Habakuku 3 - IBAYIBOLO 2024

Ulwiputo ulwa mulaghuzi u Habakuku

¹ Ulu lo lwiputo ulwa mulaghuzi u Habakuku.

² Wee Mwene, nivuye nizya imbili yako, sona imbombo zyako zikumpelela ubogha. Po uzipelaye pakuba mpya mumasiku ghitu, sona zimanyikwanje pakabalilo kitu. Napapo ukalaye, loli utupelelaye ichisa.

³ U Chala akiza ukufuma ku Temani, Umuzelu yula akiza ukufuma kwighamba ilya Palani. Ubuchindamu bwache bukakupikila kumwanya, sona amapalo ghache ghakizula pachisu ichapasi.

⁴ Inkozyo zyache zikaba ngati lizuba ukulama kwache kukafuma munyobe yache mumo mukavwama amaka ghache.

⁵ Ichiwaya chikalongolela muntazi mumwache, sona ububine ubwakoghofya bukamukonka mwisinda.

⁶ Akimilila, nukuchineng'ennya ichisu ichapasi, akennya po inko izya bantu zikatetema. Amaghamba aghakale ghakalepunkana, sona utumaghamba utwakale tope tukamongonkana. Izila zyache zya bwila na bwila.

⁷ Nkavyennya ivisakasa ivya bantu aba mu Kushi vili muntamyo, sona ubuzilo ubwa bantu aba mu Midiyani bukayimba nkani.

⁸ Wee Mwene, nkimba ukazikalalila isoko? Nkimba ubukali bwako bukaba patusoko? Nkimba ukayichemela inyanja inkulu nkani, bo ukwelite pafalasi ni ngolo zyako izya bupoti?

⁹ Ukawesa ubwele bwako, sona ukafumya utulasilo twako utwinji muchakusungilamo chache. Ukachigaba ichisu ichapasi na mizi.

¹⁰ Amaghamba ghakakwennya nukutetema, nukusata ukufuma kumwanya, ubwibizu ubwanyanja bukazumagha ichongo, nukughakwezya amayigha ghache mumwanya.

¹¹ Izuba nu mwezi vikimilila bulo mumwanya, bo vyennya ukubuluka ukwa tulasilo twako, sona nukulama ukwa kumesya ukwa mpalala zyako.

¹² Ukendagha pachisu ichapasi bo ukalaye, sona mubukali bwako ukazikanyankila inko inyinji.

¹³ Ukiza pakubapoka abantu bako, pakubapoka abapakiwa bako. Ukamukoma umulongozi uwa chisu icha bantu ababibi bala, nukumuleka bwazi ukwanda kumutu mupaka kunyayo.

¹⁴ Ni mpalala yache ukamulasa kumutu, bo abasilikali bache abamaka biza ngati we kankungu pakutunyampannya. Bakituvyanga ngati bantu babo bakulonda pakubalya abantu babo bakuyiviwa.

¹⁵ Ukakanyankila panyanja ni falasi zyako, po amizi aghamaka nkani ghakavunduka.

¹⁶ Bo nivwa zinizi mukasi mukasunguluka, sona imilomo yane yikaneng'ena bo nivwa amazyu ghanagha. Amafupa ghane ghakanda pakubola sona ivinama vyane vikatetema. Loli nkwiza pakulindilila mubufisalyoyo ukwiza ukwa isiku ilya ntamyo, ukuti lyize pa balwani bitu babo bakutulema.

¹⁷ Amakuyu ghatakubazya, sona ghope amampesya naghamoghamo. Amakwi agha misyunguti ghatakwela, amaghunda ghope ghatakubanga ni vyakulya. Ing'ozi ni ng'ombe nazimozimo muvibagha.

¹⁸ Loli nkwiza pakusekela mwa Mwene, nkwiza pakuhoboka mwa Chala Umupoki wane.

¹⁹ U Mwene Uwamaka Ghosi we maka ghane, akuvipela ivinama vyane pakuba ngati vinama vya mbabala, sona akunyitikizya ane ukufika pamwanya pighamba. Kumulongozi uwa bwimbi. Pakubombezya ipango.