Hoseya 1 - IBAYIBOLO 2024

¹ Agha gho mazyu ghagho u Mwene akamubuzya u Hoseya, umwana uwa Beyeli bo u Uziya nu Yotamu nu Ahazi, sona nu Hezekiya bakulaghila muchisu icha Yuda, sona bo u Yelobowamu umwana uwa Yehowashi akulaghila muchisu icha Izilayeli.

Umuchi uwa Hoseya na bana bache

² Bo u Mwene anda pakunenela mwa Hoseya akati, “Usende umalaya pakuba muchi wako, sona mupape nawe abana. Bope bakwiza pakuba bamalaya pachifukwa ichakuti ichisu chabomba ubwamalaya ubukulu nkani pakumupa u Mwene inkonto.”

³ Po akamusenda u Gomeli umwana uwa Dibulayimu pakuba muchi wache. Akamela ulwanda nukupapa umwana umulumendo.

⁴ U Mwene akamubuzya u Hoseya akati, “Umwite ukuti we Yezileli, pakuti lunulu bulo nkwiza pakubafunda abamunyumba iya Yehu, pachifukwa icha kukupula ibanda mwikombe ilya Yezileli, sona nkwiza pakubumazya ubumwene ubwa Izilayeli.

⁵ Mwisiku lilalila nkwiza pakubupyolannya ubwele ubwa ba Izilayeli Mwikombe ilya Yezileli.”

⁶ U Gomeli akamela sona ulwanda, nukupapa umwana umulindu. Po u Mwene akamubuzya u Hoseya akati, “Umwite ukuti we Lo Luhama, pakuti ntakwiza pakuba nichililizi sona naba Izilayeli ukuti imbahobokele.

⁷ Loli nkwiza pakuba nichililizi na banyumba iya Yuda, sona nkwiza pakubapoka. Ntakwiza pakubombezya ubwele, nupanga pamo ubwite, pamo ifalasi, na bantu abakukwela pafalasi izya bwite. Loli nkwiza pakubapoka na maka agha Mwene u Chala wabo.”

⁸ Bo amulesya u Lo Luhama pakonka, u Gomeli akamela sona ulwanda nukupapa umwana umulumendo.

⁹ Po u Mwene akati, “Umwite ukuti we Lo Ami, pakuti te mwe bantu bane, sona ane inte ne Chala winyu.

¹⁰ “Loli ubwinji ubwa ba Izilayeli bukwiza pakuba ngati musesenga uwa mulubazu ulwa nyanja, ghugho ghutangapimiwa pamo ukubelengiwa. Pabuzilo bubo bakaneniwa ukuti, ‘Amwe te mwe bantu bane,’ bakwiza pakwitiziwa ukuti ‘Bana aba Chala umumi.’

¹¹ Abantu aba mu Yuda, naba mu Izilayeli bakwiza pakuba poka. Bakwiza pakusala umulongozi weka, sona ivintu vikwiza pakubendela akiza muchisu chabo, pakuti isiku ilya Yezileli likwiza pakuba likulu nkani.