Habakuku 1 - IBAYIBOLO 2024

¹ Agha gho mazyu ghagho u Chala akamubuzya umulaghuzi u Habakuku muchisetuka.

U Habakuku akwilumbusya

² Wee Mwene, nkimba nkwitizyanje mupaka liyi ukuti unyavwe loli utakuteghelezya? Pamo ukulilila ukuti, “Ulombwa kuno,” loli utakampoka?

³ Nkimba choni chicho ukumpela ukuti nennyanje ububibi bunubu? Nkimba choni chicho ukwitikizya ukuti abantu bambombaye ububibi? Nkukomana nintamyo, sona nukunanganika pamaso papane, posi na posi abantu bakulwa nukudalinkana.

⁴ Polelo indaghilo zite na maka sona ubwanaloli butakubombiwa nalumo. Abantu ababibi bakuboghofya abagholosu, umwakuti bakunyongannya ubwanaloli.

Ilyamulo ilya Mwene

⁵ “Talankannya nukuzyennya inko izinji, sona muswighaye nkani. Pakuti nkwiza pakubomba zimo mumasiku ghinyu, vivyo mutakwiza pakuzisubila, napapo mukabuziwa.

⁶ Teghelezya nkwiza pakubapela abantu aba mu Babiloni, pakuba na maka ukubachila, luko ulukali sona nulwa lubilo nkani. Bakwiza pakuvipota ivyisu vyosi ivyapasi, pakuvifyula ivyisu vivyo vite vyabo.

⁷ Bantu bakoghofya sona abantu bakubanyila, Bakwipangila bene indaghilo, sona bakwilondela bene umuchizi.

⁸ Ifalasi zyabo zili nulubilo nkani ukubachila abazyela, sona zyengo nkani ukubachila abakambwe pachamabwila. Ifalasi zyabo zikuchimbila nkani, abakukwelapo bakufumila kubutali nkani. Zikubuluka lubilolubilo ngati lizwanga, lilyo likubuka pakulema inyama.

⁹ Bosi bakwiza nu lombwa bo batakutalankannya nakumokumo, nukubabungannya abakayidi ngati musesenga.

¹⁰ Bakubasamula abamwene, nukubakozya isoni abalaghili. Bakutuseka utwaya tosi utukulu nkani utwa malinga, nukutulundikila itope ilyakukwelapo ukuti batufyulaye.

¹¹ Po bakudumusannya umwalubilolubilo ngati mpepo nukwibukila, sona abantu ababibi banaba, amaka we chala wabo.”

U Habakuku akwilumbusya akabubili

¹² Wee Mwene, Chala wane Nkimba te wewe we uliko bwila na bwila? Wee Chala wane, we Muzelu wane, tutakwiza pakufwa. Wee Mwene, we wabasala ukuti batulongaye inongwa, wee lyalabwe lyane, sona wewe wabimika ukuti batufundaye.

¹³ Amaso ghako mazelu nkani pakubwennya ububibi, sona utakwitikizya ukunanga. Nkimba choni chicho ukubitikizya abantu abakusambuka ukuti babombaye bulo ububibi? Nkimba choni chicho ukuba bulo myee, bo abantu ababibi bakubamila abagholosu ukubachila abene?

¹⁴ Ukabapela abantu pakuba ngati zyo swi izya munyanja, sona ngati vipeliwa ivya mumizi vivyo vite nu mulaghili.

¹⁵ Umubibi yula akubawesela bosi mumwanya ni ndobani, nukubalemela muchilepa chache. Ninkoka akubabungannya poka muchilepa chache, po akusekela nukuhoboka.

¹⁶ Polelo bakukubika ivyakwiyipa, nukuchifukizizya utwakunukila ichilepa chache. Pakuti akwilagha ubumi pachifukwa icha ichilepa chache, sona akwaghilamo ichakulya ichinonu nkani.

¹⁷ Nkimba akwiza pakwendelela pakubombezya ichilepa chache, nukuzighogha inko izinji umwakusita ichisa?