Ezila 9 - IBAYIBOLO 2024

Ulwiputo ulwa Ezila

¹ Bo zinizi zyabombiwa, abalongozi bakambuzya bakati, “Aba Izilayeli poka na baputi naba Levi batakipaghula ku bantu aba muvyisu ivipalamani babo bakubomba ivinyazu ukuyana namumo bakubombela aba Kenani naba Hiti naba Pelezi naba Yebusi naba Amoni naba Mowabu naba Ijiputi sona naba Amoli.

² Babasendite abana babo abalindu pakuba bachi babo sona pakuba balasagha babo. Abantu abapaghuliwa biyonganizye na bantu aba inko izinji babo babazyunguliye. Pachifukwa ichakusita ukusubiliwa, abalongozi na makambala bo babo bali pantazi pakuzibomba zinizi.”

³ Bo nivwa zinizi, nkazepula amenda ni nkazo yane pachifukwa icha chitima. Nkanyunkula isisi ni ndevu zyane sona nkikala pasi bo insulumanizye.

⁴ Po abantu bosi babo bakatetemagha pachifukwa icha mazyu agha Chala uwa Izilayeli bakanzyungulila pachifukwa ichakusita kusubiliwa ukwa bantu babo bakanyokako kubuzya. Po nkikala pasi palapala bo insulumanizye mupaka pachamabwila pakabalilo akakubikila ichakwiyipa.

⁵ Pachamabwila pakabalilo akakubikila ichakwiyipa, nkanyamuka bo insulumanizye, sona bo invwalite amenda ni nkazo yane inzepuke yila, nkafughama pasi, bo nkwezizye inyobe zyane kwa Mwene u Chala wane.

⁶ Po nkiputa nkati, “Wee Chala wane, indi ni soni ni chitima nkani, umwakuti intanginusizya icheni chane kukwako, pachifukwa imbibi zyitu zichilite pamitu yitu sona ukunanga kwitu kufikite kumwanya.

⁷ Ukwanda pakabalilo aka banyenya bitu mupaka nilelo bulo, twananga nkani. Pachifukwa icha mbibi zyitu, aswe na bamwene bitu poka na baputi bitu twabikiwa munyobe izya bamwene aba inko izinji, twaghoghiwa nukulemiwa pakuba bakayidi, twafyuliwa ivintu vyitu sona twakoziwa isoni pamaso pa bamwene aba inko izinji ukuyana namumo vibeleye pakabalilo aka.

⁸ “Loli ilelo pakabalilo akapimpa bulo, u Mwene u Chala witu atupeleye ichisa pakubaleka bumi abantu abanji pakasi papitu nukwinjila mubuzilo bwako ubuzelu bula. Utupokite kubuzya nukutupa ubumi ubupya.

⁹ Wee Chala witu, napapo twe bazya, awe utakatukana bo tuli mumayimba. Ukatupelela ichisa pamaso pa mwene uwamu Peleziya, po utupiye ubumi ubupya ukuti tuzenge sona Inyumba yako nukuviyannya sona ivisami vyache sona watuvighilila muchisu icha Yuda na mu Yelusalemu.

¹⁰ “Wee Chala witu, nkimba tungati choni? Pakuti twaghasulannya amalamulo,

¹¹ ghagho ukatupa ukwendela mu babombi bako abalaghuzi bo bakutubuzya ukuti, ‘Ichisu chicho mukubukako pakuchifyula ukuti chibanje chinyu, cho chisu chinyazu, pachifukwa ichakuti abantu babo bakwikala mulamula bachinyazizye ni mbombo zyabo inyazu, ukwandila kubumalilo ubwa chisu mpaka kubunji.

¹² Po abana babo abalumendo batakabanje bakwalima binyu sona abana binyu abalindu batakabanje balasagha babo. Mutakamanyanaye nabo nalumo, umwakuti ivintu vibendelaye akiza muchisu chilachila nukuti chibanje mpyana iya bana binyu bwila na bwila.’

¹³ “Ivintu vivyo vyatuwila cho chifukwa icha mbibi nu bubibi bwitu ubukulu nkani. Loli wee Chala witu, watufunda panandi bulo ukuchila namumo zibeleye imbibi zyitu sona witikizya ukuti abantu bitu bamo basyaleko bumi.

¹⁴ Nkimba choni cho tunangannye sona amalamulo ghako pakusendelana na bantu aba inko izinji, babo bakubomba ivintu ivinyazu vinivi? Naloli ungatukalalila nukutunangannya, sona utakwiza pakubaleka bumi abantu nabamobamo.

¹⁵ Wee Mwene, u Chala uwa Izilayeli, we mugholusu. Watwitikizya ukuti ilelo tusyale bumi. Ennya tuli pamaso papako aswe twe bantu ababibi, napapo nayumoyumo pakasi papitu angimilila pamaso papako.”