Hagayi 2 - IBAYIBOLO 2024

Ubuchindamu ubwa Nyumba Impya iya Chala

¹ Pisiku ilya 21 ilya mwezi uwaseveni, u Mwene akanenela ukwendela mwa mulaghuzi u Hagayi akati,

² “Umubuzye u Zelubabeli, umwana uwa Sheyalitiyeli, umulaghili uwa chisu icha Yuda nu Yoshwa umwana uwa Yehozadaki, umuputi usongo sona na bantu bosi abakusyalako uti,

³ ‘Nkimba alipo yumo pakasi papinyu yuyo akabwennya ubuchindamu ubwakale mu Nyumba yiniyi? Nkimba ilelo yikuboneka bulibuli? Nkimba yitakuboneka ngati po yite ni mbombo nayimoyimo?’

⁴ U Mwene Uwamaka Ghosi akuti, ‘Wee Zelubabeli, ilelo utakawanje amaka! Wee Yoshwa umwana uwa Yehozadaki, umuputi usongo ujimbaye. Amwe mwe bantu bosi aba muchisu mutakawanje amaka, pakuti akabalilo kosi indinamwe.

⁵ Bo mwepamo muchisu icha Ijiputi, nkabalayizya ukuti nkwiza pakuba namwe akabalilo kosi. Nchili indinamwe, po mutakanyilaye.’

⁶ “Pakuti u Mwene Uwamaka Ghosi akuti, ‘Kwasyala akabalilo kanandi bulo akakuti nkwiza pakuyingannya kumwanya, ni nyanja sona ni chisu ichapasi ichumizu.

⁷ Nkwiza pakuziyingannya inko zyosi, umwakuti ubukabi ubwa inko bwizulaye mu Nyumba iya Chala, sona nkwiza pakuyizuzya Inyumba iyi nu buchindamu.’ U Mwene Uwamaka Ghosi anena.

⁸ ‘U siliva wane, wepe ugolide wane.’ U Mwene Uwamaka Ghosi anena.

⁹ ‘Ubuchindamu ubwa Nyumba impya bukwiza pakubuchila ubuchindamu ubwa Nyumba iyakale, mubuzilo bula nkwiza pakubikamo umutende nu bwabuke.’ ” U Mwene Uwamaka Ghosi anena.

Umulaghuzi akubabuzikizya abaputi

¹⁰ Pisiku ilya 24 umwezi uwa nayini umwaka uwabubili bo Daliyasi akulaghila, u Mwene akamubuzya u mulaghuzi u Hagayi akati,

¹¹ “Zizyo u Mwene Uwamaka Ghosi akunena zyakuti, ‘Balalusye abaputi zizyo indaghilo zikulingannya.

¹² Nanti umuntu anyamuye inyama impaghuliwa munkazo, po inkazo yilayila yapalamasya ichibama pamo umusuni pamo uvinyo pamo amafuta pamo ichakulya chimo, nkimba ivyakulya vila vikuba vizelu?’ ” Abaputi bala bakamula bakati, “Awe.”

¹³ Po u Hagayi akati, “Nkimba nanti umuntu inyazya mwene pakupalamasya umuvimba, po wepe avipalamasya ivyakulya vila, nkimba vikuba vinyazu?” Abaputi bala bakamula bakati, “Eee, vikuba vinyazu.”

¹⁴ Po u Hagayi akati, “U Mwene akuti, ‘Viyanite bulo na bantu sona ninko pamaso papane, vyosi vivyo bakubomba sona vyosi vivyo bakubika vinyazu.

¹⁵ “ ‘Ilelo mwinong'one akiza pazinizi, inong'ona namumo ivintu vikabela pakwanda pala, bo muchili pakuyizenga Inyumba iya Chala yila.

¹⁶ Bo umuntu akusubila pakughagha amasaka 20 agha ngano loli akaghagha amasaka 10, bo uyunji akwiza pakusemba isonta 50 izya vinyo, loli akazyagha bulo 20.

¹⁷ Nkanangannya vyosi vivyo mukabyalagha ni chiwaya icha chibabu ni chuku sona na mabwe agha vula, loli pope bulo mutakapinduka.’ U Mwene anena.

¹⁸ ‘Ukwanda ilelo pisiku ilya 24 umwezi uwa nayini, inong'onaghapo akiza nisiku lilyo ulwalo ulwa Nyumba iya Mwene lukazengiwanga. Inong'onaghapo akiza.

¹⁹ Nkimba zyasyalamo imbeyu zimo muntamba mula? Mupaka nilelo amampesya na makuyu na manyele sona na makwi agha misyunguti ghatelitepo ivikomwa? “ ‘Ukwanda ilelo mupaka muntazi, nkwiza pakubasaya.’ ”

Ulufingo ulwa Mwene kwa Zelubabeli

²⁰ Pisiku ilya 24 ilya mwezi, u Mwene akamubuzya u Hagayi akabubili akati,

²¹ “Mubuzye u Zelubabeli umulaghili uwa chisu icha Yuda ukuti, ‘Nkwiza pakuyingannya ku kumwanya ni chisu ichapasi.

²² Nkwiza pakubawisya abamwene aba inko izinji na maka agha bumwene bwabo. Nkwiza pakuzing'anamulannya ingolo zyabo poka nabakwendezya babo, ni falasi sona naba kukwelapo babo nukughamala amaka agha inko injeni. Ifalasi zikwiza pakufwa, sona bope abakukwelapo bakwiza pakughoghana, umuntu wesi nupanga uwa mukamu wache.’

²³ “U Mwene Uwamaka Ghosi ati, ‘Pisiku lilalila nkwiza pakukusenda we mubombi wane u Zelubabeli umwana uwa Sheyalitiyeli, sona nkwiza pakukupela pakuba we mpete yane, pakuti nakusala.’ ” U Mwene Uwamaka Ghosi anena.