiza nukumubombezya imbombo inkafu nkani. U Efulayimu akwiza pakuwesa ijembe, u Yuda akwiza pakulima, sona u Yakobo apuzannyanje.

¹² Mwipeselaye mwebene ubugholosu umwakuti mwinulaye, lughano lulo lutakupotwapo nalumolumo. Puzannya amaghunda ghinyu, pakuti ko kabalilo akakumulondela u Mwene, mupaka u Mwene ize nukubapungulila ubugholosu.

¹³ Loli mwabyala ububibi, po mwinula ubunyonganu, sona mwalya ivikomwa ivya bumyasi. Pakuti mwazisubila izila izyinyu ni zyinyu sona na basilikali binyu abinji nkani.

¹⁴ Po ichongo icha bwite chikwiza pakwivwika, pakasi pabantu binyu, umwakuti amalinga ghinyu ghosi ghakwiza pakumongonkana, Ngati mumo abantu aba mu Shalimani bakachinanganizizya, ichisu icha Beti Alibeli pisiku ilya bwite, pakabalilo kako bakabavuluvuzya abamayi pasi poka na bana babo.

¹⁵ Mwee bantu aba mu Beteli, ivintu vinivi vikwiza pakubawila, pachifukwa icha bubibi bwinyu ubukulu nkani. Kubuche u mwene wamu Izilayeli akwiza pakughoghiwa.